Vidio ko ni Baaha Oná Sɛɛyoomɔ ni Ekanya Bo!

Afi lɛ ji April 1951. Abua Yehowa Odasefoi akpekpei abɔ—wekui pii amli bii fɛɛ—ni yɔɔ tsutsu Soviet Union lɛ anaa awo oketekei ni akɛlooɔ jatsui amli, ni atswa amɛnaneshi tũ kɛtee Siberia. Mɛni hewɔ Soviet nɔyeli ni he wa lɛ tswa efai shi akɛ ebaakpata amɛhiɛ lɛ? Te fee tɛŋŋ ni wɔnyɛmimɛi lɛ ayi ná wala, ni amɛshwere po yɛ afii babaoo ni amɛkɛhi yiwaa ni naa wa waa shishi lɛ fɛɛ sɛɛ? Obaana hetooi lɛ yɛ vidio ni ji Faithful Under Trials—Jehovah’s Witnesses in the Soviet Union lɛ mli. Kwɛmɔ vidio lɛ, ni oha emli shɛɛ sane ni haa anáa sɛɛyoomɔ lɛ akanya bo koni oya nɔ ohiɛ onɔkwayeli kɛha Yehowa lɛ mli, ekɔɔɔ he eko nɔ ni baaba!

Ani obaanyɛ oha sanebimɔi nɛɛ ahetoo? (1) Mɛɛ be mli akpɛlɛ Yehowa Odasefoi anɔ yɛ mla naa klɛŋklɛŋ kwraa yɛ Russia? (2) Te fee tɛŋŋ ni Soviet Union baná Odasefoi awekui akpekpei abɔ lolo dani Jeŋ Ta II lɛ shɛ kɛ no sɛɛ? (3) Yɛ mɛɛ gbɛ nɔ amɛhemɔkɛyeli lɛ kɛ Lenin jeŋ nilee lɛ kpãaa gbee kwraa? (4) Mɛni ji Operation North, ni mɛni ji nɔ ni Stalin hiɛ kã nɔ akɛ ekɛbaatsu? (5) Mɛni naneshi tũ tswaa tsɔɔ kɛha Odasefoi lɛ, ni mɛni akɛɛ amɛfee koni akatswa amɛnaneshi tũ? (6) Beni wɔnyɛmimɛi hii kɛ yei lɛ kɛ oketeke fãa gbɛ kakadaŋŋ kɛyaa Siberia lɛ, yɛ mɛɛ gbɛ nɔ bɔ ni amɛwowoo amɛhe hewalɛ lɛ ha mɛi ni bamɔmɔ amɛ lɛ anaa kpɛ amɛhe? (7) Mɛɛ amanehului Odasefoi lɛ to amɛtsui shi yɛ mli yɛ Siberia? (8) Mɛɛ mumɔŋ gbɛjianɔtoo Yehowa webii lɛ buɔ akɛ ejara wa waa, ni mɛni hewɔ? (9) Mɛni hewɔ wɔnyɛmimɛi lɛ sumɔɔ ni amɛkɛ amɛwala awo oshara mli bɔni afee ni amɛnine ashɛ amɛwoji lɛ anɔ, ni mɛɛ gbɛ nɔ amɛye omanye yɛ mɔdɛŋ fɛɛ ni nɔyeli lɛ mli onukpai lɛ bɔ koni amɛtsĩ amɛnaa lɛ fɛɛ sɛɛ? (10) Khrushchev tee nɔ etutua Nyɔŋmɔ webii lɛ yɛ mɛɛ gbɛ nɔ? (11) Mɛɛ gbɛ nɔ nɔyeli lɛ mli onukpai bɔ mɔdɛŋ koni amɛfite Odasefoi abii lɛ ahemɔkɛyeli? (12) Mɛɛ shishinumɔ ni yɔɔ faŋŋ wɔnyɛmimɛi lɛ yɔɔ yɛ yiŋtoo hewɔ ni awaa amɛyi lɛ he? (2002 Yearbook, baafa 203-204) (13) Hewalɛ fɛɛ ni yiwalɔi lɛ kɛtutua Nyɔŋmɔ gbɛjianɔtoo lɛ yeee omanye yɛ mɛɛ gbɛ nɔ? (2002 Yearbook, baafa 220-221) (14) Mɛɛ nibii ni ba mli diɛŋtsɛ tsutsu ko lɛ eji lamɔ ko kɛkɛ kɛha Odasefoi ni yɔɔ Soviet Union lɛ? (15) Mɛni ye ebua wɔnyɛmimɛi lɛ ni amɛnyɛ amɛto amɛtsui shi yɛ kaai lɛ amli, ni mɛɛ gbɛ nɔ vidio lɛ naagbee mfoniri lɛ tsɔɔ anɔkwale ni Yeremia 1:19 lɛ ji? (16) Gbaa shihilɛ mli niiashikpamɔ diɛŋtsɛ ko ni tsɔɔ anɔkwayeli yɛ kaa mli ni kanyaa bo titri.