Wolo Ni Jɛ Nɔyeli Kuu Lɛ Dɛŋ
Eji miishɛɛ sane akɛ wɔɔŋma nyɛ ni ji ‘nyɛmimɛi anaanyobɔɔ kuu lɛ fɛɛ’ ni yɔɔ je lɛŋ he fɛɛ he lɛ yɛ be mli ni wɔboteɔ afii ohai 21 lɛ shishijee afii lɛ amli lɛ, ní wɔjie nyɛyi yɛ nitsumɔ ni nyɛtsuɔ waa lɛ hewɔ. (1 Pet. 2:17) Aaafee afii 2,000 ni eho nɛ ni Yesu bi akɛ: “Beni gbɔmɔbi lɛ aaaba lɛ, ani eeebana hemɔkɛyeli yɛ shikpɔŋ lɛ nɔ?” (Luka 18:8) Nitsumɔ ni nyɛtsu kɛ ekãa yɛ sɔɔmɔ afi ni ho lɛ mli lɛ haa Yesu sanebimɔ lɛ hetoo kɛ hɛɛ ni jijeɔ! Aŋmɔ nyɛteŋ mɛi komɛi, ni aye nyɛhe fɛo yɛ nyɛhemɔkɛyeli lɛ hewɔ. Nyɛŋmɛ nyɛtsui shi yɛ tawuui, osharai, hela loo hɔmɔ mli yɛ hei babaoo. (Luka 21:10, 11) Akɛni nyɛkɛ ekãa tsuɔ nyɛ jalɛ nitsumɔi lɛ ahewɔ lɛ, Yesu baanyɛ ‘ana hemɔkɛyeli yɛ shikpɔŋ lɛ nɔ’ lolo. Enɛ hewɔ lɛ, eka shi faŋŋ akɛ, mlifilimɔ miiya nɔ yɛ ŋwɛi yɛ enɛ hewɔ!
Wɔle akɛ tsuishiŋmɛɛ bɛ mlɛo. Nyɛsusua kaai ni wɔnyɛmimɛi ni yɔɔ Asia anaigbɛ maŋ ko mli lɛ kɛkpeɔ lɛ he nyɛkwɛa. Niseniianiifeemɔ ni akɛbaa Yehowa Odasefoi anɔ lɛ ebafee nɔ ko ni afeɔ waa yɛ nakai maŋ lɛ mli. Nyɛsɛɛ nɛɛ, polisifoi fite kpokpaa nɔ kpee ni mɛi aaashɛ 700 feɔ yɛ toiŋjɔlɛ mli lɛ. Nibii ni ákɛtsĩmɔ gbɛjegbɛ nɔ haaa mɛi krokomɛi ni naa shɛɔ 1,300 aya kpee lɛ. Basabasafeelɔi akuu ni kɛ nii etsĩmɔ amɛhiɛ ni amɛteŋ mɛi komɛi ji polisifoi lɛ ke yuu kɛtee he ni afeɔ kpee lɛ yɛ lɛ, ni amɛyi mɛi ni eba lɛ ateŋ mɛi babaoo, ni amɛwo agba ni akɛbaafee kpee lɛ mli la. Yɛ bei krokomɛi amli lɛ, jamɔ he basabasafeelɔi kɛ tsokpotii ni plɛkoobii tsɛrɛ he eyi wɔnyɛmimɛi lɛ kɛ musuŋshãa.
Tutuamɔi ni tamɔ nɛkɛ lɛ haa mɔ he jɔ̃ɔ lɛ, shi ebɛ naakpɛɛ. Akɛ mumɔ tsirɛ bɔfo Paulo koni eŋma akɛ: “Mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi.” (2 Tim. 3:12) Kristofoi ŋmɛ amɛtsui shi yɛ klɛŋklɛŋ afii oha lɛ mli, yɛ saji ni akɛtutua amɛ kɛ gbɔmɔtsoŋ yiwaa lɛ mli, ni agbe amɛteŋ mɛi komɛi po. (Bɔf. 5:40; 12:2; 16:22-24; 19:9) Nakai nɔŋŋ eji anɔkwale yɛ afii ohai 20 lɛ mli, ni ŋwanejee ko kwraa bɛ he akɛ ebaaya nɔ nakai yɛ afii ohai 21 lɛ hu mli. Ni kɛlɛ, Yehowa kɛɔ wɔ akɛ: “Tawuu nii ní asɔ̃ɔ ashiɔo lɛ eko eko nyɛŋ nɔ ko afee.” (Yes. 54:17) Mɛɛ nɔmimaa ni yɔɔ naakpɛɛ enɛ ji nɛkɛ! Eji anɔkwale akɛ, wɔjara wa kɛha Yehowa aahu akɛ ekɛɛ kɛtsɔ egbalɔ Zakaria nɔ akɛ: “Mɔ ni taa nyɛhe lɛ eeta [mihiŋmɛiŋ] ajaŋmalaatɛ he.” (Zak. 2:12) Yehowa jálɔi ahenyɛlɔi lɛ bɛ hegbɛ ni amɛkɛaaye kunim kɛyashi naagbee. Jamɔ krɔŋŋ baaye kunim!
