Taomɔ Mɛi ni Sa Lɛ
1. Te wɔɔfee tɛŋŋ wɔtsɔɔ akɛ wɔhiɛ sɔɔ hegbɛ ni wɔná akɛ wɔshiɛ lɛ?
1 Beni Yesu tsuɔ eshiɛmɔ nitsumɔ lɛ, efee bɔ fɛɛ bɔ ni eeenyɛ ni eha mɛi ni he jɔ lɛ anine ashɛ sanekpakpa ni shɛjeɔ mɔ mii lɛ nɔ. (Yes. 61:1, 2) Ákɛ Kristo najiaŋdamɔlɔi kɛ esɛɛfilɔi lɛ, ŋmɛnɛ lɛ wɔ hu wɔná hegbɛ ni nɔ bɛ akɛ wɔɔkase Kristo kɛtsɔ mɛi ni sa lɛ ni wɔɔtao kɛmɔ shi yɛ wɔshikpɔŋkuku lɛ mli ni wɔfɔ̃ɔɔ lɛ nɔ.—Mat. 10:11; 2 Kor. 5:20.
2. Te Paulo tsake bɔ ni eshiɛɔ lɛ mli eha tɛŋŋ, ni mɛni jɛ mli kɛba?
2 Tsakemɔ Bɔ ni Oshiɛɔ lɛ Mli: Nɔ ni bɔfo Paulo fɔɔ feemɔ ji akɛ, eyaa kpeehe lɛ klɛŋklɛŋ ni eyashiɛɔ ehaa Yudafoi kɛ mɛi ni etsake kɛba Yuda jamɔ mli lɛ. (Bɔf. 14:1) Beni ekɛ Sila yɔɔ Filipi lɛ, amɛtee amɛyatao mɛi yɛ he ni amɛsusu akɛ “afɔɔ sɔlemɔ yɛ lɛ.” Amɛbɔi yei ni ebabua amɛhe naa lɛ odase yeli, ni yei lɛ ateŋ mɔ kome ni atsɛɔ lɛ Lidia lɛ mɔ anɔkwale lɛ mli oya nɔŋŋ.—Bɔf. 16:12-15.
3. Kɛfata shĩa kɛ shĩa shiɛmɔ nitsumɔ lɛ he lɛ, mɛɛ gbɛ̀i krokomɛi anɔ wɔbaanyɛ wɔtsɔ wɔshiɛ yɛ wɔshikpɔŋkuku lɛ mli?
3 Kɛfata oshĩa kɛ shĩa shiɛmɔ nitsumɔ lɛ he lɛ, ani obaanyɛ oshiɛ oha mɛi ni yɔɔ tsɔji amaamɔhei, shisharamɔhei, nitsumɔhei, gbɛjegbɛi ahe, jarayelihei kɛ shwapoi ni yɔɔ oshikpɔŋkuku lɛ mli lɛ? Ekolɛ obaanyɛ oye mɛi ni yɔɔ shĩai ni atara naa agbói kɛ shĩai ni bulɔi buɔ jɛmɛ lɛ odase kɛtsɔ woloŋmaa loo tɛlifoŋ tswaa nɔ. Kɛ́ okɛ hiɛshikamɔ tsu nii ni otsake gbɛ̀i ni otsɔɔ nɔ oshiɛɔ lɛ mli yɛ bɔ ni shikpɔŋkuku lɛ ji lɛ naa lɛ, obaanyɛ ‘oteke nɔ yɛ Nuŋtsɔ lɛ nitsumɔ lɛ mli.’—1 Kor. 15:58.
4. Kɛ́ wɔsafo lɛ shikpɔŋkuku lɛ edaaa lɛ, mɛni wɔbaanyɛ wɔfee?
4 Shiɛlɔi babaoo eshi amɛsafoi amli kɛtee asafoi krokomɛi ni yɔɔ amɛmaŋ loo maŋsɛɛ lɛ amli, ni enɛ eha amɛná hegbɛ kɛlɛ́ɛ amɛsɔɔmɔ nitsumɔ lɛ mli. Mɛi krokomɛi hu ekase wiemɔ kroko bɔni afee ni amɛnyɛ amɛshiɛ amɛha mɛi ni jɛ maji krokomɛi anɔ lɛ.
5. Te esa akɛ wɔna be ni wɔyɔɔ mli nɛɛ wɔha tɛŋŋ, ni mɛni esa akɛ efee wɔfaishitswaa?
5 Esa akɛ wɔ fɛɛ wɔkai akɛ “abɔɔ lɛ ji je nɛŋ.” (Mat. 9:37; 13:38) Akɛni nibii agbɛjianɔtoo fɔŋ nɛɛ naagbee lɛ ebɛŋkɛ kpaakpa hewɔ lɛ, esa akɛ mɔ fɛɛ mɔ kɛ hiɛdɔɔ asusu eshihilɛ, hesaai kɛ hegbɛi ni eyɔɔ, kɛ bɔ ni eeefee elɛɛ eshiɛmɔ nitsumɔ lɛ mli lɛ he. Yehowa woɔ wɔ shi akɛ kɛ́ wɔkɛ Maŋtsɛyeli lɛ he nibii ye klɛŋklɛŋ gbɛhe lɛ, ebaajɔɔ mɔdɛŋ ni wɔbɔɔ koni wɔlɛɛ wɔshiɛmɔ nitsumɔ lɛ mli lɛ nɔ.—Mat. 6:33.