Ekome ni Wɔkɛ Yehowa kɛ E-Bi lɛ Efee yɛ Miishɛɛ Mli
Abaaye Nifeemɔ ni He Hiaa Fe Fɛɛ yɛ Afi lɛ Mli lɛ He Gbi Jurɔ yɛ March 28
1 Kɛ́ wɔye Nuntsɔ lɛ Gbɛkɛnaashi Niyenii lɛ yɛ hulushinyɔɔ sɛɛ yɛ March 28, 2002 lɛ, wɔtsɔɔ akɛ wɔkɛ Yehowa Nyɔŋmɔ kɛ Yesu Kristo efee ekome yɛ miishɛɛ mli. Yɛ nɛkɛ nifeemɔ nii krɛdɛɛ ni he hiaa waa nɛɛ mli lɛ, Kristofoi ni afɔ amɛ mu lɛ ateŋ shwɛɛnii lɛ kɛ Tsɛ lɛ, kɛ e-Bi lɛ baaná ‘naanyobɔɔ’ krɛdɛɛ ni kã amɛ kɛ Maŋtsɛyeli niyelɔi krokomɛi lɛ ateŋ lɛ mli gbɛfaŋnɔ. (1 Yoh. 1:3; Efe. 1:11, 12) “Tooi krokomɛi” akpekpei abɔ baajwɛŋ hegbɛ krɛdɛɛ ni amɛná akɛ amɛkɛ Yehowa kɛ e-Bi lɛ aaafee ekome, ní amɛkɛ amɛ afee ekome yɛ tsui kome kɛ jwɛŋmɔ kome mli yɛ Nyɔŋmɔ nitsumɔ lɛ he nitsumɔ mli lɛ he!—Yoh. 10:16.
2 Wekukpaa ni Mli Wa ni Akɛtsuɔ Nii yɛ Ekomefeemɔ Mli: Yehowa kɛ Yesu efee ekome yɛ miishɛɛ mli be fɛɛ be. Amɛkɛ afii babaoo ena naanyobɔɔ ni mli wa mli ŋɔɔmɔ dani abɔ gbɔmɔ. (Mika 5:1) No hewɔ lɛ, hedɔɔ ni mli wa waa etee nɔ yɛ amɛyi enyɔ lɛ teŋ. Ákɛ mɔ ni yɔɔ nilee ni ejie ehe kpo yɛ gbɔmɔtso su mli lɛ, beni nɛkɛ kromɔ-Bi nɛɛ batsɔko adesa lɛ, ebaanyɛ ekɛɛ akɛ: “Miyɛ [Yehowa masɛi] akɛ ŋaalɔ; ni mimii shɛɔ mihe daa, mishwɛɔ yɛ ehiɛ be fɛɛ be.” (Abɛi 8:30) Suɔmɔ Jɛɛhe lɛ ni Nyɔŋmɔ Bi lɛ kɛ lɛ tsu nii afii abɔ yɛ naanyobɔɔ ni mli wa waa mli lɛ ná enɔ hewalɛ waa diɛŋtsɛ!—1 Yoh. 4:8.
3 Akɛni bɔ ni ehe hiaa ni akpɔ̃ adesai lɛ yɔɔ Yehowa jwɛŋmɔŋ hewɔ lɛ, ehala e-Bi koome ni náa adesai ahe miishɛɛ waa lɛ koni ekɛ kpɔmɔ afɔleshaa ni bafeɔ wɔhiɛnɔkamɔ kome pɛ lɛ abaha. (Abɛi 8:31) Taakɛ Yehowa kɛ e-Bi lɛ tsuɔ yiŋtoo kome he nii yɛ ekomefeemɔ mli lɛ, wɔkɛ amɛ kɛ wɔteŋ mɔ fɛɛ mɔ feɔ ekome be fɛɛ be yɛ wekukpaa ni suɔmɔ babaoo yɔɔ mli lɛ mli, ni wɔkɛ mlifilimɔ feɔ Nyɔŋmɔ suɔmɔnaa nii.
4 Wɔtsuiŋ Hiɛsɔɔ lɛ Kpojiemɔ: Kɛ wɔtee Kaimɔ lɛ shishi ni wɔkɛ bulɛ bo sane toi jogbaŋŋ lɛ, wɔbaanyɛ wɔjie hiɛsɔɔ kpakpa ni wɔyɔɔ kɛha Yehowa suɔmɔ lɛ kɛ afɔle ni e-Bi lɛ sha kɛha wɔ lɛ kpo. Nɔ ni abaama nɔ mi ji Yesu suɔmɔ he nɔkwɛmɔnɔ lɛ, anɔkwa ni eye kɛyashi gbele mli yɛ kpɔmɔnɔ ni ekɛha lɛ mli lɛ, kɛ enɔyeli ákɛ Nyɔŋmɔ Maŋtsɛyeli ni ato shishi lɛ nɔ Maŋtsɛ, kɛ jɔɔmɔi hu ni Maŋtsɛyeli lɛ kɛbaaba abaha adesai lɛ. Abaakai wɔ bɔ ni ehe hiaa ni wɔjie anɔkwa ni wɔyeɔ lɛ kpo be fɛɛ be lɛ hu, ní wɔkɛ ekãa atsu nii yɛ Yehowa suɔmɔnaa nifeemɔ kɛ gbeekpamɔ naa ákɛ “anɔkwale lɛ he nanemɛi nitsulɔi.”—3 Yoh. 8; Yak. 2:17.
