Wolo Ni Jɛ Nɔyeli Kuu Lɛ Dɛŋ

“DUROMƆ kɛ hejɔlɛ ni jɛ wɔtsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ aha nyɛ!” Enɛ ji ŋamɔ ni Paulo kɛtsu nii yɛ ewoji lɛ ateŋ babaoo ni eŋmala kɛyaha asafoi lɛ amli. Nɛkɛ ŋamɔ nɛɛ nɔŋŋ wɔsumɔɔ ni wɔkɛha nyɛ fɛɛ.—Efe. 1:2.

Wɔhiɛ sɔɔ duromɔ loo mɔbɔnalɛ ni Yehowa jie lɛ kpo kɛtsɔ Kristo Yesu kpɔmɔ afɔleshaa lɛ nɔ lɛ waa diɛŋtsɛ! Kɛtsɔ kpɔmɔnɔ lɛ nɔ lɛ, wɔnáa shidaamɔ kpakpa yɛ Nyɔŋmɔ hiɛ. Wɔnyɛŋ wɔná enɛ yɛ wɔ diɛŋtsɛ wɔhewalɛ naa kɔkɔɔkɔ, ekɔɔɔ he eko ekãa ni wɔkɛaabɔ mɔdɛŋ kɛkase Biblia lɛ, ní wɔkɛshiɛ sanekpakpa lɛ, loo ní wɔkɛtsu nitsumɔi kpakpai krokomɛi. Wɔhe eshai ni akɛkeɔ wɔ kɛ naanɔ wala ni wɔbaaná lɛ jeee nyɔmɔ ni awoɔ wɔ yɛ wɔmɔdɛŋbɔi lɛ ahewɔ, shi moŋ enɛɛmɛi ji nikeenii ni tsɔɔ mɔbɔnalɛ ni Yehowa tsɔɔ Yesu Kristo nɔ ejieɔ lɛ kpo etsɔɔ wɔ.—Rom. 11:6.

Paulo ŋma enanemɛi heyelilɔi lɛ akɛ: “Wɔwieɔ wɔtsɔɔ nyɛ . . . , ní nyɛkahé Nyɔŋmɔ duromɔ lɛ yakatswaa; ejaakɛ ekɛɛ akɛ: ‘Be ni sa mli miboo toi yɛ, ni walaheremɔ gbi nɔ hu miye mibuao yɛ.’ Naa, be ni sa jogbaŋŋ nɛ; naa, walaheremɔ gbi nɛ.” “Be ni sa” ko tsɔ Yerusalem hiɛkpatamɔ ni ba yɛ klɛŋklɛŋ afii 100 lɛ mli lɛ hiɛ. Ahere mɛi ní tsui ja ní amɛsumɔɔ Yehowa lɛ ayiwala yɛ mumɔŋ. Enɛ ha yɛ naagbee mli lɛ, abaa anɔkwafoi fɛɛ ni shi Yerusalem dani akpata maŋ lɛ hiɛ yɛ afi 70 Ŋ.B. lɛ ayi.—2 Kor. 6:1, 2.

Ŋmɛnɛ hu lɛ, wɔyɛ “be ni sa” kɛ “walaheremɔ gbi” ko mli. Mɛi ni Yehowa kpɛlɛɔ amɛnɔ akɛ etsuji ní ahereɔ amɛyiwala yɛ mumɔŋ lɛ yɛ hiɛnɔkamɔ akɛ ebaabaa amɛyi yɛ “Yehowa gbi wulu lɛ” ni amrɔ nɛɛ ebɛŋkɛ kpaakpa lɛ mli.—Zef. 1:14.

