‘Nyɛkɛ Hemɔkɛyeli Wiemɔ lɛ Alɛa Nyɛhe’
1 Shihilɛ ni Nyɔŋmɔ jamɔ hetuu-kɛ-hamɔ yɔɔ mli lɛ sɛɛtiumɔ biɔ mɔdɛŋbɔɔ babaoo. (1 Tim. 4:7-10) Kɛ́ wɔhi shi yɛ gbɛ ni tamɔ nɛkɛ nɔ yɛ wɔ diɛŋtsɛ wɔhewalɛ naa lɛ, etsɛŋ ni ebaatɔ wɔ ni wɔnane baatɔ̃tɔ̃. (Yes. 40:29-31) Gbɛ kome ni wɔɔtsɔ nɔ wɔná hewalɛ kɛjɛ Yehowa ŋɔɔ ji ní ‘wɔkɛ hemɔkɛyeli wiemɔi lɛ alɛ wɔhe.’—1 Tim. 4:6.
2 Mumɔŋ Niyenii Kpakpa: Yehowa kɛ mumɔŋ niyenii kpakpa haa kɛtsɔ e-Wiemɔ lɛ kɛ “tsulɔ anɔkwafo kɛ nilelɔ” lɛ nɔ. (Mat. 24:45) Ani wɔmiitsu wɔgbɛfaŋnɔ koni wɔná he sɛɛ? Ani wɔkaneɔ Biblia lɛ daa gbi? Ani wɔto be kɛha teemɔŋ nikasemɔ kɛ sane nɔjwɛŋmɔ? (Lala 1:2, 3) Mumɔŋ niyenii ni hewalɛ yɔɔ mli tamɔ nɛkɛ lɛ woɔ wɔ hewalɛ, ni ebuɔ wɔhe kɛjɛɔ Satan je lɛ mli nibii ni gbɔjɔɔ mɔ lɛ ahe. (1 Yoh. 5:19) Kɛji akɛ wɔkɛ nibii ni he tse wo wɔjwɛŋmɔ mli ni wɔkɛtsu nii yɛ wɔshihilɛ mli lɛ, Yehowa kɛ wɔ baahi shi.—Fil. 4:8, 9.
3 Wɔnaa hewalɛwoo kɛjɛɔ Yehowa dɛŋ yɛ asafoŋ kpeei hu ashishi. (Heb. 10:24, 25) Mumɔŋ tsɔsemɔ kɛ naanyobɔɔ ni tswaa mɔ emaa shi ni yɔɔ henaabuamɔi ni tamɔ nɛkɛ shishi lɛ woɔ wɔ hewalɛ koni wɔdamɔ shi shiŋŋ yɛ kaai anaa. (1 Pet. 5:9, 10) Kristofonyo oblayoo ko wie akɛ: “Miyaa skul gbi muu fɛɛ, ni ehaa etɔɔ mi waa. Shi kpeeyaa bafeɔ tamɔ hejɔɔmɔhe ko yɛ ŋa kpataa nɔ, he ni mináa hejɔɔmɔ yɛ koni manyɛ maya skul enɔ jetsɛremɔ.” Kwɛ bɔ ni ajɔɔ wɔ yɛ mɔdɛŋ ni wɔbɔɔ koni wɔya kpeei lɛ!
4 Anɔkwale lɛ ni Wɔɔshiɛ: Yesu bu shiɛmɔ ni eeeshiɛ eha mɛi krokomɛi lɛ tamɔ niyenii. Nakai feemɔ wo lɛ hewalɛ. (Yoh. 4:32-34) Nakai nɔŋŋ hu kɛji akɛ wɔkɛ mɛi krokomɛi gba Nyɔŋmɔ shiwoi ni yɔɔ naakpɛɛ lɛ ahe sane lɛ, wɔnuɔ he akɛ wɔná hewalɛ ekoŋŋ. Wɔhe ni wɔkɛaawo sɔɔmɔ nitsumɔ lɛ mli be fɛɛ be lɛ haa wɔtsui kɛ wɔjwɛŋmɔ hiɔ Maŋtsɛyeli lɛ kɛ jɔɔmɔi ni etsɛŋ ni ekɛbaaba lɛ anɔ. No haa wɔtsui nyɔɔ wɔmli diɛŋtsɛ.—Mat. 11:28-30.
5 Kwɛ hegbɛ kpele ni eji akɛ wɔɔná mumɔŋ niyenii kpakpa ni Yehowa kɛhaa ewebii ŋmɛnɛ lɛ he sɛɛ! Eba akɛ wɔbaaya nɔ wɔkɛ tsuijurɔ alá kɛjie eyi.—Yes. 65:13, 14.