Wɔyɛ Dɛŋdade Hee ko Kɛha Nikasemɔi Ashishijee!
1 Amerika yoo lɛ hiɛ dɔɔ e-Roma Katolik jamɔ lɛ he waa. Ekɛ anɔkwayeli fãa sɔlemɔ lɛ tsɔɔmɔi ahe. Ekɛ ehe wo jamɔ he gbɛfaa po mli kɛtee Vatican. Ni kɛlɛ, beni Yehowa Odasefoi lɛ ateŋ mɔ kome tee eŋɔɔ lɛ, ekpɛlɛ shia Biblia mli nikasemɔ he gbɛjianɔtoo lɛ nɔ. Mɛni hewɔ? Ejaakɛ eesumɔ ni ekase nɔ ni Biblia lɛ kɛɔ, shi esɔlemɔ lɛ kɛ shia Biblia mli nikasemɔ he gbɛjianɔtoo haaa. Mɛni nɛkɛ niiashikpamɔ nɛɛ tsɔɔ wɔ? Ákɛ, wɔleee mɔ ni eeenyɛ eba akɛ eeekpɛlɛ Biblia mli nikasemɔ ni awooo he nyɔmɔ ko lɛ nɔ.—Jaj. 11:6.
2 Ani oshashao shi pɛŋ akɛ oookɛɛ mɛi akɛ wɔmiisumɔ ni wɔkɛ mɔ fɛɛ mɔ ni yɔɔ he miishɛɛ lɛ akase Biblia lɛ? Ani mɔ fɛɛ mɔ ni yɔɔ okutsoŋ lɛ le akɛ wɔkɛ sɔɔmɔ hegbɛ nɛɛ haa yaka? Te wɔɔfee tɛŋŋ wɔná nɔmimaa akɛ amɛle? Amrɔ nɛɛ wɔyɛ dɛŋdade hee ko ni wɔkɛbaatsu nii! Eji dɛhiɛmɔ wolo fɛfɛo ko ni hiɛ baafai ekpaa ni eyitso ji Ani Obaasumɔ ni Ole Biblia lɛ He Saji Babaoo? Nyɛhaa wɔkwɛa dɛhiɛmɔ wolo nɛɛ yitsei bibii lɛ fɛɛ amli ekomekome:
3 “Mɛni Hewɔ Esa akɛ Okane Biblia Lɛ?” Saji amlitsɔɔmɔi ni dɛhiɛmɔ wolo lɛ kɛhaa lɛ ŋɔɔ ni egbalaa mɔ waa. Etsɔɔ mli akɛ “gbɛtsɔɔmɔ ni suɔmɔ yɔɔ mli ni jɛ Nyɔŋmɔ ŋɔɔ” ji nɔ ni yɔɔ Biblia lɛ mli, ni etsɔɔ bɔ ni aaafee abɛŋkɛ lɛ yɛ sɔlemɔ mli kɛha yelikɛbuamɔ, kɛ bɔ ni aaafee ni nine ashɛ enaanɔ wala nikeenii lɛ nɔ. (1 Tes. 2:13) Dɛhiɛmɔ wolo lɛ wieɔ Biblia mli “anɔkwalei ni haa mɔ nilee” lɛ srɔtoi ahe, tamɔ nɔ ni baa beni wɔgboi, kɛ nɔ hewɔ ni haomɔi babaoo yɔɔ shikpɔŋ nɔ lɛ he. Etsɔɔ “Nyɔŋmɔ jamɔ mli shishitoo mlai ni yɔɔ Biblia lɛ mli” lɛ mli ákɛ, kɛ akɛtsu nii lɛ ekɛ gbɔmɔtsoŋ sɛɛnamɔi baa ni ehaa miishɛɛ, hiɛnɔkamɔ, kɛ sui krokomɛi ni asumɔɔ yaa hiɛ. Dɛhiɛmɔ wolo lɛ wieɔ yiŋtoo kome ko hewɔ hu ni esa akɛ akane Biblia lɛ he—no ji gbalɛi ni kɔɔ wɔsɛɛ be he ni tsɔɔ nɔ ni kã wɔhiɛ ni baa nɔŋŋ lɛ.—Kpoj. 21:3, 4.
