Bɔ ni Ooofee Otsu Mumɔŋ Otii ni Okɛmamɔ Ohiɛ lɛ Ahe Nii
1. Mɛɛ mumɔŋ otii Kristofoi oblahii kɛ oblayei babaoo kɛmamɔ amɛhiɛ?
1 Ákɛ Kristofonyo oblanyo loo oblayoo lɛ, ŋwanejee ko bɛ he akɛ suɔmɔ ni oyɔɔ kɛha Yehowa kɛ agbɛnɛ sane ni Yesu kɛɛ Kristofoi fɛɛ akɛ, ‘amɛtao maŋtsɛyeli lɛ tsutsu’ lɛ náa otii ni okɛmamɔɔ ohiɛ yɛ shihilɛ mli lɛ anɔ hewalɛ. (Mat. 6:33) Ekolɛ oti ni ma ohiɛ ji okɛ ohe baawo gbɛgbamɔ nitsumɔ lɛ mli kɛlɛɛ osɔɔmɔ lɛ mli loo ní oyasɔmɔ yɛ he ni Maŋtsɛyeli shiɛlɔi ahe hiaa waa yɛ lɛ. Ekolɛ mɛi krokomɛi hu baasumɔ ni amɛkɛ amɛhe aha kɛha Maŋtsɛyeli Asai kɛ Kpeei Asai ni amamɔɔ yɛ maji krokomɛi anɔ lɛ, amɛyasɔmɔ yɛ nitsumɔhe nine lɛ, loo ní amɛsɔmɔ akɛ gbɛgbalɔi krɛdɛɛ. Kwɛ otii ni hi jogbaŋŋ ní haa mɔ tsui nyɔɔ emli ní enɛɛmɛi ji!
2. Mɛni baanyɛ aye abua bo koni onyɛ otsu mumɔŋ otii ni okɛmamɔ ohiɛ lɛ ahe nii?
2 Kɛ́ oŋmala mumɔŋ otii ni okɛmamɔ ohiɛ lɛ oshwie shi lɛ, no baaye abua bo ní onyɛ otsu amɛhe nii. Buu-Mɔɔ ni je kpo yɛ July 15, afi 2004 lɛ tsɔɔ akɛ: “Kɛ́ [okɛ] wiemɔi tsɔɔ susumɔ folo ko mli lɛ, ehaa ebafeɔ faŋŋ ni shishinumɔ baa he. No hewɔ lɛ, [obaasumɔ] ni oŋmala otii ni okɛmamɔ ohiɛ kɛ gbɛ̀i anɔ ni obaatsɔ ni onine ashɛ nɔ lɛ oshwie shi.” Kɛfata he lɛ, otii ni heɔ be kukuoo ni okɛaamamɔ ohiɛ yɛ be kɛ beaŋ lɛ baanyɛ aye abua bo koni ona kɛji ooya ohiɛ yɛ oti ko heɔ be kakadaŋŋ ni okɛma ohiɛ lɛ he nitsumɔ mli, ni nomɛi baaye abua hu koni ojwɛŋmɔ ahi oti diɛŋtsɛ ni ma ohiɛ lɛ nɔ.
3. Tsĩi otii ni he nitsumɔ heee be kakadaŋŋ ni baanyɛ aye abua mɔ ko ni ehe asa kɛha baptisimɔ lɛ ekomɛi atã.
3 Otii ni He Nitsumɔ Heee Be Kakadaŋŋ: Kɛ́ abaptisiko bo lɛ, no lɛ susumɔ nibii komɛi ni ebaabi ni ofee bɔni afee ni onyɛ oshɛ nakai oti lɛ he. Ekolɛ ebaabi ni onu Biblia mli tsɔɔmɔi titrii lɛ ashishi jogbaŋŋ. Kɛ́ nakai ni lɛ, kɛfee oti ni ma ohiɛ akɛ obaakase Biblia lɛ Tsɔɔ wolo lɛ jogbaŋŋ ni okane ŋmalɛi fɛɛ ni atsɛ yisɛɛ lɛ. (1 Tim. 4:15) Okɛ oti kroko hu ama ohiɛ ákɛ obaakane Biblia muu lɛ fɛɛ kɛjɛ Mose Klɛŋklɛŋ Wolo lɛ kɛyashi Kpojiemɔ, taakɛ abiɔ ni Betelbii kɛ mɛi ni yaa Gilead skul lɛ afee lɛ. No sɛɛ lɛ yaa nɔ ní okane Biblia lɛ daa. (Lala 1:2, 3) Kwɛ bɔ ni enɛ feemɔ baaye abua bo ni oda yɛ mumɔŋ ohã! Kɛ́ obaakane Biblia lɛ, jɛɛ otsui mli osɔle dani oje shishi, ni kɛ́ ogbe naa hu sɔlemɔ, agbɛnɛ bɔɔ mɔdɛŋ ni okɛ nɔ ni okaseɔ lɛ atsu nii be fɛɛ be.—Yak. 1:25.
