Nyɛsɛɛ Afi Lɛ Mli Saji Otii
1 Biblia Shishitsɔɔmɔ: Kɛjɛ afi 1800 naagbee afii lɛ amli lɛ, Yehowa asafo lɛ hé Bibliai ni fa babaoo ni amɛjara amɛha mɛi ni yɔɔ wiemɔ lɛ he miishɛɛ lɛ, ni bei komɛi lɛ amɛtseɔ jara lɛ diɛŋtsɛ nɔ 100 mlijaa 35. Kɛjɛ afi 1926 kɛbaa lɛ, nyɛmimɛi lɛ bɔi Bibliai komɛi akalamɔ kɛ amɛsɛɛwoo yɛ amɛ diɛŋtsɛ amɛwoji akalamɔhe lɛ, ni nɔ ni fata Bibliai nɛɛ ahe ji The Emphatic Diaglott kɛ King James kɛ American Standard lɛ. Kɛkɛ ni yɛ afi 1961 lɛ, ajie New World Translation of the Holy Scriptures lɛ kpo kome lɛ kpo yɛ Blɔfo mli.
2 Ni yɛ wiemɔi krokomɛi amli hu? Yɛ afi 1900 afii lɛ shishijee mli lɛ, nitsumɔhe niji bɔi Bibliai ni atsɔɔ shishi ahémɔ kɛjɛ woji akalamɔ nitsumɔhei srɔtoi, ni amɛjara amɛha mɛi yɛ jara ni amɛkɛhé lɛ nɔŋŋ naa. Bibliai nɛɛ ateŋ ekomɛi ji nɔ ni wiemɔ shishitsɔɔlɔi ni yeɔ anɔkwa lɛ fee, ni amɛkɛ Nyɔŋmɔ gbɛi—Yehowa—lɛ po tsu nii yɛ maŋbii lɛ awiemɔ lɛ mli. Shi yɛ sɛɛ mli lɛ, wiemɔ shishitsɔɔlɔi babaoo jie Nyɔŋmɔ gbɛi lɛ kɛjɛ amɛwiemɔi ashishitsɔɔmɔi lɛ amli. Amrɔ nɛɛ amɛteŋ mɛi komɛi efee nɔ ni mli wa fe nɛkɛ po kɛtsɔ maŋ lɛŋ nyɔŋmɔ ko gbɛi ni amɛkɛye Nyɔŋmɔ gbɛi lɛ najiaŋ lɛ nɔ! Ákɛ nɔkwɛmɔnɔ lɛ, Chichewa Biblia ni ji Buku Loyera ni akɛtsuɔ nii yɛ Malawi, Mozambique kɛ Zambia lɛ tsɔɔ Tetragrammaton ni ji YHWH lɛ shishi akɛ “Chauta,” ni no ji nyɔŋmɔ ko ni maŋbii lɛ jáa lɛ lɛ gbɛi ni eshishi ji “Mɔ Kpeteŋkpele ni Hiɛ Gãi Lɛ.”
3 Tsakemɔi krokomɛi babaoo hu yɛ ni afee ni ejaaa. Ákɛ nɔkwɛmɔnɔ lɛ, Afrika Biblia shishitsɔɔmɔ ko tsĩɔ Luka tã akɛ wɔŋtsɛ. Tuvaluan Biblia lɛ fee nii kɛteke nɔ kwraa tsɔ beni etsɔɔ Yuda 23 shishi akɛ: “Ná suɔmɔ ni naa wa waa oha mɛi ni kɛ amɛhe feɔ yakayaka nii; kwɛmɔ jogbaŋŋ kɛkɛ koni amɛyakayaka nifeemɔ nii lɛ akaná onɔ hewalɛ.” Ni kɛlɛ, shishijee niŋmaai lɛ etsĩii mɛi ni kɛ amɛhe feɔ yakayaka nii lɛ atã, ni asaŋ etsĩii yakayaka nifeemɔ hu tã!
