Wɔhiɛ Ni Aaasɔ Wɔ Gbɛgbalɔi Lɛ
1 Akɛ Nyɔŋmɔ Maŋtsɛyeli lɛ he nanemɛi nitsulɔi lɛ, wɔwowoɔ wɔhe hewalɛ. (Kol. 4:11) Kɛ wɔsusu he akɛ nitsumɔ titri ni ka Kristofoi asafo lɛ nɔ ji ni wɔshiɛ sanekpakpa lɛ, wɔyɛ yiŋtoi ni mli wa ni wɔɔdamɔ nɔ ni wɔhiɛ asɔ be fɛɛ nitsulɔi ni yɔɔ wɔteŋ lɛ.—Marko 13:10; Rom. 16:2; Fil. 4:3.
MƐNI HEWƆ?
2 Gbɛgbalɔi lɛ tswaa asafo lɛ amɛmaa shi yɛ gbɛ pɔtɛɛ nɔ kɛtsɔ nitsumɔ ni amɛkɛ shiɛlɔi ni bɛ niiashikpamɔ tsɔ lɛ tsuɔ yɛ shiɛmɔ nitsumɔ lɛ fai sɔrɔtoi lɛ amli lɛ nɔ. Nɔ ni fata enɛ he ji woji tɛtrɛbii lɛ kɛ odaseyeli, hesaamɔ kɛha sɛɛsaramɔ kɛ sɛɛsaramɔ feemɔ, kɛ bɔ ni amɛaafee amɛje shia Biblia mli nikasemɔ shishi ni nikasemɔ lɛ amɔ shi hu. Kɛfata he lɛ, gbɛgbalɔi baanyɛ amɛfee nɔkwɛmɔ nɔ kɛtsɔ ekaa ni amɛkɛaaye odase trukaa lɛ nɔ. Sɛɛfimɔ kɛhaa otsi teŋ odaseyeli he gbɛjianɔtoo lɛ haa amɛnaa hegbɛ ni amɛkɛaaye amɛbua mɛi krokomɛi. Ni kɛ gbɛgbalɔi lɛ fi shiɛmɔ nitsumɔ he gbɛjianɔtoo kɛha otsi naagbee lɛ sɛɛ lɛ, ehaa anuɔ hewalɛ ni amɛyɔɔ yɛ shiɛmɔ nitsumɔ lɛ nɔ lɛ he jogbaŋŋ, yɛ be mli ni shiɛlɔi krokomɛi hu nyɛɔ amɛkɛ amɛhe woɔ mli lɛ.
3 Gbɛgbalɔi lɛ hu yeɔ amɛbuaa asafoi lɛ ni amɛtsuɔ amɛshikpɔŋkukuji lɛ amli nii kɛmɔɔ shi yɛ bei fɛɛ mli. Enɛ yeɔ ebuaa gbɔmɛi lɛ ni amɛleɔ wɔ shɛɛ sane lɛ jogbaŋŋ ni ehaa amɛhe jɔɔ amɛ hu yɛ be mli ni wɔyasaraa amɛ lɛ ejaakɛ amɛle mɛi ni wɔji. Ŋmɛlɛtswai babaoo ni gbɛgbalɔi yeɔ yɛ shikpɔŋkuku lɛ mli ni amɛshiɔ woji amɛhaa mɛi ni yɔɔ wiemɔ lɛ he miishɛɛ ni amɛhaa miishɛɛ ni amɛyɔɔ lɛ yaa hiɛ—ni ji akɛ, amɛtɛoɔ anɔkwale dumɔwui lɛ ni amɛshwieɔ nɔ nu—lɛ haa shikpɔŋkuku lɛ bafeɔ nɔ ni woɔ yibii babaoo.—1 Kor. 3:6.
YƐ ASAFO LƐ MLI
4 Amɛwoɔ mɛi babaoo hewalɛ koni amɛkɛ amɛhe awo be fɛɛ sɔɔmɔ nitsumɔ lɛ mli ejaakɛ ekaa kɛ mɔdɛŋbɔɔ ni gbɛgbalɔi anɔkwafoi lɛ yɔɔ lɛ saa amɛtsui he. Kulɛ nyɛmiyoo ko shashaoɔ shi yɛ daa gbɛgbalɔ ni eeefee lɛ he ejaakɛ daa gbɛgbalɔ ko bɛ amɛ asafo lɛ mli. Shi beni kpokpaa nɔkwɛlɔ lɛ wo lɛ hewalɛ sɛɛ lɛ, etee nɔ ni ekɛ ehe wo mli. Etsɛɛɛ ni mɛi krokomɛi hu nyiɛ sɛɛ, ni amrɔ nɛɛ nakai asafo lɛ yɛ gbɛgbalɔi ni yɔɔ ekaa babaoo bɔ ni sa.
