Yijiemɔ Woɔ Mɔ Hewalɛ
1 Gbekɛ yoo bibioo lɛ yikɔ beni be shɛ ni eyaawɔ lɛ ni ebi akɛ: “Ani mifeko gbekɛ kpakpa ŋmɛnɛ?” Nakai sanebimɔ lɛ ha enyɛ naa kpɛ ehe. Eyɛ mli akɛ eyɔse bɔ ni ebiyoo bibioo lɛ bɔ mɔdɛŋ koni eba ejeŋ bɔ ni sa yɛ nakai gbi lɛ mli moŋ, shi ewieee wiemɔ kome po ni ekɛjie eyi. Esa akɛ nakai gbekɛ yoo bibioo lɛ yaafonui lɛ akai wɔ akɛ yijiemɔ he miihia wɔteŋ mɔ fɛɛ mɔ—gbekɛbii kɛ onukpai. Ani wɔwoɔ mɛi ni wɔkɛshãraa lɛ hewalɛ kɛtsɔɔ amɛyi ni wɔjieɔ yɛ nibii kpakpai ni amɛfeɔ lɛ hewɔ lɛ nɔ?—Abɛi 25:11.
2 Nanemɛi Kristofoi haa wɔnáa yiŋtoi kpakpai babaoo ni wɔɔdamɔ nɔ wɔjie amɛyi. Onukpai, asafoŋ sɔɔlɔi, kɛ gbɛgbalɔi bɔɔ mɔdɛŋ jogbaŋŋ kɛtsuɔ amɛgbɛnaa nii ahe nii. (1 Tim. 4:10; 5:17) Fɔlɔi ni sheɔ Nyɔŋmɔ gbeyei bɔɔ mɔdɛŋ fɛɛ ni amɛaanyɛ ni amɛtsɔseɔ amɛbii yɛ Yehowa gbɛ̀i anɔ. (Efe. 6:4) Kristofoi oblahii kɛ oblayei bɔɔ mɔdɛŋ jogbaŋŋ kɛkpeeɔ “je nɛŋ mumɔ lɛ” naa. (1 Kor. 2:12; Efe. 2:1-3) Mɛi krokomɛi sɔmɔɔ Yehowa yɛ anɔkwayeli mli yɛ amɛ afii ni miiya hiɛ, gbɔmɔtsoŋ hewalɛnamɔ he naagbai, loo kaai krokomɛi ni amɛkɛkpeɔ lɛ fɛɛ sɛɛ. (2 Kor. 12:7) Nɛkɛ mɛi nɛɛ fɛɛ sa yijiemɔ. Ani wɔnaa amɛ mɔdɛŋbɔi ni sa yijiemɔ lɛ?
3 Ha Ekɔ Mɔ Aŋkro kɛ Nɔ ko Pɔtɛɛ He: Yɛ anɔkwale mli lɛ, wɔ fɛɛ wɔmii shɛɔ wɔhe kɛji wɔnu yijiemɔi ahe kɛjɛ wiemɔ kpoku lɛ nɔ. Kɛlɛ, yijiemɔ bafeɔ nɔ ni haa mɔ tsui nyɔɔ emli fe fɛɛ kɛji akɛ wɔ tuuntu ji mɛi ni akɛha. Ákɛ nɔkwɛmɔnɔ lɛ, yɛ wolo ni Paulo ŋma kɛyaha Romabii lɛ yitso 16 lɛ mli lɛ, ejie mɛi pɔtɛɛi komɛi tamɔ Foibe, Priska kɛ Akwila, Trifaina kɛ Trifosa, kɛ Persi, kɛ mɛi krokomɛi ni fata he lɛ ayi. (Rom. 16:1-4, 12) Kwɛ bɔ ni ewiemɔi lɛ baashɛje nakai anɔkwafoi lɛ amii aha! Yijiemɔ ni tamɔ nɛkɛ lɛ haa wɔnyɛmimɛi hii kɛ yei lɛ náa nɔmimaa akɛ amɛhe yɛ sɛɛnamɔ ni egbalaa wɔ kɛbɛŋkɛɔ wɔhe ni efeɔ wɔ ekome. Ákɛ aŋkro lɛ, ani ojie mɔ ko yi yɛ nɔ ko pɔtɛɛ ko he nyɛsɛɛ nɛɛ?—Efe. 4:29.
4 Nɔ ni Jɛ Tsui Mli: Kɛji akɛ yijiemɔ baafee nɔ ni woɔ mɔ hewalɛ lɛɛlɛŋ lɛ, esa akɛ efee nɔ ni jɛ tsui mli. Mɛi baanyɛ atsɔɔ kɛji akɛ wɔmiiwie kɛmiijɛ wɔtsui mli loo wɔwiemɔ lɛ ji ‘lilɛi dɔkɔmɔ’ kɛkɛ. (Abɛi 28:23) Be mli ni wɔtsɔseɔ wɔhe koni wɔyɔse nibii kpakpai ni yɔɔ mɛi krokomɛi amli lɛ, ebaakanya wɔtsui koni wɔjie amɛyi. Eba akɛ wɔɔjie mɛi ayi diɛŋtsɛ yɛ anɔkwayeli mli, akɛni wɔle akɛ “wiemɔ ni awie yɛ be ni sa mli lɛ ehĩ pam” lɛ hewɔ.—Abɛi 15:23.