4 Be ko ni eho lɛ, Biblia shishitsɔɔmɔ kui ji mɛi titri ni feɔ Bibliai babaoo ni amɛjaraa amɛhaa mɛi. Shi yɛ nyɛsɛɛ afii nɛɛ amli lɛ, Biblia shishitsɔɔmɔ kui komɛi kɛ woji akalamɔ kɛ ejaramɔ he nitsumɔi ni amɛtsuɔ lɛ he hegbɛ ni amɛyɔɔ lɛ ewo Kristendom sɔlemɔi lɛ adɛŋ. Kɛfata Bibliai ajara ni sɔlemɔi ni yɔɔ maji komɛi anɔ lɛ ŋmɛɔ nɔ waa lɛ he lɛ, amɛsumɔɔɔ ni amɛhɔ̃ɔ amɛ-Bibliai lɛ amɛha mɛi ni ji Yehowa Odasefoi. Ákɛ nɔkwɛmɔnɔ lɛ, Protestant jamɔ ko ni yɔɔ Kyrgyzstan lɛ ji mɛi ni fee Kristofoi a-Hela Ŋmalɛi lɛ ní atsɔɔ shishi kɛba ŋmɛnɛŋmɛnɛ Kirghiz wiemɔ mli lɛ, ni ehe hegbɛ fɛɛ ji amɛnɔ̃. Kɛ nyɛmimɛi lɛ bɔ mɔdɛŋ akɛ amɛaahé eko lɛ, bei pii lɛ abiɔ amɛ akɛ, “Ani Yehowa Odasefoi ateŋ mɔ kome ji bo?” aloo “Ani ole Nyɔŋmɔ gbɛi?” Kɛ amɛha hetoo akɛ hɛɛ lɛ, ahɔ̃ɔɔ ahaaa amɛ.
5 Yɛ enɛɛmɛi kɛ nibii krokomɛi ahewɔ lɛ, Nɔyeli Kuu lɛ etsɔɔ akɛ esa akɛ agbala jwɛŋmɔ kɛya Biblia lɛ shishi ni abaatsɔɔ lɛ nɔ waa diɛŋtsɛ. Amrɔ nɛɛ, ayɛ New World Translation muu lɛ fɛɛ yɛ wiemɔi 35 mli ni ayɛ New World Translation of the Christian Greek Scriptures lɛ yɛ wiemɔi krokomɛi 20 hu mli. Amrɔ nɛɛ, Biblia shishitsɔɔmɔ kui srɔtoi 33 ni yɔɔ jeŋ fɛɛ lɛ ateŋ 19 miitsɔɔ Hebri Ŋmalɛi lɛ ashishi, emli 11 miitsɔɔ Kristofoi a-Hela Ŋmalɛi lɛ ashishi, ni emli 3 miitsɔɔ Reference Bible lɛ shishi. Bei pii lɛ, mɛi etɛ kɛmiishɛ mɛi ekpaa ji mɛi ni feɔ Biblia shishitsɔɔmɔ kuu kome. Akɛni akɛ kɔmpiuta kɛ nitsumɔ he gbɛjianɔtoi ni yaa hiɛ lɛ yeɔ buaa kɛtsɔɔ wiemɔi lɛ ashishi hewɔ lɛ, shishitsɔɔmɔ kui lɛ ekomɛi enyɛ amɛkɛ nɔ ni shɛɛɛ afii enyɔ egbe Christian Greek Scriptures lɛ shishitsɔɔmɔ naa.
6 Te nyɛmimɛi lɛ nuɔ he amɛhaa tɛŋŋ kɛ́ amɛnine shɛ New World Translation lɛ nɔ yɛ amɛ diɛŋtsɛ amɛwiemɔ mli? Taakɛ mɛi krokomɛi babaoo nuɔ he lɛ, gbɛgbalɔ ko ni yɔɔ Albania lɛ kɛ wiemɔi fioo ko tsɔɔ bɔ ni enu he eha. Ekɛɛ akɛ: “Mifó. Mikaneko Nyɔŋmɔ Wiemɔ lɛ ni minu he nɛkɛ pɛŋ. Miisumɔ ni mabo nɔ ni kuku fɛɛ kuku kɛɔ lɛ toi jogbaŋŋ!”