Sanebimɔ He

◼ Mɛɛ gbɛ nɔ mɔ aŋkro ko baatsɔ koni enine ashɛ Buu-Mɔɔ kɛ Awake! lɛ ekomɛi anɔ?

Akɛni afii fioo komɛi ni eho nɛ ni akpa gbɛjianɔtoo ni akɛshɛɔ Buu-Mɔɔ kɛ Awake! woji tɛtrɛbii lɛ kɛ nɔ ni yɔɔ kasɛt nɔ lɛ kɛ nitsumɔ hewɔ lɛ, esa akɛ shiɛlɔi fɛɛ ahé amɛ woji tɛtrɛbii kɛ kasɛtii lɛ yɛ asafoi ni amɛyɔɔ mli lɛ amli. Nɔ ni fataaa he pɛ ji woji tɛtrɛbii ni akɛ shwilafoi aniŋmaa ni ji Braille ekala lɛ, ni akɛmajeɔ mɛi ni he basaa kɛhaa nomɛi, ni jarayeli yiŋtoo ko bɛ sɛɛ lɛ. Ofainɛ kadimɔ akɛ asafoi baanyɛ amɛkɛ Congregation Requests (M-202) wolo lɛ ashɛ woji tɛtrɛbii ni akɛwo kasɛt nɔ lɛ eko. Esa ákɛ akɛ nɛkɛ wolo nɛɛ nɔŋŋ ashɛ maŋsɛɛ-wiemɔ woji, kɛ woji ni akɛ niŋmaa wuji ekala lɛ eko.

Kɛ́ mɔ ko ni yɔɔ oshikpɔŋkuku lɛ mli lɛ bi ni abaha lɛ woji tɛtrɛbii lɛ eko daa lɛ, ofainɛ bɔɔ mɔdɛŋ ni otsu he nii amrɔ nɔŋŋ koni enine ashɛ eko fɛɛ eko nɔ. Mɛi ni ashwie amɛ kɛjɛ asafo lɛ mli lɛ baanyɛ ahé woji tɛtrɛbii loo woji wuji krokomɛi lɛ eko kɛha amɛ diɛŋtsɛ amɛhe yɛ okpɔlɔ ni aheɔ woji tɛtrɛbii kɛ woji wuji yɛ nɔ, yɛ Maŋtsɛyeli Asa lɛ nɔ. Esaaa ákɛ akɛ mɛi ni ashwie amɛ kɛjɛ asafo lɛ mli lɛ fataa aŋkroaŋkroi ni ahaa amɛ woji tɛtrɛbii lɛ daa lɛ ahe.

Woji pɛ ni ashɛɔ ahaa mɔ ko, ni asafoŋ shiɛlɔ ko nyɛŋ atsu he nii kɛtsɔ ya ni akɛbaaya ayaha nakai mɔ lɛ daa lɛ pɛ ji nɔ ni Ghana nitsumɔhe nine lɛ kɛbaafɔ̃ amɛwoji ahiɛ. Kɛ́ Asafoŋ Sɔɔmɔ Ajinafoi Akuu lɛ kɛ gbɛbimɔ kɛha woji tɛtrɛbii ashɛɛ he wolo miimaje kɛha mɔ ko ni ekolɛ enine nyɛŋ ashɛ woji lɛ anɔ lɛ, esa akɛ woloŋmalɔ lɛ aŋma saji fioo ko yɛ wolo nɔ ni ekɛfata he ni ekɛtsɔɔ mli akɛ, akwɛ nɛkɛ gbɛbimɔ kɛha woji tɛtrɛbii ashɛɛ he wolo nɛɛ mli jogbaŋŋ, ni akɛ Asafoŋ Sɔɔmɔ Ajinafoi Akuu lɛ ekpɛlɛ nɔ.

Enɛ tsɔɔ akɛ, esaaa akɛ shiɛlɔi ŋmaa kɛyaa nitsumɔhe nine lɛ koni akɛ woji tɛtrɛbii lɛ amaje aŋkroaŋkroi. Abaaku sɛɛ akɛ gbɛbimɔ kɛha woji tɛtrɛbii ashɛɛ fɛɛ ni tamɔ enɛ, ni shiɛlɔi loo mɛi ni yɔɔ wiemɔ lɛ he miishɛɛ aabi lɛ amaje asafo lɛ ekoŋŋ.

◼ Te gboklɛfonyo ko baafee tɛŋŋ koni enine ashɛ lɛ diɛŋtsɛ ewoji tɛtrɛbii anɔ?

Kɛ asafo ni kwɛɔ shiɛmɔ nitsumɔ lɛ nɔ yɛ tsuŋwoohe ko lɛ baanyɛ aha gboklɛfoi ni yɔɔ jɛmɛ lɛ woji tɛtrɛbii lɛ, belɛ esa akɛ gboklɛfonyo lɛ nine ashɛ lɛ diɛŋtsɛ ewoji tɛtrɛbii ni ji Buu-Mɔɔ kɛ Awake! lɛ anɔ kɛtsɔ shiɛlɔi ni basaraa lɛ lɛ nɔ. Kɛji akɛ enɛ feemɔ ehiii lɛ, gboklɛfonyo lɛ diɛŋtsɛ baanyɛ aŋma kɛya nitsumɔhe nine lɛ koni amaje lɛ eko. Ofainɛ ni okadi akɛ gboklɛfoi ni ashwie amɛ kɛjɛ asafo lɛ mli lɛ anine baanyɛ ashɛ amɛ diɛŋtsɛ amɛ woji tɛtrɛbii lɛ anɔ taakɛ atsɔɔ mli yɛ kuku nɛɛ mli lɛ.