Ani Okɛ Nɔ ni Aŋma yɛ Esɛɛgbɛ lɛ Etsu Nii Pɛŋ?

Bei pii lɛ, kɛ́ mɛi anine shɛ woji tɛtrɛbii lɛ eko nɔ lɛ, amɛkwɛɔ nɔ ni aŋma yɛ hiɛ lɛ, kɛkɛ lɛ amɛtsɔ esɛɛ amɛkwɛ nɔ ni yɔɔ jɛmɛ shwiaa. Sanebimɔi kɛ saji srɔtoi ni teɔ mɔ miishɛɛ shi yɛ Buu-Mɔɔ ni ji maŋbii anɔ̃ lɛ sɛɛgbɛ, ni atsɔɔ baafai ni obaana enɛɛmɛi ahe saji hu yɛ jɛmɛ.

Wɔbaanyɛ wɔkɛ enɛ atsu nii ni wɔkɛle sanebimɔi ni sa jogbaŋŋ ni wɔbaanyɛ wɔkɛje sanegbaa shishi. Kɛ́ wɔfɔɔ shikpɔŋkuku lɛ mli nitsumɔ lɛ, wɔbaanyɛ wɔtsake wɔshiɛmɔ wiemɔ lɛ mli kɛtsɔ sanebimɔi srɔtoi ni wɔkɛaatsu nii yɛ nyɔɔŋ muu lɛ fɛɛ mli lɛ nɔ. Kɛ́ shĩatsɛ lɛ bɛ dekã lɛ, wɔbaanyɛ wɔfo wɔshiɛmɔ wiemɔ lɛ kuku kɛtsɔ sanebimɔi ni yɔɔ sɛɛgbɛ lɛ eko ni wɔkɛaatsɔɔ lɛ lɛ nɔ, ni wɔkɛɛ lɛ akɛ, “Kɛji obaasumɔ ni ole hetoo lɛ, manyɛ mashi woji tɛtrɛbii nɛɛ maha bo koni be kroko kɛ́ miba ni oyɛ be lɛ wɔgba sane babaoo.” Shiɛlɔi komɛi hu baanyɛ aje sanegbaa shishi kɛtsɔ nɔ ni aŋma yɛ sɛɛgbɛ lɛ ni amɛkɛaatsɔɔ shĩatsɛ lɛ nɔ, ni no sɛɛ lɛ amɛbi lɛ ni etsɔɔ sanebimɔi lɛ ateŋ nɔ ni ebaasumɔ ni ele ehetoo. No sɛɛ lɛ, amɛbaatsɔɔ lɛ he ni hetoo lɛ yɔɔ, kɛkɛ lɛ amɛkane ŋmalɛ ko ni amɛtsɔ hiɛ amɛsaa amɛhe akɛ amɛbaakane lɛ amɛha lɛ. Ekolɛ bo hu obaanyɛ otao gbɛi srɔtoi anɔ ni obaatsɔ okɛ nɔ ni aŋma yɛ Buu-Mɔɔ sɛɛgbɛ lɛ atee mɛi amiishɛɛ shi.