4 “Yelikɛbuamɔ ni Akɛhaa Koni Anu Biblia lɛ Shishi”: Dɛhiɛmɔ wolo lɛ kɛɔ akɛ: “Ehe miihia ni aye abua wɔ fɛɛ koni wɔnu Nyɔŋmɔ Wiemɔ lɛ shishi.” Kɛkɛ ni etsɔɔ gbɛ ni wɔtsɔɔ nɔ wɔkaseɔ Biblia lɛ mli, akɛ: “Bei pii lɛ ehi jogbaŋŋ akɛ oookase Biblia lɛ fiofio, ní okɛ shishijee tsɔɔmɔi lɛ aje shishi.” Yɛ be mli ni efeɔ lɛ faŋŋ akɛ “Biblia lɛ ji hegbɛ” lɛ, ejeɔ gbɛ etsĩɔ Taoɔ wolo bibioo lɛ tã akɛ nɔ ko ni baaye abua nikaselɔ lɛ koni enu “Ŋmalɛ naa saji ni kɔɔ saji srɔtoi babaoo ahe lɛ shishi.” Yitso bibioo ni nyiɛ sɛɛ lɛ teeɔ sane ni esa akɛ abi shi.
5 “Ani Obaasumɔ ni Oto Be Daa Otsi Koni Okɛnu Biblia lɛ Shishi?” Atsɔɔ mli akɛ abaanyɛ ato Biblia mli nikasemɔ he gbɛjianɔ yɛ be kɛ he ni hi ha nikaselɔ lɛ, yɛ teemɔŋ yɛ lɛ diɛŋtsɛ eshia aloo yɛ tɛlifoŋ lɛ nɔ. Namɛi baanyɛ aná sanegbaa nɛɛ mli gbɛfaŋnɔ? Dɛhiɛmɔ wolo lɛ haa hetoo akɛ: “Oweku muu lɛ fɛɛ. Nanemɛi fɛɛ ni osumɔɔ ni ofɔ̃ amɛ nine kɛba lɛ hu baanyɛ aná mli gbɛfaŋnɔ. Aloo kɛ́ oosumɔ lɛ, abaanyɛ akɛ bo okome too agba sane lɛ.” Esa akɛ nikasemɔ kome aya nɔ kɛyashi mɛɛ be? Etsɔɔ mli akɛ: “Mɛi babaoo toɔ ŋmɛlɛtswaa kome daa otsi kɛhaa Biblia lɛ kasemɔ. Kɛ obaanyɛ okɛ be babaoo atsu nii, aloo be fioo ko pɛ onáa daa otsi lɛ, Odasefoi lɛ kɛ amɛhe baaha koni amɛye amɛbua bo.” No ji nɔ ni he hiaa titri lɛ! Wɔmiisumɔ ni wɔtsake wɔhe wɔwo nikaselɔ fɛɛ nikaselɔ shihilɛi amli.
6 “Aafɔ̃ Bo Nine Koni Okase Nii”: Akɛ adrɛs ko eha koni mɔ ni nine shɛɔ dɛhiɛmɔ wolo lɛ nɔ lɛ anyɛ abi Taoɔ wolo bibioo lɛ shi aloo koni mɔ ko abasara lɛ ni etsɔɔ lɛ wɔ shia Biblia mli nikasemɔ gbɛjianɔtoo ni aheee nɔ ko yɛ he lɛ mli. Wolo ni akɛhà Taoɔ wolo bibioo lɛ sɛɛ lɛ hiɛ sui srɔtoi. Ani onaaa nɔ hewɔ ni dɛhiɛmɔ wolo nɛɛ baanyɛ awo mɛi ni hiɛ tsuijurɔ lɛ ateŋ mɛi pii hewalɛ koni amɛkpɛlɛ yelikɛbuamɔ ni wɔkɛhaa amɛ lɛ nɔ lɛ? Agbɛnɛ mɛɛ gbɛ nɔ wɔɔtsɔ ni wɔkɛ dɛŋdade hee nɛɛ atsu nii yɛ gbɛ ni hi fe fɛɛ nɔ?
7 Namɛi Obaanyɛ Okɛ Dɛhiɛmɔ Wolo lɛ Aha? Abaanyɛ ni akɛ dɛhiɛmɔ wolo lɛ aha gbɔmɛi lɛ tɛ̃ɛ aloo ashi yɛ shiai ni mɛi bɛ mli. Abaanyɛ aja yɛ shia kɛ shia, yɛ gbɛjegbɛi anɔ, kɛ agbɛnɛ yɛ shikpɔŋkuku ni nitsumɔhei yɔɔ mli lɛ amli. Okɛha mɛi kɛji akɛ amɛŋɔ wɔ woji lɛ loo amɛŋɔɔɔ eko. Okɛwo woji tɛtrɛbii lɛ loo woji krokomɛi ni wɔkɛhaa lɛ amli. Okɛwo woji ni oŋmalaa mɛi lɛ amli. Bi ni okɛha mɛi ni okɛ amɛ gbaa sane yɛ tɛlifoŋ nɔ lɛ. Esa akɛ ohiɛ ekomɛi be fɛɛ be, koni okɛha beni ooya jara nɔ, kɛ ota tsɔne mli, kɛ he fɛɛ he ni hegbɛ aaaba akɛ oooye odase trukaa yɛ lɛ. Okɛha mɔ fɛɛ mɔ ni baa oshinaa naa. Okɛha owekumɛi, akutsoŋbii, nanemɛi nitsulɔi, nanemɛi skulbii, kɛ mɛi krokomɛi ni ole amɛ. Bɔɔ mɔdɛŋ ni oha mɔ fɛɛ mɔ ni okɛ lɛ kpeɔ lɛ nine ashɛ dɛhiɛmɔ wolo nɛɛ eko nɔ! Kɛkɛ lɛ mɛni?