Ákɛ nɔkwɛmɔnɔ lɛ, yɛ maŋ ni atsĩ tã kɛtsɔ hiɛ lɛ mli lɛ, Yehowa Odasefoi ná shiɛlɔi ayifalɛ heei enyɔ ni fe fɛɛ yɛ afi 2001 sɔɔmɔ afi lɛ mli. Hɛɛ, wɔnyɛmimɛi lɛ fiɔ shi shiŋŋ yɛ jɛmɛ yɛ shihilɛ ni mli wa lɛ fɛɛ sɛɛ taakɛ amɛfeɔ yɛ he fɛɛ he lɛ. Yɛ sɔɔmɔ afi ni ho lɛ mli lɛ, abaptisi mɛi 5,066 daa otsi yɛ jeŋ lɛŋ fɛɛ kɛfee amɛhenɔjɔɔmɔ kɛha Yehowa lɛ he okadi. Amrɔ nɛɛ, nɛkɛ mɛi heei nɛɛ etswa amɛfai shi akɛ amɛaafata wɔteŋ mɛi ni eshwɛ lɛ ahe ‘kɛdamɔ shi kɛye emuu ni wɔyimɔ obɔbɔ yɛ Nyɔŋmɔ suɔmɔnaa nii fɛɛ mli.’—Kol. 4:12.
Agbɛnɛ hu, nyɛsusua nibii ni tee nɔ nyɛsɛɛ nɛɛ yɛ Greece lɛ ahe nyɛkwɛa. Yɛ shitee-kɛ-woo ní naa wa waa ni Greek Orthodox Church lɛ kɛba afii babaoo lɛ fɛɛ sɛɛ lɛ, nɔyeli lɛ kpɛlɛɔ Yehowa Odasefoi anɔ bianɛ akɛ “jamɔ ni ale.” Wolo ni kɛ nɔkpɛlɛmɔ nɛɛ haa lɛ kɛɛ kɛtsa nɔ akɛ Greece Betel shia lɛ ji “jamɔ hekrɔŋkrɔŋ ni ajɔɔ nɔ aha Nyɔŋmɔ jamɔ.” Eji miishɛɛ sane akɛ wɔɔha nyɛle hu akɛ, yɛ sɔɔmɔ afi ni ho lɛ mli lɛ, saneyelihei kɛ saji ni yɔɔ miishɛɛ ni muɔ sane naa yɛ mla naa ni kɔɔ wɔjamɔ lɛ he lɛ eha yɛ Bulgaria, Canada, Germany, Japan, Romania, Russia, kɛ United States. Kwɛ bɔ ni wɔdaa Yehowa shi akɛ eha shinaa naa egbele kɛha nitsumɔ yɛ nakai shikpɔji lɛ anɔ!
Yɛ be mli ni wɔsusuɔ gbɛ̀i ni Yehowa tsɔɔ nɔ efiɔ ewebii asɛɛ yɛ naagbee gbii nɛɛ amli lɛ he lɛ, wɔnaa akɛ lɛ ji Naanyo ni hi fe fɛɛ ni wɔɔnyɛ wɔná. Wɔmii shɛɔ wɔhe yɛ wekukpaa ni kã wɔkɛ lɛ teŋ lɛ hewɔ, akɛni wɔle akɛ esumɔɔ wɔ, etsɔɔ wɔ nii, ni ejajeɔ wɔ lɛ hewɔ. Hɛɛ, hemɔkɛyeli he kaai baaya nɔ abaje wɔgbɛ nɔ. Shi Yehowa mli hemɔkɛyeli ni hosooo lɛ kɛ wɔ baatsɔ̃ mli. Yakobo ŋma akɛ: “Minyɛmimɛi, kɛji nyɛgbee kaai srɔtoi pii amli lɛ, nyɛbuaa lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛ́ɔ tsuishiŋmɛɛ kɛbaa.” (Yak. 1:2, 3) Kɛfata he lɛ, wɔ tsuishiŋmɛɛ lɛ tsɔɔ suɔmɔ ni wɔyɔɔ kɛha Yehowa, ni enɛ haa wɔnáa miishɛɛ babaoo! Suɔmɔ nyɛmimɛi, nyɛnáa nɔmimaa akɛ Yehowa baafi wɔteŋ mɔ fɛɛ mɔ sɛɛ. Kɛ wɔtee nɔ wɔye anɔkwa lɛ, ebaaye ebua wɔ kɛ̃ kɛbote jeŋ hee lɛ mli. Eesumɔ ni wɔye omanye.
No hewɔ lɛ, nyɛmimɛi hii kɛ yei, gbekɛbii kɛ onukpai, wɔmiiwo nyɛ hewalɛ koni nyɛha jɔɔmɔi ni yɔɔ naakpɛɛ, ni jwere wɔhiɛ lɛ ahi nyɛjwɛŋmɔ mli. Eba akɛ, wɔnifeemɔi aaafee tamɔ bɔfo Paulo ni ŋma akɛ: “Misusuɔ akɛ ŋmɛnɛŋmɛnɛ amanehului nɛɛ kɛ anunyam ní wɔsɛɛ abaajie kpo aha wɔ lɛ yeee egbɔ.” (Rom. 8:18) Okɛ ohiɛ afɔ̃ Yehowa nɔ yɛ be mli ni okɛ amanehului srɔtoi fɛɛ kpeɔ lɛ. Ŋmɛɛ otsui shi, kaaŋmɛɛ he kɔkɔɔkɔ. Oshwaŋ ohe kɔkɔɔkɔ. Nyɔŋmɔ Wiemɔ lɛ maa nɔ mi kɛhaa wɔ akɛ: “Jalɔ lɛ, ehemɔkɛyeli lɛ nɔ eeetsɔ ni eyi aaaná wala.”—Hab. 2:4.
Nyɛnyɛmimɛi,
Yehowa Odasefoi a-Nɔyeli Kuu