Sanebimɔ He

◼ Mɛɛ nibii wɔbaanyɛ wɔfee kɛye wɔbua gbɛgbalɔi?

Yɛ 2009 sɔɔmɔ afi lɛ mli lɛ, nyɛmimɛi hii kɛ yei ni miihe ashɛ 800,000 kɛ amɛhe wo daa gbɛgbamɔ kɛ gbɛgbamɔ krɛdɛɛ nitsumɔ lɛ mli yɛ jeŋ fɛɛ. Be fɛɛ sɔɔlɔi nɛɛ kɛ amɛnibaanii lɛ amli klɛŋklɛŋ nii, ni ji amɛbe, amɛnyɛmɔ, kɛ amɛheloonaa nibii shãa afɔle bɔni afee ni amɛshiɛ Maŋtsɛyeli sanekpakpa lɛ. (Abɛi 3:9) Ekã shi faŋŋ akɛ, Yehowa hiɛ sɔɔ amɛmɔdɛŋbɔi lɛ waa! Mɛɛ gbɛi anɔ wɔbaanyɛ wɔtsɔ wɔtsɔɔ akɛ wɔhiɛ sɔɔ amɛmɔdɛŋbɔi lɛ taakɛ Yehowa feɔ lɛ, ni wɔha amɛná miishɛɛ ni amɛmia amɛhiɛ yɛ gbɛgbamɔ nitsumɔ lɛ mli?

Ani owieɔ gbɛgbamɔ nitsumɔ lɛ he ekpakpa? Mɛɛ be nɛ ni ojie gbɛgbalɔ ko yi yɛ ehe ni ekɛshãa afɔle lɛ hewɔ? Ekã shi faŋŋ akɛ, kɛ́ wɔwie wiemɔi ni woɔ mɔ hewalɛ lɛ, ebaanyɛ eye ebua amɛ ni amɛya nɔ amɛtsu gbɛgbamɔ nitsumɔ lɛ. (Abɛi 25:11) Ani wɔbaanyɛ wɔtsake wɔbe he gbɛjianɔtoo kɛha otsi lɛ mli koni wɔnyɛ wɔkɛ gbɛgbalɔi lɛ aya shiɛmɔ? Kɛ́ gbɛgbalɔi lɛ ná mɔ ko fata amɛhe kɛtee shiɛmɔ, titri lɛ yɛ gbi lɛ mli beni shiɛlɔi fioo pɛ yaa shiɛmɔ lɛ, amɛhiɛ sɔɔ waa. (1 Kor. 13:5; Fil. 2:4) Agbɛnɛ hu, wɔbaanyɛ wɔjɛ suɔmɔ mli wɔye wɔbua amɛ kɛtsɔ gbɔ ni wɔɔfee amɛ kɛ nine ni wɔɔfɔ̃ amɛ kɛba wɔshĩai amli ni amɛkɛ wɔ abaye nii lɛ nɔ. (1 Pet. 4:8, 9) Wɔbaanyɛ wɔjɛ wɔsuɔmɔ mli wɔtsi amɛyisɛɛ kɛ nɔ ko ni amɛkɛwo nyɔji ni amɛbɔɔ yɛ lɔle ni amɛwoɔ kɛyaa shiɛmɔ kɛbaa lɛ he, loo wɔbaanyɛ wɔye wɔbua amɛ yɛ gbɛi krokomɛi anɔ bɔ ni wɔɔnyɛ.—Nyɛkɛtoa 1 Tesalonikabii 5:13 lɛ he.

Ŋmalɛi lɛ maa nɔ mi kɛhaa wɔ akɛ Yehowa baaha mɛi ni kɛ e-Maŋtsɛyeli lɛ yeɔ klɛŋklɛŋ gbɛhe lɛ amɛhiamɔnii. (Lala 37:25; Mat. 6:33) Gbɛ kome ni etsɔɔ nɔ efeɔ enɛ ji kɛtsɔ wɔnyɛmimɛi Kristofoi lɛ asuɔmɔ kpojiemɔ nɔ. (1 Yoh. 3:16-18) Yɛ anɔkwale mli lɛ, gbɛgbalɔi kpaaa gbɛ akɛ mɛi baaha amɛ shika ni amɛkɛkwɛ amɛhe. Ni kɛ́ nɔ ko he miihia amɛ po lɛ, ekolɛ amɛtsutsu amɛnyɛŋ amɛkɛɛ wɔ. Kɛlɛ, kɛ́ wɔha wɔhiɛ hi wɔhe nɔ ni wɔkɛ wɔhiɛ fɔ̃ shi jogbaŋŋ lɛ, wɔbaanyɛ wɔye wɔbua gbɛgbalɔi anɔkwafoi lɛ kɛtsu ‘amɛfimɔ lɛ’ he nii.—2 Kor. 8:14, 15.

Beni Foibe, ni ji shiɛlɔ ko ni yɔɔ ekãa ni hi klɛŋklɛŋ afii 100 lɛ mli Kenkrea Asafo lɛ mli lɛ fã gbɛ kɛtee Roma lɛ, Paulo wo nyɛmimɛi ni yɔɔ Roma lɛ hewalɛ akɛ: ‘Nyɛherea lɛ hiɛmɛɛ yɛ Nuŋtsɔ lɛ mli, bɔ ni sa mɛi krɔŋkrɔŋi lɛ, ni nyɛfata ehe yɛ nitsumɔ fɛɛ nitsumɔ ni nyɛhe hiaa lɛ yɛ mli lɛŋ.’ (Rom. 16:1, 2) Wɔná hegbɛ akɛ wɔbaajie suɔmɔ ni tamɔ nakai nɔŋŋ kpo wɔtsɔɔ daa gbɛgbalɔi kɛ gbɛgbalɔi krɛdɛi ni yɔɔ wɔsafo lɛ mli ni shiɛɔ sanekpakpa lɛ ni amɛfɔ̃ɔɔ lɛ.—Bɔf. 5:42.