Gbɔmɛi ni Jɛ Wiemɔi Srɔtoi Fɛɛ Mli lɛ Anaabuamɔ
1 Nyɔŋmɔ Wiemɔ lɛ miiná emlibaa! Gbɔmɛi “ni jɛ jeŋmaji anɔ wiemɔi srɔtoi fɛɛ mli” lɛ miikpɛlɛ anɔkwa jamɔ nɔ. (Zak. 8:23) Mɛɛ gbɛ nɔ Yehowa Odasefoi tsɔɔ amɛyeɔ amɛbuaa aŋkroaŋkroi ni jɛ ‘akutsei, maji, kɛ majianɔ wiemɔi’ fɛɛ amli, koni amɛná shidaamɔ ni he tse yɛ Yehowa hiɛ, kɛ gbɛkpamɔ akɛ amɛbaafo “amanehulu kpeteŋkpele lɛ”?—Kpoj. 7:9, 14.
2 Nyɔŋmɔ Gbɛjianɔtoo lɛ Tsuɔ He Nii: Nɔyeli Kuu lɛ eto gbɛjianɔ koni nine ashɛ Biblia kasemɔ woji anɔ yɛ wiemɔi aaafee 380 mli, bɔni afee ni gbɔmɛi ni yɔɔ shikpɔŋ nɔ he fɛɛ he anyɛ anu bɔ ni sanekpakpa lɛ he hiaa ha lɛ shishi jogbaŋŋ. Woji ahe gbɛjianɔ ní atoɔ ni akalaa yɛ wiemɔi ni fa babaoo mli lɛ ji nitsumɔ ko ni da waa. Ebiɔ ni abua wiemɔ shishitsɔɔlɔi akui ni he esa naa, koni akɛ yelikɛbuamɔ ni he hiaa amɛ koni amɛkɛtsɔɔ wɔwoji lɛ ashishi kɛya wiemɔi nɛɛ fɛɛ amli lɛ aha amɛ, kɛ agbɛnɛ hu woji akalamɔ kɛ ekɛ majemɔ. Ni kɛlɛ, Maŋtsɛyeli shiɛlɔi aŋkroaŋkroi ni kɛ Biblia lɛ mli shɛɛ sane ni hereɔ mɔ yiwala lɛ yahãa gbɔmɛi lɛ ji mɛi ni tsuɔ gbɛfaŋnɔ ni he hiaa titri lɛ he nii.
3 Naagba lɛ He Nii ni Aaatsu: Anaa gbɔmɛi babaoo ni wieɔ maŋsɛɛ wiemɔi bianɛ yɛ hei pii, ni Ghana fata he. Bɔni afee ni akɛ sanekpakpa lɛ aha nɛkɛ gbɔmɛi nɛɛ, Nyɔŋmɔ sɔɔlɔi lɛ ateŋ mɛi babaoo miibɔ mɔdɛŋ ní amɛkase wiemɔ kroko ní ehe shi yɛ amɛ akutso lɛ mli. Mɛi krokomɛi miikase Amerika Mumuii Awiemɔ. Mumuii ni amɛteŋ mɛi komɛi nuko Yehowa he sane ko dã loo amɛleee Biblia lɛ he nɔ ko nɔ ko kwraa lɛ miikpɛlɛ Nyɔŋmɔ Wiemɔ lɛ mli anɔkwale lɛ nɔ.— Rom. 15:21.
4 Ani wɔbaanyɛ wɔmia wɔhiɛ waa diɛŋtsɛ yɛ sanekpakpa lɛ ni wɔɔjaje wɔtsɔɔ gbɔmɛi ni jɛ maji krokomɛi amli ni yɔɔ wɔshikpɔŋkuku lɛ mli lɛ? (Kol. 1:25) Asafoi babaoo miito shiɛmɔ nitsumɔ lɛ he gbɛjianɔ yɛ maŋ lɛ mli akutso ni maŋsɛɛbii yɔɔ mli lɛ mli. Klɛŋklɛŋ lɛ, shiɛlɔi lɛ kaseɔ wiemɔ lɛ bɔ ni sa, koni amɛkɛ shiɛmɔ wiemɔi ni yɔɔ mlɛo ni tamɔ nɛkɛ aha akɛ: “Hɛloo. Naa sanekpakpa ko kɛha bo. [Kɛkɛ lɛ amɛkɛ dɛhiɛmɔ wolo ko loo wolo bibioo ko ni yɔɔ nakai wiemɔ lɛ mli lɛ eha.] Wɔbaakpe ekoŋŋ.” Yehowa miijɔɔ nakai shishijee bibiibibii lɛ anɔ waa diɛŋtsɛ!
5 Gbɔmɛi ni jɛ shihilɛi srɔtoi kɛ wiemɔi fɛɛ amli lɛ náa Maŋtsɛyeli shɛɛ sane lɛ he miishɛɛ. Nyɛhãa wɔŋɔa hegbɛ lɛ koni wɔkɛ amɛ agba he sane.