Yaa Nɔ ni Okɛ Maŋtsɛyeli lɛ Aye Klɛŋklɛŋ Gbɛhe
1 Nyɔŋmɔ Maŋtsɛyeli lɛ ni wɔkɛaaye klɛŋklɛŋ gbɛhe yɛ shihilɛ mli ni wɔha ehi nakai daa lɛ bɛ mlɛo kɛ́ wɔkɛ shika he naagbai loo naagbai krokomɛi miikpe. Te wɔfeɔ tɛŋŋ wɔyaa nɔ wɔkɛ Maŋtsɛyeli lɛ yeɔ klɛŋklɛŋ gbɛhe kɛ́ naagbai ba lɛ? Ni kɛ́ wɔná nitsumɔ ni biɔ ni wɔfolɔ kpeei amli loo egbaa wɔ shiɛmɔyaa naa hu? Belɛ ani esa akɛ wɔkɛ Maŋtsɛyeli lɛ aye gbɛhe ni ji enyɔ yɛ shihilɛ mli?
2 Hemɔkɛyeli ni Mli Wa He Miihia: Kɛ aka wɔhemɔkɛyeli akwɛ yɛ shihilɛi ni tamɔ nɛkɛ mli lɛ, esaaa akɛ wɔhiɛ kpáa Yehowa shiwoo lɛ kɛ nɔmimaa ni Yesu kɛha wɔ akɛ Nyɔŋmɔ kɛ sɛɛfimɔ baaha wɔ kɛ́ wɔtao Maŋtsɛyeli lɛ klɛŋklɛŋ lɛ nɔ. (Lala 37:25; Mat. 6:31-34) Je lɛŋ nibii ni náa mɔ nɔ hewalɛ kɛ nɔnyɛɛi baanyɛ ahà wɔjwɛŋmɔ nɔ ni ebaatsi wɔ gbɛ koni wɔkaha Maŋtsɛyeli lɛ miiya nɔ eefee oti ni he hiaa wɔ fe fɛɛ. Mɛi komɛi eha gbɛkpamɔi akɛ amɛaatsɔmɔ gbɔmɛi wuji yɛ nitsumɔ mli lɛ loo shika babaoo ni amɛaana efee nɔ ni he hiaa yɛ amɛshihilɛ mli lɛ. Shi kɛlɛ, taakɛ Paulo ji lɛ, ehe miihia ni wɔle nɔ̃ diɛŋtsɛ ni he hiaa yɛ shihilɛ mli lɛ jogbaŋŋ.—Fil. 3:7, 8.
3 Tsakemɔi Ahe Baanyɛ Ahia: Shiɛlɔ ko kɛɛ akɛ: “No mli lɛ mikɛ mitsui fɛɛ ewo minitsumɔ lɛ mli—no ji nɔ ni misumɔɔ fe fɛɛ. Misusu akɛ manyɛ maya nɔ mafee Odasefonyo lolo yɛ be mli ni mituɔ mibe lɛ mli be babaoo mihaa nitsumɔ mli nibii.” Shi enu he be fɛɛ be akɛ ebaanyɛ efee babaoo yɛ Yehowa sɔɔmɔ mli. Etsɛɛɛ ni eŋmɛɛ nitsumɔ ni haaa eya hiɛ yɛ mumɔŋ lɛ he. Beni etu ehe fɛɛ eha Maŋtsɛyeli nitsumɔ lɛ pɛ kɛkɛ ni enyɛ ekɛɛ akɛ: “Yɛ Yehowa hiɛ lɛ, kpaako minuɔ he akɛ mishihilɛ etee hiɛ, ni no ji nɔ̃ diɛŋtsɛ ni he hiaa.”
4 Miishɛɛ sane ji akɛ, mɛi babaoo eŋmɛɛ heloonaa nitsumɔi kɛ gbɛkpamɔi ni amɛyɔɔ akɛ amɛaaná shika babaoo kɛjɛ mli lɛ ahe, ni amɛha amɛshihilɛ efee mlɛo, ni amɛkɛ amɛhe ewo be fɛɛ sɔɔmɔ lɛ mli. Oblahii oshijafoi ni ji asafoŋ sɔɔlɔi kɛ onukpai ni etee Sɔɔmɔ Tsɔsemɔ Skul lɛ efee enɛ ni amɛmiiná sɔɔmɔ hegbɛi ni yɔɔ miishɛɛ mli ŋɔɔmɔ. Akɛni amɛkaseɔ Paulo nɔkwɛmɔnɔ ni nɔ bɛ lɛ hewɔ lɛ, yɛ anɔkwale mli lɛ amɛmii eshɛ heloonaa nii fioo ni amɛyɔɔ lɛ ahe.—1 Kor. 11:1; 1 Tim. 6:6-8; Heb. 13:5.
5 Eyɛ mli akɛ ekolɛ je lɛ baaye wɔhe fɛo yɛ jwɛŋmɔ ni wɔhiɛ yɛ shihilɛ he lɛ he moŋ, shi Yehowa jɔɔmɔ yɛ wɔ nɔ. (1 Kor. 1:21, 26-31) Ani ejeee nɔ ni woɔ mɔ hewalɛ akɛ ekɛ wɔ baatsu nii waa bɔ ni eeenyɛ ni ebaaye ebua wɔ koni wɔtsu enitsumɔ lɛ wɔgbe naa? Hegbɛ ni wɔná amrɔ nɛɛ akɛ wɔjaje Nyɔŋmɔ Maŋtsɛyeli ni ato shishi lɛ wɔtsɔɔ lɛ baŋ dɔŋŋ. No hewɔ lɛ, be ni wɔɔya nɔ wɔha Maŋtsɛyeli lɛ aye klɛŋklɛŋ gbɛhe yɛ wɔshihilɛ mli lɛ nɛ.