Ŋwɛibɔfoi lɛ Miiye Amɛmiibua Wɔ
1 “Naa, mi lɛ mikɛ nyɛ yɛ daa kɛyashi jeŋ naagbee lɛ.” Kwɛ bɔ ni nakai wiemɔi lɛ woɔ mɛi fɛɛ ni feɔ toiboo amɛhaa Yesu fãmɔ akɛ: ‘No hewɔ lɛ nyɛyaa ni nyɛyafea mɛi mikaselɔi’ lɛ hewalɛ ha! (Mat. 28:18-20) Gbɛ kome ni sa kadimɔ waa ni Yesu tsɔɔ nɔ ekɛ anɔkwa Kristofoi hiɔ shi ji kɛtsɔ eŋwɛibɔfoi lɛ anɔ. (Mat. 13:36-43) Kwɛ miishɛɛ ni eji akɛ wɔɔfata mumɔŋ bɔɔ nii anɔkwafoi nɛɛ ahe kɛjaje “naanɔ sanekpakpa” lɛ wɔtsɔɔ!—Kpoj. 14:6, 7.
2 Yɛ Wɔsɔɔmɔ Nitsumɔ lɛ Mli: Biblia lɛ jieɔ lɛ kpo akɛ, ‘mɛi ni baatsɔmɔ yiwalaheremɔ lɛ yelɔi lɛ asɔɔmɔ hewɔ atsuɔ’ ŋwɛibɔfoi lɛ. (Heb. 1:14) Yɛ klɛŋklɛŋ afii 100 lɛ mli lɛ, ŋwɛibɔfoi lɛ fata he kɛkudɔ Yesu sɛɛnyiɛlɔi lɛ kɛtee mɛi ni sa lɛ aŋɔɔ. (Bɔf. 8:26) Ŋmɛnɛ, Nyɔŋmɔ tsuji miiya nɔ amɛmiina ŋwɛibɔfoi akudɔmɔ he odaseyeli. Bei pii lɛ, shiatsɛmɛi komɛi kɛɔ akɛ, beni amɛsɔleɔ kɛha yelikɛbuamɔ mli ni Odasefonyo ko batswa amɛshinaa lɛ. Kwɛ bɔ ni wɔ kɛ ŋwɛibɔfoi lɛ fɛɛ amii shɛɔ wɔhe kɛji mɛi ni tamɔ nɛkɛ lɛ kpɛlɛ Maŋtsɛyeli shɛɛ sane lɛ nɔ!—Luka 15:10.
3 Beni Wɔkɛ Shitee Kɛwoo Miikpe: Daniel, enanemɛi Hebribii oblahii etɛ lɛ, bɔfo Petro, kɛ mɛi krokomɛi babaoo ni kɛ shitee-kɛwoo kpe lɛ ná Yehowa hebuu kɛtsɔ ŋwɛibɔfoi “hewalɔi ekãalɔi” anɔ. (Lala 103:20; Dan. 3:28; 6:22, 23; Bɔf. 12:11) Eyɛ mli akɛ bei komɛi lɛ, ekolɛ wɔbaanu he akɛ wɔbɛ yelikɛbuamɔ ko yɛ be mli ni wɔkɛ shitee kɛwoo kpeɔ lɛ moŋ, shi wɔbaanyɛ wɔná ekãawoo kɛjɛ Elisha tsulɔ lɛ niiashikpamɔ lɛ mli beni ena akɛ “mɛi ni kɛ wɔ yɔɔ lɛ fa fe mɛi ni kɛ amɛ yɔɔ lɛ.” (2 Maŋ. 6:15-17) Kɛ́ akɛ nɔnyɛɛ gbála wɔ kɛ wɔnyɛmimɛi Kristofoi lɛ ateŋ po lɛ, esaaa akɛ wɔnijiaŋ jeɔ wui. Nyɔŋmɔ Wiemɔ lɛ maa nɔ mi ehaa wɔ akɛ: “Yehowa bɔfo lɛ bɔɔ nsara yɛ mɛi ni sheɔ lɛ gbeyei lɛ ahe kɛkpeɔ.”—Lala 34:8.
4 Etsɛŋ ni ŋwɛibɔfoi atai lɛ baajie mɛi fɛɛ ni teɔ shi amɛwoɔ Kristo maŋtsɛyeli lɛ kɛya. (Kpoj. 19:11, 14, 15) Be mli ni wɔmɛɔ nakai gbi lɛ, eba akɛ wɔkɛ ekãa baaya nɔ wɔjie Yehowa yi, ni wɔná hekɛnɔfɔɔ kwraa yɛ sɛɛfimɔ ni wɔnáa kɛjɛɔ ŋwɛi tai ni yɔɔ Kristo kudɔmɔ shishi lɛ aŋɔɔ lɛ mli.—1 Pet. 3:22.