Hiɛsɔɔ Kpo ní Wɔɔjie Beni Wɔkaiɔ Kpɔ̃mɔnɔ Lɛ
1, 2. Mɛni hewɔ esa akɛ wɔkɛ hiɛsɔɔ akai kpɔ̃mɔnɔ lɛ?
1 Taakɛ Yesu fã ni afee lɛ, Kristofoi ni yɔɔ je lɛŋ fɛɛ lɛ baabua amɛhe naa Hɔɔ, March 22, 2008 beni hulu enyɔ shi sɛɛ kɛkai Yesu Kristo gbele lɛ. (Luka 22:19; 1 Kor. 11:23-26) Wɔtsui tsirɛɔ wɔ koni wɔjie hiɛsɔɔ ni mli kwɔ kpo wɔha kpɔ̃mɔnɔ ni akɛha afii 1,975 ni eho nɛ lɛ. Yesu tse e-Tsɛ gbɛi lɛ he kɛtsɔ emuuyeli mli ni ehiɛ yɛ piŋmɔ ni epiŋ kɛtee sɛŋmɔtso nɔ gbele mli lɛ nɔ, ni enɛ ha aná Satan mpoatswaa lɛ hetoo yɛ gbɛ ni hi fe fɛɛ lɛ nɔ.—Hiob 1:11; Abɛi 27:11.
2 Yesu lá ni afɔse ashwie shi lɛ ma kpaŋmɔ hee lɛ nɔ mi, ni enɛ ha adesai ni yeee emuu lɛ batsɔmɔ Nyɔŋmɔ bii kɛ gbɛkpamɔ akɛ amɛkɛ Kristo baaye nɔ yɛ eŋwɛi Maŋtsɛyeli lɛ mli. (Yer. 31:31-34; Mar. 14:24) Kɛfata he lɛ, beni Nyɔŋmɔ kɛ e-Bi ni esumɔɔ lɛ waa lɛ shã afɔle lɛ, eha suɔmɔ ni mli wa ni eyɔɔ kɛha adesai lɛ bafee faŋŋ, taakɛ Yesu diɛŋtsɛ gbala mli etsɔɔ Nikodemo lɛ.—Yoh. 3:16.
3. Mɛɛ gbɛ nɔ mɛi ni baaba Kaimɔ lɛ shishi lɛ baaná he sɛɛ?
3 Fɔ̃ɔ Mɛi Krokomɛi Nine: Akɛ gbɛtsɔɔmɔ ha yɛ January 2008 Wɔ Maŋtsɛyeli Sɔɔmɔ lɛ mli akɛ wɔŋmala mɛi ni wɔle lɛ agbɛi wɔshwie shi, ní wɔfɔ̃ amɛ nine kɛha Kaimɔ lɛ. Ani obɔi mɛi ni oŋmala amɛgbɛi lɛ aninefɔ̃ɔ? Ani ooto gbɛjianɔ ni okɛ ohe awo ta ní abaafã kɛjɛ March 1 kɛfɔ̃ mɛi anine kɛba Kaimɔ lɛ shishi lɛ mli kɛmɔ shi? Mɛi ni baaba lɛ baanu Ŋmalɛ mli wiemɔi ni baaha amɛná hemɔkɛyeli yɛ kpɔ̃mɔnɔ lɛ mli, ni enɛ baagbele gbɛ kɛha amɛ ní amɛná naanɔ wala.—Rom. 10:17.
4. Mɛni hewɔ esa akɛ wɔshɛ Kaimɔ lɛ shishi mra lɛ?
4 Esa akɛ mɛi fɛɛ ni baanyɛ lɛ ato gbɛjianɔ ni amɛba mra koni amɛhere mɛi ni kpɛlɛ ninefɔ̃ɔ krɛdɛɛ lɛ nɔ ní amɛba lɛ atuu. Akɛni mɛi babaoo baa Kaimɔ lɛ shishi hewɔ lɛ, ehe miihia ni wɔha wɔhiɛ ahi mɛi heei kɛ mɛi ni baa kpee yɛ be kɛ beaŋ lɛ fɛɛ anɔ.
5. Mɛɛ gbɛ nɔ obaanyɛ otsɔ osaa otsui kɛha nifeemɔ nɛɛ?
5 Saamɔ Otsui: Ato Kaimɔ lɛ he Biblia kanemɔ krɛdɛɛ ni jeɔ shishi kɛjɛɔ March 17 lɛ he gbɛjianɔ yɛ Ŋmalɛi lɛ Amli ni Wɔɔkwɛ Daa—2008 kɛ 2008 Calendar lɛ mli. Nibii ni he hiaa ni tee nɔ yɛ Yesu shikpɔŋ lɛ nɔ shihilɛ lɛ naagbee gbii lɛ amli lɛ he ni wɔɔsusu lɛ baaye abua wɔ ni wɔsaa wɔtsui kɛha Kaimɔ lɛ yeli. (Ezra 7:10) Sɔlemɔ ni wɔkɛaajwɛŋ Biblia mli saji nɛɛ anɔ lɛ baaha hiɛsɔɔ ni wɔyɔɔ kɛha suɔmɔ ni Yehowa kɛ e-Bi lɛ jie lɛ kpo kɛtsɔ kpɔ̃mɔnɔ lɛ nɔ lɛ mli awa.—Lala 143:5.
6. Mɛɛ gbɛ nɔ hiɛsɔɔ ni mli kwɔ kpo ni wɔɔjie yɛ kpɔ̃mɔnɔ lɛ he lɛ he baaba sɛɛnamɔ aha wɔ?
6 Beni Kaimɔ lɛ bɛŋkɛɔ nɛɛ, eba akɛ wɔbaasaa wɔhe jogbaŋŋ ni wɔye wɔbua mɛi krokomɛi ni amɛsaa amɛhe kɛha nifeemɔ ni he hiaa nɛɛ. Hiɛsɔɔ ni wɔkɛ baakai kpɔ̃mɔnɔ lɛ baawaje wekukpãa ni kã wɔ kɛ Yehowa kɛ e-Bi lɛ teŋ lɛ. (2 Kor. 5:14, 15) Agbɛnɛ hu ebaatsirɛ wɔ ni wɔjɛ wɔsuɔmɔ mli wɔkɛ wɔhe ashã afɔle wɔha mɛi krokomɛi taakɛ amɛfee lɛ.—1 Yoh. 4:11.