Kpokpaa nɔ Kpee He Gbɛjianɔtoo Hee
1 Bɔni afee ni wɔdamɔ shi shiŋŋ yɛ hemɔkɛyeli lɛ mli yɛ jeŋ ni bɛ shiŋŋ mli lɛ, esa akɛ wɔkɛ wɔhiɛ afɔ Yehowa nɔ. Te wɔɔfee tɛŋŋ wɔjie nakai hekɛnɔfɔɔ lɛ kpo yɛ wɔdaa gbi shihilɛ mli? Mɛɛ gbɛ nɔ hekɛnɔfɔɔ ni wɔɔná yɛ Yehowa mli lɛ saa wɔ diɛŋtsɛ wɔshihilɛ kɛ wɔweku lɛ he yɛ? Mɛɛ gbɛ nɔ eyeɔ ebuaa wɔ yɛ koni wɔkpoo hewalɛ ni Satan je lɛ kɛbaa lɛ? Kpokpaa nɔ kpee he gbɛjianɔtoo kɛha afi 2003 sɔɔmɔ afi lɛ haa sanebimɔi nɛɛ ahetoo. Esaneyitso ji “Ŋɔɔ Ohiɛ Ofɔ̃ Yehowa Nɔ, ni Ofee Ekpakpa.”—Lala 37:3.
2 Hekɛnɔfɔɔ ni wɔyɔɔ yɛ Yehowa mli lɛ ejeee kpo yɛ nifeemɔ krɛdɛɛi pɛ ashishi loo yɛ hiamɔ bei ni mli wa lɛ amli pɛ. Esaa wɔdaa gbi shihilɛi ahe. Ama enɛ nɔ mi yɛ shishijee wiemɔ ni ji, “Nyɛkɛ Nyɛhiɛ Afɔ̃a Yehowa Nɔ Be Fɛɛ Be” lɛ mli. (Lala 62:9) Wiemɔi ejwɛ ni ahaa kɛtsaraa nɔ ni ji “Hekɛnɔfɔɔ Kpo ni Aaajie yɛ Yehowa Mli” lɛ baatsɔɔ wɔ bɔ ni wɔɔfee wɔtao saji ni damɔ Biblia lɛ nɔ ni wɔkɛtsu nii, ni baanyɛ aye abua wɔ koni wɔtswa gbalashihilɛ ni yeɔ omanye wɔma shi, koni wɔtsu naagbai ni baa yɛ weku kɔkɔrɔɔ lɛ mli lɛ ahe nii, ni agbɛnɛ wɔtsu wɔheloonaa hiamɔ nii lɛ ahe nii.
3 Satan je lɛ bɔɔ mɔdɛŋ koni ekɛ susumɔi kɔdɔji ni kɔɔ nɔ ni ja kɛ nɔ ni ejaaa he afɔ wɔnɔ koni eha wɔyiŋ afutu yɛ nɔ ni he hiaa kɛ nɔ ni he ehiaaa he. (Yes. 5:20) Wiemɔi ni ji “Kwɛmɔ Jogbaŋŋ yɛ Yakayaka Nibii Ahe” kɛ “Nyɛkpoa Efɔŋ—Nyɛfea Mɛi ni Feɔ Ekpakpa” lɛ baasaa awaje wɔfaishitswaa lɛ koni wɔhiɛ Yehowa tɛi ni nɔ kwɔlɔ lɛ amli.—Amos 5:14.
4 Kɛ́ Yehowa kɛ ŋmɛnɛŋmɛnɛ nibii agbɛjianɔtoo fɔŋ lɛ ba naagbee lɛ, ehe baahia ni Nyɔŋmɔ tsuji kɛ amɛhe afɔ enɔ kwraa. Ama enɛ nɔ mi yɛ maŋshiɛmɔ ni ji “Kpɔmɔ Kɛmiijɛ Je Lɛŋ Nɔnyɛɛ Shishi lɛ Ebɛŋkɛ” lɛ mli. Yɛ no sɛɛ lɛ, akɛ mlihilɛ baabi ni wɔpɛi wɔ diɛŋtsɛ wɔmli yɛ fã ni ji “Ani Abaabu Bo ákɛ Mɔ ni Sa Nyɔŋmɔ Maŋtsɛyeli Lɛ?” mli. Gbɛjianɔtoo lɛ baa naagbee kɛ ŋaawoo akɛ “Ná Hekɛnɔfɔɔ yɛ Yehowa Shiwoi lɛ Amli.”
5 Nɔ ni maa kpokpaa nɔ kpee fɛɛ kpokpaa nɔ kpee nɔ mi ji baptisimɔ wiemɔ lɛ. Mɔ fɛɛ mɔ ni miisumɔ ni abaptisi lɛ lɛ akɛɛ onukpai asɛinɔtalɔ lɛ amrɔ nɔŋŋ bɔni afee ni anyɛ ato gbɛjianɔi ni he hiaa lɛ.
6 Yɛ bei ni mli wa nɛɛ amli lɛ, Yehowa pɛ ji hekɛnɔfɔɔ kɛ shiŋŋfeemɔ jɛɛhe diɛŋtsɛ. (Lala 118:8, 9) Eba akɛ wɔ fɛɛ wɔbaawaje hekɛnɔfɔɔ ni wɔyɔɔ yɛ emli lɛ kɛtsɔ kpokpaa nɔ kpee he gbɛjianɔtoo muu lɛ fɛɛ shishi ni wɔbaaya lɛ nɔ.