“Ha Emɔ Mli”
1 Be ko beni Yesu kɛ ekaselɔi lɛ wieɔ gbalashihilɛ he lɛ, ewie yɛ oshijayeli he akɛ eji ‘nikeenii.’ Kɛkɛ ni ekɛɛ akɛ: “Mɔ ni aaanyɛ mli amɔ lɛ, ha emɔ mli.” (Mat. 19:10-12) Yɛ afii komɛi asɛɛ lɛ, bɔfo Paulo ŋmala sɛɛnamɔi ni yɔɔ oshijayeli he, ni ewo mɛi krokomɛi hewalɛ koni amɛkase enɔkwɛmɔnɔ lɛ ni amɛya nɔ amɛhi shi akɛ oshijafoi. (1 Kor. 7:7, 38) Ŋmɛnɛ lɛ, mɛi babaoo ‘miihi shi’ akɛ oshijafoi ni amɛmiiná he sɛɛ babaoo. Mɛni ji sɛɛnamɔi nɛɛ ateŋ ekomɛi?
2 Ní Aaasɔmɔ ‘ni Nɔ ko Gbalaaa Mɔ Jwɛŋmɔ’: Paulo nu shishi akɛ oshijayeli ha ená hegbɛ ni esɔmɔ Yehowa ‘ni nɔ ko gbalaaa ejwɛŋmɔ.’ Nakai nɔŋŋ ŋmɛnɛ lɛ, nyɛmi nuu ni eji oshijafonyo lɛ he baanyɛ asa kɛha Sɔɔmɔ Tsɔsemɔ Skul lɛ yaa, ni kɛ hoo lɛ, mɔ ni ji oshijafonyo lɛ yɛ heyeli babaoo bɔ ni ebaanyɛ etsɔ gbɛgbalɔ, ekase wiemɔ kroko, efã kɛya he ni hiamɔ lɛ da yɛ, esɔmɔ yɛ Betel, aloo ni ekɛ ehe aha kɛha sɔɔmɔ hegbɛi krokomɛi. Ekolɛ ebaanyɛ ni ená be kɛ hegbɛi babaoo ni ekɛ ehe awo teemɔŋ nikasemɔ kɛ sane nɔjwɛŋmɔ mli vii, ni ejɛ tsui kanyamɔ mli esɔle eha Yehowa. Bei pii lɛ, oshijafonyo náa be babaoo ni ekɛ ehe haa kɛha mɛi krokomɛi ayelikɛbuamɔ. Nɛkɛ nifeemɔi nɛɛ fɛɛ yeɔ ebuaa kɛha ‘mɔ diɛŋtsɛ hilɛ-kɛhamɔ.’—1 Kor. 7:32-35; Bɔf. 20:35.
3 Sɔɔmɔ ni tamɔ nɛkɛ ni nɔ ko gbalaaa mɔ jwɛŋmɔ ni akɛhaa Nyɔŋmɔ lɛ kɛ jɔɔmɔi babaoo baa. Beni nyɛmi yoo oshijafonyo ko kɛ afii 27 ehi Kenya sɛɛ lɛ, eŋma akɛ: “Miná nanemɛi babaoo, ni nitsumɔ yɛ jɛmɛ waa diɛŋtsɛ! Wɔfee nibii kutuu [ni] wɔsaraa wɔhe. . . . Minyɛ mikɛ heyeli ni anáa kɛjɛɔ oshijayeli mli akɛ aaanyɛ afã gbɛ kɛya he fɛɛ he lɛ tsu nii ni mikɛ be babaoo wo sɔɔmɔ nitsumɔ lɛ mli ni dekã bɛ mli kwraa, ni enɛ eha miná miishɛɛ waa.” Ekɛɛ kɛfata he akɛ: “Yɛ afii ni eho lɛ amli lɛ, wekukpaa ni kã mikɛ Yehowa teŋ lɛ mli ewa.”
4 Emli ni Aaamɔ: Yesu kɛɛ akɛ esa akɛ “ŋwɛi maŋtsɛyeli lɛ” afee yiŋtoo “hewɔ” ni aaatiu oshijayeli nikeenii lɛ sɛɛ lɛ. (Mat. 19:12) Taakɛ eji yɛ nikeenii fɛɛ nikeenii gbɛfaŋ lɛ, esa ákɛ akɛ oshija ni aji lɛ atsu nii jogbaŋŋ bɔni afee ni ekɛ jɔɔmɔ kɛ sɛɛnamɔi aba. Kɛtsɔ hegbɛi ni oshijayeli kɛbaa ní oshijafoi babaoo eŋɔ lɛ nɔ lɛ, kɛ agbɛnɛ kɛtsɔ Yehowa ni amɛkɛ amɛhiɛ fɔ̃ɔ enɔ kɛha nilee kɛ hewalɛ lɛ nɔ lɛ, amɛbanu sɛɛnamɔ ni yɔɔ oshijayeli nikeenii lɛ he lɛ shishi.