Yehowa gbi ni baa lɛ kɛ sɔ̃ ni yɔɔ hiɛdɔɔ fɔ̃ɔ wɔnɔ. Esa akɛ wɔbɔ mɛi kɔkɔ yɛ he, ní wɔye wɔbua mɛi ni hiɛ tsui ni ja lɛ ni amɛná Yehowa mɔbɔnalɛ lɛ he sɛɛ koni kɛ́ aaahi lɛ ahere amɛ hu amɛyiwala. Paulo yɔse hiɛdɔɔ ni yɔɔ sɔ̃ nɛɛ he lɛ jogbaŋŋ diɛŋtsɛ. Eŋma akɛ: “Kɛji mijajeee sanekpakpa lɛ, kpóo ha mi!” Etsɔɔ bɔ ni enu he eha lɛ hu mli yɛ wiemɔi nɛɛ amli akɛ: ‘Mihiɛ nilelɔi kɛ mɛi ni leee nii fɛɛ nyɔmɔ. No hewɔ lɛ kɛ́ ka mikome mihewɔ lɛ miisumɔ akɛ, majaje sanekpakpa lɛ matsɔɔ.’—1 Kor. 9:16; Rom. 1: 14, 15.

Kɛ́ wɔtsuuu kɔkɔbɔɔ nitsumɔ ni he hiaa nɛɛ lɛ, Yehowa baabi wɔ he sane. Wɔle nɔ ni Yehowa kɛɛ gbalɔ Ezekiel lɛ akɛ: “Gbɔmɔ bi, mitoo bulɔ miha Israel we lɛ, no hewɔ lɛ bo midaaŋ wiemɔ lɛ toi, ní obɔ amɛ kɔkɔ oha mi. Kɛ́ mikɛɛ efɔŋfeelɔ akɛ: Gbó ooogbo! ni obɔɔɔ lɛ kɔkɔ, ni osaa owieee otsɔɔɔ efɔŋfeelɔ lɛ ní eje egbɛ fɔŋ lɛ nɔ, ní okɛhere eyiwala lɛ: nakai efɔŋfeelɔ lɛ aaagbo yɛ enishaianii lɛ ahewɔ; shi elá lɛ, odɛŋ mabi shi kɛaajɛ.”—Ezek. 3: 17, 18.

Naagbee gbii nɛɛ ji jaramɔ bei. Ewa akɛ aaatsu weku mli saji, heloonaa nitsumɔ, asafoŋ nitsumɔ kɛ shiɛmɔyaa fɛɛ he nii pɛpɛɛpɛ. Kɛfata he lɛ, nyɛteŋ mɛi pii miidamɔ hela, jwɛŋmɔ mli nɔnyɛɛ, gbɔlɛ, kɛ shitee-kɛwoo po naa. Nyɛteŋ mɛi pii lɛ, “nyɛjatsui fe nyɛ.” Wɔmiisumɔ ni wɔna mli wɔha nyɛ, taakɛ Yesu kɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ.” (Mat. 11:28) Wɔkɛ miishɛɛ miijwere nyɛ fɛɛ ní nyɛkɛ ekãa bɔɔ mɔdɛŋ akɛ nyɛbaaya nɔ nyɛsɔmɔ Yehowa yɛ anɔkwayeli mli yɛ naagbai wuji kɛ bibii ni nyɛkɛkpeɔ lɛ fɛɛ sɛɛ lɛ.

Yɛ shiɛmɔ kɛ nitsɔɔmɔ nitsumɔ lɛ ní nyɛkɛ ekãa tsuɔ kɛ Yehowa dɛŋ jɔɔmɔ hewɔ lɛ, kɛ́ aja mli lɛ, abaptisiɔ mɛi 4,762 yɛ jeŋ fɛɛ daa otsi. Yɛ sɔɔmɔ afi ni ho lɛ mli lɛ, atse asafoi heei 1,375. Eji wɔshwelɛ kɛ wɔsɔlemɔ akɛ wolo hee ni ji Mɛni Biblia lɛ Tsɔɔ Diɛŋtsɛ?, ni yɔɔ wiemɔi ni fa fe 120 mli momo lɛ baaye abua mɛi akpekpei abɔ koni amɛná Yehowa mɔbɔnalɛ kɛ toiŋjɔlɛ lɛ he sɛɛ yɛ “walaheremɔ gbi” nɛɛ mli.

Nyɛnáa nɔmimaa akɛ Nɔyeli Kuu lɛ sumɔɔ nyɛ ni wɔsɔleɔ wɔhaa nyɛ. Wɔmiida nyɛ shi hu yɛ sɔlemɔ ni nyɛsɔleɔ nyɛhaa wɔ lɛ hewɔ.

Nyɛnyɛmimɛi,

Yehowa Odasefoi a-Nɔyeli Kuu