5 Mɛi Krokomɛi ni Wɔɔye Wɔbua Amɛ Koni Amɛkɛ Wɔ Aná Mli Gbɛfaŋnɔ: Esa akɛ onukpai akuu lɛ abɔ mɔdɛŋ jogbaŋŋ koni amɛwo Odasefoi fɛɛ ni yɔɔ shikpɔŋkuku lɛ mli ni amɛkpa shiɛmɔyaa lɛ hewalɛ koni amɛya Kristo gbele lɛ Kaimɔ lɛ. (Mat. 18:12, 13) Nyɛŋmalaa mɛi ni abaaya amɛ ŋɔɔ lɛ agbɛi ní nine ashɛ amɛ fɛɛ amɛnɔ koni aje gbɛ atsɛ amɛteŋ mɔ fɛɛ mɔ.
6 Ani ole mɛi krokomɛi ni ekolɛ amɛbaaba Kaimɔ lɛ? Ŋɔɔ hegbɛ lɛ koni okɛha amɛná hiɛsɔɔ amɛha nɛkɛ nifeemɔ nii nɛɛ. Okɛ miishɛɛ afɔ nine otsɛ amɛ, ni oha amɛhiɛ amɛ. Nyɛhaa wɔfea bɔ fɛɛ bɔ ni wɔɔnyɛ koni wɔfɔ̃ nine wɔtsɛ wɔ Biblia mli nikaselɔi fɛɛ kɛ mɛi krokomɛi ni yɔɔ wiemɔ lɛ he miishɛɛ lɛ kɛ agbɛnɛ weku mli bii kɛ mɛi ni wɔle amɛ hu kɛba nɛkɛ nifeemɔ ni he hiaa fe fɛɛ yɛ afi lɛ mli nɛɛ shishi. Kpɔmɔnɔ lɛ mli sɛɛnamɔi lɛ yɛ be fɛɛ be kɛha mɛi fɛɛ ni kaseɔ “Kristo Yesu . . . he nilee ni fe fɛɛ lɛ.” (Fil. 3:8) Mɛi ni náa Kristo afɔleshaa lɛ mli hemɔkɛyeli lɛ baanyɛ aná naanɔ wala he hiɛnɔkamɔ ni ma shi shiŋŋ lɛ.—Yoh. 3:16.
7 Kaaba hewalɛ ni Kaimɔ lɛ baanyɛ aná yɛ anɔkwafoi lɛ anɔ lɛ shi kɔkɔɔkɔ. Afii enyɔ ni eho lɛ, mɛi 11 ni yɔɔ wiemɔ lɛ he miishɛɛ lɛ kɛ lɛlɛ bibioo ko fã gbɛ ŋmɛlɛtswai 17 kɛtsɔ ŋshɔi ni efee hamahama lɛ hiɛ yɛ ŋshɔkpɔ maŋ ni yɔɔ Papua New Guinea lɛ nɔ koni amɛba eko. Mɛni hewɔ? Amɛkɛɛ akɛ: “Wɔmiisumɔ ni wɔkɛ nanemɛi Yehowa jálɔi aye Kristo Kaimɔ lɛ; no hewɔ lɛ gbɛfaa lɛ he ba sɛɛnamɔ waa.” Susumɔ ekãa ni nakai mɛi ni yɔɔ wiemɔ lɛ he miishɛɛ lɛ jieɔ lɛ kpo kɛ hiɛsɔɔ ni amɛyɔɔ akɛ amɛkɛ Yehowa, e-Bi lɛ, kɛ Kristofoi anyɛmifeemɔ lɛ aaafee ekome yɛ miishɛɛ mli lɛ he okwɛ!
8 Ha mɛi fɛɛ ni yɔɔ wiemɔ lɛ he miishɛɛ lɛ ale akɛ okɛ amɛ baafee Biblia mli nikasemɔ. Wo amɛ hewalɛ ni amɛya asafoŋ kpeei daa ni amɛgba mɛi krokomɛi anɔkwalei ni amɛkaseɔ lɛ. Ye obua amɛ ni ‘amɛnyiɛ la lɛ mli’ ni ‘amɛye anɔkwa’ kɛtsɔ Biblia mli shishitoo mlai ni amɛkɛaatsu nii yɛ amɛshihilɛ mli lɛ nɔ. (1 Yoh. 1:6, 7) Ye obua amɛ ni amɛná amɛkɛ Yehowa teŋ wekukpaa ni mli wa ni amɛya nɔ amɛha hiɛsɔɔ ni amɛyɔɔ kɛha hegbɛ ni amɛná akɛ amɛaafee esuɔmɔnaa nii yɛ ekomefeemɔ mli lɛ aya hiɛ.
9 Kwɛ bɔ ni eji hegbɛ ni hi jogbaŋŋ akɛ wɔɔfee ekome yɛ miishɛɛ mli ‘yɛ mumɔ kome mli, ni wɔkɛ jwɛŋmɔ kome miipele sanekpakpa lɛ hemɔkɛyeli lɛ he’! (Fil. 1:27, 28) Nyɛhaa wɔkwɛa naanyobɔɔ ni ŋɔɔ ni wɔkɛaabua wɔhe naa yɛ Kaimɔ lɛ shishi yɛ March 28 lɛ gbɛ, ni wɔjie shidaa kpo daa wɔha Yehowa kɛ e-Bi lɛ!—Luka 22:19.