‘Asaa Wɔ Pɛpɛɛpɛ Kɛha Nitsumɔ Kpakpa Fɛɛ Nitsumɔ Kpakpa’
1 Akɛ mumɔŋ niyenii kpakpai babaoo ejɔɔ Yehowa webii ŋmɛnɛ. (Yes. 25:6) Ŋmalɛ mli saji babaoo yɛ ni wɔbaanyɛ wɔná mli ŋɔɔmɔ kɛtsɔ teemɔŋ nikasemɔ kɛ weku nikasemɔ nɔ, kɛ asafoŋ kpeei, kpeei bibii, kɛ kpeei wuji anɔ. Shi ani wɔkɛ enɛɛmɛi fɛɛ miitsu nii kɛmiimɔ shi, kɛ susumɔ akɛ ní ‘asaa wɔ pɛpɛɛpɛ kɛha nitsumɔ kpakpa fɛɛ nitsumɔ kpakpa’?—2 Tim. 3:17.
2 Bo lɛ susumɔ mumɔŋ niyenii ni yɔɔ kɛha afi 1998 afi lɛ ni aja mli momo lɛ he okwɛ! Kɛtsɔ daa otsi asafoŋ kpeei anɔ lɛ, wɔmiikase saji otii ni yɔɔ Kristofoi a-Hela Ŋmalɛi lɛ amli woji 23 lɛ ekomɛi, wɔmiiti saji ni anaa yɛ Insight on the Scriptures ni kɔɔ Biblia mli gbɔmɛi 49 lɛ ashihilɛi ahe, ni wɔmiisusu Proclaimers wolo lɛ mli baafai 138 lɛ he. Wɔmiisusu Nilee wolo lɛ etɛ mlijaa ekome, kɛ́ hoo lɛ, Weku Miishɛɛ wolo lɛ fɛɛ, kɛ God’s Word wolo muu lɛ fɛɛ loo “o-Maŋtsɛyeli lɛ Aba” wolo muu lɛ fɛɛ hu he. Kɛfata he lɛ, akɛ Wɔ Maŋtsɛyeli Sɔɔmɔ woji sɔrɔtoi 12, kɛ Buu-Mɔɔ woji sɔrɔtoi 52 lɛ mli saji lɛ lɛɔ wɔ, kɛ maŋshiɛmɔi babaoo ni wieɔ Biblia mli saji sɔrɔtoi lɛ ahe lɛ. Kpeei wuji kɛ kpeei bibii amli nifeemɔi kpakpai lɛ fata enɛɛmɛi fɛɛ ahe. Mɛɛ mumɔŋ nibii kpakpai babaoo po yɔɔ kɛha wɔ nɛkɛ!
3 Ná Hiɛsɔɔ Oha Nibii ni Yehowa Kɛhaa Lɛ: Bɔni afee ni wɔná hesɛɛ kɛmɔ shi lɛ, ehe miihia ni wɔnu nɔ hewɔ ni Yehowa kɛ nɛkɛ mumɔŋ nibii babaoo nɛɛ haa lɛ shishi. Nɛkɛ nibii kpakpai ni wɔyeɔ nɛɛ tswaa wɔhemɔkɛyeli lɛ emaa shi ni ewajeɔ wɔkɛ Yehowa teŋ wekukpaa lɛ. (1 Tim. 4:6) Shi kɛlɛ, akɛ mumɔŋ niyenii haaa wɔ kɛha wɔ tsɔsemɔ kɛkɛ. Etsirɛɔ wɔ koni wɔgba anɔkwale lɛ he sane wɔtsɔɔ mɛi krokomɛi, ni esaa wɔ koni wɔfee nakai akɛ sanekpakpa lɛ he sɔɔlɔi ni yɔɔ ekãa.—2 Tim. 4:5.
4 Nyɛkahaa wɔkua wɔhiɛ wɔshwiea wɔmumɔŋ hiamɔ nibii anɔ, shi moŋ nyɛhaa wɔnaa shwelɛ wɔhaa mumɔŋ nibii kpakpai ni haa mɔ tsui nyɔɔ emli ni jɛɔ Yehowa okpɔlɔ lɛ nɔ lɛ. (Mat. 5:3; 1 Pet. 2:2) Kɛ wɔɔná he sɛɛ kɛmɔ shi lɛ, no lɛ ebiɔ ni wɔto be ni fa wɔfɔ̃ shi kɛha saji ni he hiaa tamɔ daa teemɔŋ kɛ weku Biblia mli nikasemɔ kɛ kpeeiyaa nɛkɛ. (Efe. 5:15, 16) Nyɔmɔwoi ni miishɛɛ yɔɔ mli ni baa kɛjɛɔ enɛ feemɔ mli lɛ kɛ mumɔ naa ekãawoo ni Paulo ŋma kɛyaha Hebri Kristofoi anɔkwafoi lɛ, taakɛ aŋma yɛ Hebribii 13:20, 21 lɛ kpãa gbee.