Ani Miifee Babaoo?
1. Mɛɛ nibii komɛi baanyɛ aye anɔkwa Kristofonyo ko tsui?
1 Ani obi ohe nakai sane pɛŋ? Ekolɛ, gbɔlɛ, hela, loo oweku sɔ̃i ni efa lɛ eha ooye otsui akɛ onyɛɛɛ otsu babaoo yɛ sɔɔmɔ nitsumɔ lɛ mli. Nyɛmi yoo ko ni yɔɔ bii etɛ lɛ ŋma akɛ, ebe kɛ enyɛmɔ ni ekɛkwɛɔ eweku lɛ haaa enyɛ etsu bɔ ni etaoɔ etsu yɛ sɔɔmɔ nitsumɔ lɛ mli, ni bei komɛi lɛ enɛ gbaa enaa waa. Mɛni baaye abua wɔ ni wɔsusu saji ahe yɛ gbɛ ni ja nɔ?
2. Mɛni Yehowa kpaa gbɛ kɛjɛɔ wɔdɛŋ?
2 Nɔ ni Yehowa Kpaa Gbɛ Kɛjɛɔ Wɔdɛŋ: Ŋwanejee ko bɛ he akɛ, wɔ fɛɛ wɔmiisumɔ ni wɔtsu babaoo yɛ sɔɔmɔ nitsumɔ lɛ mli. Shi bei pii lɛ, srɔtofeemɔ agbo yɛ nɔ ni wɔbaasumɔ ni wɔfee kɛ nɔ ni yɛ anɔkwale mli wɔbaanyɛ wɔfee lɛ teŋ. Yɛ anɔkwale mli lɛ, bɔ ni wɔshweɔ akɛ wɔfee babaoo lɛ tsɔɔ akɛ nɔ ni wɔtsuɔ lɛ faaa kɛhaaa wɔ. Esa akɛ wɔkai akɛ Yehowa le nɔ ni wɔbaanyɛ wɔfee kɛ nɔ ni wɔnyɛŋ wɔfee, ni ebiii ni wɔfee babaoo fe bɔ ni wɔɔnyɛ. (Lala 103:13, 14) Mɛni ekpaa gbɛ kɛjɛɔ wɔdɛŋ? Eesumɔ ni wɔjɛ wɔsusuma muu fɛɛ mli wɔsɔmɔ lɛ, ni tsɔɔ akɛ wɔfee bɔ fɛɛ bɔ ni wɔɔnyɛ.—Kol. 3:23.
3. Mɛɛ gbɛ nɔ wɔɔtsɔ wɔpɛi nɔ ni wɔtsuɔ yɛ sɔɔmɔ nitsumɔ lɛ mli lɛ mli wɔkwɛ?
3 Mɛni baaye abua wɔ koni wɔna nɔ ni wɔbaanyɛ wɔtsu diɛŋtsɛ? Wɔbaanyɛ wɔbi Yehowa ni eha wɔna bɔ ni wɔshihilɛ lɛ ji diɛŋtsɛ. (Lala 26:2) Agbɛnɛ hu, wɔnaanyo Kristofonyo ko ni eda yɛ mumɔŋ ni wɔmuɔ wɔfɔ̃ɔ enɔ ni le wɔ jogbaŋŋ ni sheee gbeyei akɛ ebaatsɔɔ wɔ hei ni ehe miihia ni wɔya wɔhiɛ yɛ lɛ baanyɛ eye ebua wɔ ni wɔpɛi wɔmli. (Abɛi 27:9) Kaimɔ hu akɛ, akɛni shihilɛi tsakeɔ hewɔ lɛ, ehi jogbaŋŋ akɛ wɔɔpɛi wɔshihilɛi amli wɔkwɛ yɛ be kɛ beaŋ.—Efe. 5:10.
4. Te esa akɛ wɔbu Biblia mli kaimɔi ni akɛhaa wɔ yɛ sɔɔmɔ nitsumɔ lɛ he lɛ wɔha tɛŋŋ?
4 Bɔ ni Esa akɛ Wɔbu Kaimɔi Wɔha: Bei pii lɛ, kɛ́ aada foi lɛ, mɛi ni kwɛɔ foidamɔ lɛ woɔ foidalɔi lɛ hewalɛ. Nɔ hewɔ ni amɛfeɔ nakai lɛ ji ní amɛkɛye amɛbua foidalɔi lɛ koni amɛnyɛ amɛshɛ oti ni ma amɛhiɛ lɛ he, shi jeee ni amɛkɛje foidalɔi lɛ anijiaŋ wui. Nakai nɔŋŋ hu akɛ Biblia mli hewalɛwoo wiemɔi kɛ kaimɔi ni wɔnine shɛɔ nɔ yɛ wɔkpeei ashishi kɛ wɔwoji lɛ amli akɛ ‘wɔkã he wɔshiɛ wiemɔ lɛ’ haa wɔ koni akɛwo wɔ hewalɛ, shi jeee ni akɛkɛɛ wɔ akɛ wɔbɔɔɔ mɔdɛŋ. (2 Tim. 4:2) Wɔbaanyɛ wɔná nɔmimaa akɛ, kɛ́ yɛ anɔkwale mli lɛ wɔmiibɔ mɔdɛŋ wɔfee bɔ fɛɛ bɔ ni wɔɔnyɛ lɛ, no lɛ Yehowa baakai ‘wɔsuɔmɔ kɛ wɔnitsumɔi’ lɛ, ni ehiɛ baasɔ jogbaŋŋ.—Heb. 6:10.