5 Eshɛɔ bei komɛi ni onukpai lɛ nyɛɔ amɛhaa gbɛgbalɔ ko yeɔ ebuaa mɔ ko ni eyaaa shiɛmɔ daa aloo mɔ ni ekpa yaa kwraa po. Yelikɛbuamɔ nɛɛ eko ji Biblia mli nikasemɔ ni ekɛ nɛkɛ mɔ nɛɛ aaafee. Yɛ nɛkɛ gbɛ nɔ lɛ, gbɛgbalɔ lɛ hemɔkɛyeli kɛ ekaa ni eyɔɔ lɛ nyɛɔ eyeɔ ebuaa ni etsiɛɔ suɔmɔ ni mɔ lɛ yɔɔ kɛha anɔkwale lɛ hiɛ ni eyeɔ ebua lɛ ni ewoɔ lɛ hewalɛ ekoŋŋ koni etsu nii kɛwo gbɛnaa nii ni yɔɔ ehenɔjɔɔmɔ lɛ mli lɛ obɔ.—1 Tes. 5:14.
NYƐWOA GBƐGBALƆI LƐ HEWALƐ
6 Eyɛ mli akɛ gbɛgbalɔi lɛ tsuɔ nii babaoo ni amɛkɛwoɔ mɛi krokomɛi hewalɛ moŋ, shi amɛ diɛŋtsɛ hu hewalɛwoo he hiaa amɛ bɔni afee ni amɛkɛ miishɛɛ aya nɔ yɛ amɛsɔɔmɔ lɛ mli. (Rom. 1:12) Ani okɛ jwɛŋmɔ kpakpa wieɔ gbɛgbamɔ sɔɔmɔ lɛ he? Mɛɛ be ji naagbee be ni ojie gbɛgbalɔ ko yi yɛ enitsumɔ lɛ kɛ he-kɛ-afɔleshaa mumɔ ni eyɔɔ lɛ hewɔ? Gbɛgbalɔi lɛ ahiɛ sɔɔ waa titri akɛ amɛaana mɔ ko amɛkɛtsu nii yɛ shiɛmɔ nitsumɔ lɛ mli yɛ gbi lɛ mli ŋmɛlɛtswai ni shiɛlɔi fioo ko pɛ yaa shiɛmɔ lɛ. Ani obaanyɛ ofata gbɛgbalɔi lɛ ahe ni ekolɛ oye be ni sɛɛ kɛ fioo koni okɛfi shiɛmɔ nitsumɔ lɛ sɛɛ?
7 Mɛɛ gbɛi krokomɛi anɔ ooonyɛ otsɔ oye obua gbɛgbalɔi lɛ yɛ? Kɛfata amɛyi ni ooojie lɛ he lɛ, obaanyɛ otsɔɔ hiɛsɔɔ ni oyɔɔ kɛha nitsulɔi ni yɔɔ ekaa nɛɛ yɛ gbɛ pɔtɛɛ nɔ kɛtsɔ nine ni ooofɔ amɛ kɛba niyeli, aloo ni ooojɛ osuɔmɔ mli oye obua amɛ yɛ amɛgbɛfaa he nyɔmɔwoo mli, kɛ gbɛi krokomɛi anɔ ni oootsɔ ofi amɛsɛɛ bɔ ni ooonyɛ lɛ hu nɔ.—Okɛto 1 Tesalonikabii 5:12, 13 he.
8 Kɛ onukpai kɛ asafoŋ sɔɔlɔi nyiɛ hiɛ yɛ asafo lɛ mli lɛ, no lɛ gbɛgbalɔi kɛ shiɛlɔi lɛ baafi sɔɔmɔ nitsumɔ lɛ he gbɛjianɔtoo ni mɔɔ shi lɛ sɛɛ kwraa kɛmɔ shi. Kɛtsɔ no nɔ lɛ wɔ fɛɛ wɔkɛ nikeenii ni wɔyɔɔ lɛ ‘baasɔmɔ wɔhe.’—1 Pet. 4:10, 11.