Woji Tɛtrɛbii Ashɛɛ Ekoŋŋ ni Aha Efee Mlɛo lɛ He Nitsumɔ

Mɛi ni shɛɔ Buu-Mɔɔ kɛ Awake! lɛ ákɛ woji tɛtrɛbii ni akala loo yɛ kasɛtii anɔ lɛ anine eshɛ adafitswai enyɔ ni aŋma nɔ ní tsɔɔ akɛ amɛnii ni amɛshɛɔ lɛ miiba naagbee. Klɛŋklɛŋ nɔ̃ ni tsɔɔ wolo ni akalaa lɛ hiɛ lɛ ji “Expiring Subscription” (Wolo-shɛɛ ni Sɛɛ Miifo) he wolo ni kadimɔ nibii ni kɔmpiuta ji nɔ ni akɛyɔseɔ yɔɔ nɔ, ní akɛtsɔɔ asafo lɛ nɔ akɛhaa mɛi ni shɛɔ lɛ. Ato wolo nɛɛ he gbɛjianɔ ekoŋŋ, ni amrɔ nɛɛ abaakala yɛ wolo ni baa tamɔ eyɛŋ nɔ. Akɛ kadimɔ nii lɛ tsuɔ nii koni akɛ kɔmpiuta gbɛjianɔtoo atsu nii ni ashɛɔ ekoŋŋ lɛ he nii mramra. Enɛ ji wolo ni ajieɔ yi kɛhaa nii ni ashɛɔ ekoŋŋ lɛ.

Adafitswaa ni ji enyɔ lɛ ji nii ni ashɛɔ ekoŋŋ lɛ he wolo lɛ ni akɛwoɔ wolo tɛtrɛɛ ni ahà he lɛ mli, loo kɛha kasɛtii ni ashɛɔ ni akɛmajeɔ mɔ ni shɛ lɛ diɛŋtsɛ tɛ̃ɛ. Akɛ wolo-shɛɛ ekoŋŋ he wolo woŋ wolo tɛtrɛɛ lɛ mli dɔŋŋ ahaŋ mɛi ni shɛɔ woji tɛtrɛbii lɛ. Yɛ no najiaŋ lɛ, abaakala wolo-shɛɛ ni sɛɛ foɔ lɛ he shɛɛ ni akɛmajeɔ awo wolo ni ashɛ lɛ nɔhaanɔ lɛ nɔ. Yɛ nakai gbɛ nɔŋŋ nɔ lɛ, mɛi ni shɛɔ emli nɔ ni ji Blɔfo Buu-Mɔɔ loo Awake! ni yɔɔ kasɛt nɔ lɛ ateŋ mɛi babaoo yɛ ni akɛ nii ni ashɛɔ ni sɛɛ miifo lɛ he adafitswaa lɛ woŋ wolo ni aŋmaa amɛ lɛ mli dɔŋŋ ahaŋ amɛ. Abaakala kasɛt-shɛɛ ni sɛɛ miifo lɛ he adafitswaa ni akɛmajeɔ lɛ yɛ kotoku ni kasɛt ni ashɛɔ lɛ yɔɔ mli lɛ moŋ nɔ. Shi kɛlɛ, abaaya nɔ akɛ wolo-shɛɛ ni sɛɛ miifo lɛ he adafitswaa amaje mɛi ni shɛɔ ní amɛnine shɛɔ kadimɔ nibii ni tsɔɔ Shwilafoi anɔ̃ nɔ kɛ mɛi krokomɛi ni nine shɛɔ kasɛtii anɔ ákɛ nɔ ni akɛmiike shwilafoi lɛ.

Shɛɛ ni akalaa awoɔ wolo tɛtrɛɛ lɛ nɔhaanɔ loo kasɛt lɛ kotoku lɛ nɔ lɛ baatsu nii akɛ nɔ ko ni kaiɔ mɛi lɛ akɛ etsɛŋ ni nii ni amɛshɛɔ lɛ baaba naagbee. Kɛ ona shɛɛ ni akala ní onine shɛko nii ni ashɛɔ ekoŋŋ lɛ he adafitswaa ni akalaa kɛtsɔɔ hiɛ lɛ nɔ lolo lɛ, ofainɛ ni oyana nyɛmi nuu ni tsuɔ wolo-shɛɛ saji ahe nii yɛ asafo ni oyɔɔ mli lɛ mli lɛ. Esa akɛ akɛ nii ni ashɛɔ ekoŋŋ lɛ he woji lɛ atsɔ asafo lɛ nɔ daa akɛmaje.

Yɛ woji tɛtrɛbii ni maŋbii shɛɔ lɛ gbɛfaŋ lɛ, Wolo-shɛɛ ni Sɛɛ Miifo he wolo ni akalaa kɛtsɔɔ hiɛ ni akɛhaa yɛ asafo lɛ mli lɛ ji nɔ̃ diɛŋtsɛ ni abaatsɔ nɔ akɛtswa adafi. Kɛ nɛkɛ woji nɛɛ bashɛ asafo lɛ mli nɔŋŋ pɛ lɛ, esa akɛ abɔ mɔdɛŋ jogbaŋŋ ni akɛha shiɛlɔi diɛŋtsɛ ni ha mɛi lɛ shɛ nii lɛ. Akɛni akɛ eshɛɛ ekoŋŋ lɛ he wolo woŋ wolo tɛtrɛɛ lɛ mli ahaŋ mɛi ni shɛ lɛ dɔŋŋ hewɔ lɛ, ehe miihia koni wɔya mɛi ni yɔɔ he miishɛɛ nɛɛ aŋɔɔ amrɔ nɔŋŋ ni wɔwo amɛ hewalɛ ni amɛshɛ ekoŋŋ.—Kwɛmɔ Wɔ Maŋtsɛyeli Sɔɔmɔ ni je kpo yɛ November 1988 lɛ baafa 8, kɛ January 1986 lɛ baafa 8.

Nɛkɛ woji ni yɔɔ ebe naa nɛɛ baaya nɔ akpɛ́ mumɔŋ la yɛ jeŋ ni ewo duŋ lɛ mli. Wɔyɛ nɔmimaa akɛ, wɔ fɛɛ wɔkɛ gbɛjianɔtoo hee nɛɛ baatsu nii koni mɛi fɛɛ ni shɛɔ Buu-Mɔɔ kɛ Awake! lɛ nine ashɛ emli eko fɛɛ eko nɔ.