Okɛtsu Nii Be Fɛɛ Be
1. Mɛni wɔbaanyɛ wɔkɛ Le Anɔkwale Lɛ dɛhiɛmɔ wolo lɛ afee?
1 Afee dɛhiɛmɔ wolo ni ji Ani Obaasumɔ ní Ole Anɔkwale Lɛ? koni eye ebua wɔ kɛje Biblia mli nikasemɔ shishi. Shi eji wolo hu ni hi jogbaŋŋ ni wɔbaanyɛ wɔkɛgbɛ anɔkwale wui lɛ wɔshwã. (Jaj. 11:6) Naa gbɛtsɔɔmɔi komɛi ni baanyɛ aye abua wɔ ni wɔkɛtsu nii jogbaŋŋ.
2. Te wɔɔfee tɛŋŋ wɔkɛ dɛhiɛmɔ wolo lɛ atsu nii kɛje sanegbaa shishi?
2 Okɛje Sanegbaa Shishi: Obaanyɛ okɛ dɛhiɛmɔ wolo lɛ eko aha shĩatsɛ lɛ ni oha ekwɛ sanebimɔi ekpaa ni yɔɔ ehiɛ gbɛ lɛ, ni obi lɛ akɛ: “Te sanebimɔi nɛɛ ateŋ nɔ ni osusu he pɛŋ lɛ?” Beni shĩatsɛ lɛ eha hetoo sɛɛ lɛ, okɛ lɛ asusu bɔ ni Biblia lɛ haa sane ni ehala lɛ hetoo lɛ he kɛjɛ dɛhiɛmɔ wolo lɛ mli, ni okane ŋmalɛi ni atsɛ yisɛɛ yɛ wolo lɛ mli lɛ ateŋ ekome oha lɛ. Kanemɔ sane ni yɔɔ wolo lɛ sɛɛ gbɛ lɛ loo wiemɔ he kuku, ni okɛ Biblia lɛ Tsɔɔ wolo lɛ eko aha lɛ. Kɛ́ eŋɔɔɔ Biblia lɛ Tsɔɔ wolo lɛ po lɛ, enine eshɛ dɛhiɛmɔ wolo lɛ nɔ momo, ni no baanyɛ aha anɔkwale wui lɛ akwɛ̃ yɛ etsui mli.—Mat. 13:23.
3. Kɛ́ shĩatsɛ lɛ bɛ dekã lɛ, mɛni wɔbaanyɛ wɔfee?
3 Kɛ Shĩatsɛ lɛ Bɛ Dekã: Obaanyɛ okɛɛ akɛ: “Akɛni obɛ dekã hewɔ lɛ, ha mashi dɛhiɛmɔ wolo nɛɛ maha bo. Ehiɛ sanebimɔi ekpaa komɛi ni wɔteŋ mɛi babaoo fɔɔ bimɔ, ni ehaa eko fɛɛ eko hetoo kɛjɛɔ Biblia lɛ mli. Kɛ́ miku misɛɛ miba lɛ, masumɔ male osusumɔ yɛ saji nɛɛ ahe.”
4. Mɛni wɔbaanyɛ wɔkɛɛ kɛji wɔkɛ dɛhiɛmɔ wolo lɛ miiha yɛ gbɛjegbɛi ahe?
4 Kɛ́ Ooye Odase yɛ Gbɛjegbɛi Ahe: Obaanyɛ okɛɛ akɛ: “Hɛloo. Ani obi ohe saji nɛɛ ateŋ eko pɛŋ? [Ŋmɛɛ lɛ gbɛ ni eha hetoo.] Dɛhiɛmɔ wolo nɛɛ kɛ hetoo ni jɛ Biblia lɛ mli ni yɔɔ faŋŋ, ni haa mɔ tsui nyɔɔ emli haa.” Kɛji mɔ lɛ yeee oyai lɛ, obaanyɛ okɛ lɛ asusu hetoi lɛ ateŋ ekome he kɛjɛ dɛhiɛmɔ wolo lɛ mli, ni no sɛɛ lɛ okɛ Biblia lɛ Tsɔɔ wolo lɛ po aha lɛ.
5. Te wɔɔfee tɛŋŋ wɔkɛ dɛhiɛmɔ wolo lɛ atsu nii yɛ mɛi ni bɛ shĩa lɛ agbɛfaŋ yɛ be kɛ beaŋ?
5 Mɛi ni Bɛ Shĩa: Yɛ shikpɔŋkukuji komɛi amli lɛ, bei pii lɛ, shiɛlɔi komɛi shĩɔ woji yɛ mɛi ni bɛ shĩa lɛ ashinaai anaa yɛ he ni mɛi krokomɛi enaŋ. Kɛ́ nakai ji bɔ ni nyɛsafo lɛ fɔɔ feemɔ lɛ, mɛni hewɔ ni yɛ be kɛ beaŋ lɛ oshiii Le Anɔkwale Lɛ dɛhiɛmɔ wolo lɛ eko yɛ mɛi ashinaai anaa? Kɛ́ oku osɛɛ kɛtee jɛmɛ lɛ, obaanyɛ okɛɛ akɛ: “Beni wɔba biɛ nyɛsɛɛ lɛ, no mli lɛ obɛ shĩa, no hewɔ lɛ wɔshi dɛhiɛmɔ wolo nɛɛ yɛ oshinaa lɛ naa. Te sanebimɔi nɛɛ ateŋ nɔ ni obaasumɔ ni oná hetoo?”
6. Mɛni hewɔ Le Anɔkwale Lɛ dɛhiɛmɔ wolo lɛ kɛnitsumɔ hi jogbaŋŋ yɛ shiɛmɔ nitsumɔ lɛ mli lɛ?
6 Le Anɔkwale Lɛ dɛhiɛmɔ wolo lɛ haa anuɔ anɔkwale lɛ shishi yɛ gbɛ ni waaa, ni yɔɔ tɛ̃ɛ nɔ. Mɛi ni yɔɔ jamɔi kɛ maji srɔtoi amli fɛɛ lɛ nyaa he. Ewaaa kɛhamɔ; gbekɛbii kɛ shiɛlɔi hei po baanyɛ amɛkɛha. Ani okɛmiitsu nii yɛ be fɛɛ be ni sa mli?