Kpee Krɛdɛɛ Gbi He Gbɛjianɔtoo Hee

Kpee krɛdɛɛ gbi he gbɛjianɔtoo kɛha sɔɔmɔ afi hee lɛ saneyitso lɛ hiɛ Ŋmalɛ naa wiemɔ ni mli wa ni kanyaa mɔ: “Nyɛbaa Nyɛhe Shi Nyɛhaa Nyɔŋmɔ—Nyɛtea Shi Nyɛwoa Abonsam.” (Yak. 4:7) Enɛ ji gbɛtsɔɔmɔ kpakpa kɛha jaramɔ bei nɛɛ! Nyɔŋmɔ mlai lɛ atoi ní wɔboɔ lɛ haa wɔkɛ Satan kpeɔ hiɛ kɛ hiɛ. Kpee lɛ baatsɔɔ wɔ bɔ ni wɔɔfee ni wɔdamɔ shi wɔshi Abonsam hemɔkɛyeli fitemɔ he ŋaa fɔŋ lɛ. Mɛni ji mumɔŋ jwetrii komɛi ni wɔnine baashɛ nɔ yɛ kpee nɛɛ shishi?

Kpokpaa nɔkwɛlɔ lɛ baatsɔɔ bɔ ni “Nyɔŋmɔ Gbeyeishemɔ ni Akɛaaba He Shi ákɛ Weku Mli Bii” lɛ woɔ wekui lɛ hewalɛ koni amɛdamɔ je lɛŋ nɔnyɛɛi lɛ anaa lɛ mli. Saralɔ lɛ klɛŋklɛŋ wiemɔ yɛ gbi lɛ mli, ni ji “Nɔ ni Ebiɔ Koni Anyɛ Ate Shi Awo Abonsam” lɛ baatsɔɔ nɔ hewɔ kɛ bɔ ni ehe hiaa ni wɔkɛ ekãa afee nɔ ko kɛte shi kɛwo mɔdɛŋ ni Satan bɔɔ koni efite wɔmumɔŋ shidaamɔ lɛ. Ato fãi enyɔ komɛi ahe gbɛjianɔ kɛha oblahii kɛ oblayei lɛ titri, mɛi ni esa akɛ amɛ hu amɛha amɛhiɛ ahi amɛhe nɔ yɛ Abonsam ŋaatsɔɔi lɛ ahe lɛ. Kristofoi babaoo ni amrɔ nɛɛ amɛdara lɛ kpoo akɛ amɛkɛ je lɛŋ akɔnɔi aaanyiɛ beni amɛji oblahii kɛ oblayei. Ebaaŋɔɔ wɔnaa akɛ wɔɔbo amɛ diɛŋtsɛ amɛniiashikpamɔi ni amɛbaagba lɛ ekomɛi atoi.

Aabi ni mɛi fɛɛ ni feɔ adesai aweku lɛ aba amɛhe shi amɛha nɔyeli hegbɛ. No hewɔ lɛ, saralɔ lɛ naagbee wiemɔ lɛ baama hei ejwɛ ní esa akɛ wɔjie heshibaa ni Nyɔŋmɔ gbeyeishemɔ yɔɔ mli kpo lɛ nɔ mi: (1) kɛha nɔyelii, (2) yɛ asafo lɛ mli, (3) yɛ je lɛŋ nitsumɔhei, kɛ (4) yɛ weku kɔkɔrɔɔ lɛ mli. Mɛɛ kpee ni he yɔɔ sɛɛnamɔ eeeji nɛkɛ!

Ehe miihia ni mɛi ni sumɔɔ ni abaptisi amɛ yɛ nɛkɛ kpee krɛdɛɛ gbi nɛɛ shishi lɛ aha onukpai asɛinɔtalɔ lɛ ale oya nɔŋŋ. Esa akɛ wɔ fɛɛ wɔkadi nɛkɛ gbi nɛɛ yɛ wɔ kalanda lɛ nɔ ni wɔto gbɛjianɔ ni wɔya kpee lɛ gbi muu lɛ fɛɛ. Jɔɔmɔi ni wɔnine shɛɔ nɔ lɛ baafee nɔ ni hiɔ shi daa yɛ be mli ni wɔbaa wɔhe shi wɔhaa Yehowa kɛyaa naanɔ lɛ.