4. Mɛɛ otii ni he nitsumɔ heee be kakadaŋŋ Kristofonyo ní miisumɔ koni eyasɔmɔ yɛ Betel loo etsɔ gbɛgbalɔ krɛdɛɛ lɛ baanyɛ ekɛmamɔ ehiɛ bɔni afee ni enyɛ eshɛ nakai otii ni heɔ be kakadaŋŋ lɛ ahe?
4 Kɛ́ abaptisi bo momo lɛ, mɛɛ otii krokomɛi obaanyɛ okɛmamɔ ohiɛ? Ani ehe miihia ni oya ohiɛ yɛ gbɛ̀i anɔ ni otsɔɔ oshiɛɔ lɛ amli? Ákɛ nɔkwɛmɔnɔ lɛ, ani obaanyɛ okɛfee oti ni ma ohiɛ akɛ okɛ Nyɔŋmɔ Wiemɔ lɛ baatsu nii kɛ hesaa babaoo yɛ shiɛmɔ nitsumɔ lɛ mli? (2 Tim. 2:15) Te ooofee tɛŋŋ olɛɛ osɔɔmɔ nitsumɔ lɛ mli? Okɛ otii ni he nitsumɔ heee be kakadaŋŋ amamɔ ohiɛ yɛ afii abɔ ni oye kɛ bɔ ni oshihilɛ baaŋmɛ bo gbɛ aha lɛ naa, ni no baaye abua bo bɔni afee ni onyɛ otsu otii ni okɛmamɔ ohiɛ ni amɛhe nitsumɔ heɔ be kakadaŋŋ lɛ ahe nii.
5. Mɛɛ gbɛ nɔ otii ni he nitsumɔ heee be kakadaŋŋ ni akɛmamɔɔ hiɛ lɛ ye bua nyɛminuu ko ni enyɛ eshɛ oti ni ekɛma ehiɛ akɛ ebaaya eyasɔmɔ yɛ Betel lɛ he?
5 Miishɛɛ Sane: Beni Tony ye afii 19 lɛ, eyashara shi yɛ Yehowa Odasefoi anitsumɔhe nine ko, ni no ha eshwe akɛ eyasɔmɔ yɛ Betel. Shi no mli lɛ, ebaaa ejeŋ jogbaŋŋ, ni kɛfata he lɛ, ejɔko ehe nɔ hu ehako Nyɔŋmɔ. Tony kpɛ eyiŋ akɛ ebaahi shi yɛ Yehowa taomɔ nii lɛ anaa, ni ekɛfee oti ni ma ehiɛ hu akɛ ebaashɛ baptisimɔ he. Beni abaptisi lɛ sɛɛ lɛ, ekɛ ma ehiɛ akɛ ekɛ ehe baawo gbɛgbalɔi awamɔ nitsumɔ lɛ mli kɛ no sɛɛ lɛ, daa gbɛgbamɔ nitsumɔ lɛ mli, ni eŋmala be ni ebaasumɔ koni eje nitsumɔ nɛɛ shishi lɛ yɛ ekalanda lɛ nɔ. Bo lɛ susumɔ miishɛɛ ni ená beni ekɛ be saŋŋ étsu gbɛgbamɔ nitsumɔ lɛ, ní afɔ̃ lɛ nine koni ebasɔmɔ yɛ Betel lɛ he okwɛ!
6. Mɛni baaye abua bo koni onyɛ otsu mumɔŋ otii ni okɛmamɔ ohiɛ lɛ ahe nii?
6 Bo hu obaanyɛ otsu mumɔŋ otii ni okɛmamɔ ohiɛ lɛ ahe nii kɛji otee nɔ okɛ Maŋtsɛyeli lɛ he nibii ye klɛŋklɛŋ gbɛhe yɛ oshihilɛ mli. Tsĩi “onitsumɔi lɛ” atã otsɔɔ Yehowa yɛ sɔlemɔ mli, koni obɔ mɔdɛŋ ni otsu he nii.—Abɛi 16:3; 21:5.