8 Kɛji akɛ Akpɛlɛ nɔ Amrɔ Nɔŋŋ: Aŋkroaŋkroi komɛi baakpɛlɛ nɔ amrɔ nɔŋŋ akɛ amɛbaasumɔ ni akɛ amɛ akase Biblia lɛ. No hewɔ lɛ, be fɛɛ be ni okɛ ohe aaawo shiɛmɔ nitsumɔ lɛ mli lɛ, ná nɔmimaa akɛ ohiɛ Taoɔ wolo bibioo lɛ enyɔ—ekome kɛha nikaselɔ lɛ kɛ ekome kɛha bo diɛŋtsɛ. Kɛji akɛ gbɔmɔ lɛ miisumɔ lɛ, jee nikasemɔ lɛ shishi amrɔ nɔŋŋ yɛ jɛmɛ. Gbelemɔ emligbɛ klɛŋklɛŋ baafa lɛ, ni okane “Bɔ ni Okɛ Wolo Bibioo Nɛɛ Aaatsu Nii Aha” lɛ. Kɛkɛ lɛ jee nikasemɔ 1 lɛ shishi amrɔ nɔŋŋ, ni ofee nikasemɔ lɛ he nɔkwɛmɔnɔ. Mɛni yɔɔ mlɛo fe enɛ?
9 Kɛji Be He Miihia Otoibolɔ lɛ Koni Ekɛjwɛŋ He Lɛ: Bɔɔ mɔdɛŋ ni onine ashɛ enɔ dani bei pii aho. Kɛ ofee nakai lɛ, kwɛmɔ ni ohiɛ Taoɔ wolo lɛ koni onyɛ otsɔɔ lɛ emli saji ni ato naa yɛ emligbɛ baafa lɛ mli lɛ. Ha ekane emligbɛ saji ni ato naa lɛ ni nyɛhala nikasemɔ ni tamɔ nɔ ni no he enyaa waa lɛ. Nyɛgbelea enɛ ni nyɛjea sane ni ehala lɛ he sanegbaa shishi.
10 Woji Tɛtrɛbii ni Okɛha lɛ Asɛɛdii: Kɛji akɛ oshi dɛhiɛmɔ wolo lɛ kɛ woji tɛtrɛbii komɛi lɛ, obaanyɛ oku osɛɛ ni okɛɛ akɛ: “Nyɛsɛɛ beni miba oŋɔɔ lɛ, eŋɔɔ minaa akɛ mishi Buu-Mɔɔ wolo tɛtrɛɛ lɛ eko miha bo. Ekolɛ okadi akɛ wolo tɛtrɛɛ lɛ gbɛi diɛŋtsɛ ji Buu-Mɔɔ Eetswa Yehowa Maŋtsɛyeli He Adafi. Ŋmɛnɛ, masumɔ ni matsɔɔ nɔ ni Maŋtsɛyeli nɛɛ ji kɛ nɔ ni ebaaji kɛha bo kɛ oweku lɛ mli matsɔɔ bo.” Agbɛnɛ, gbelemɔ Taoɔ wolo lɛ nikasemɔ 6 lɛ. Jee shishi kɛ klɛŋklɛŋ kuku lɛ, kanemɔ ni okɛ shiatsɛ lɛ agba sane, bei abɔ ni eyɔɔ be kɛha nakai feemɔ lɛ. Agbɛnɛ too gbɛjianɔ ni oku osɛɛ gbi kroko ni oyagbe nikasemɔ lɛ naa.
11 Kaaha Dɛhiɛmɔ Woji lɛ Miita yɛ Odɛŋ: Sɔɔmɔ nɔkwɛlɔ lɛ kɛ nyɛmimɛi ni tsuɔ woji ni nine shɛɔ nɔ lɛ ahe nii lɛ baasumɔ ni amɛná Lé Biblia Lɛ dɛhiɛmɔ wolo lɛ babaoo yɛ asafo lɛ mli be fɛɛ be. Ha eko ahi okotoku loo obaagi bibioo lɛ mli, yɛ otsɔne mli, yɛ onitsumɔhe, yɛ skul, yɛ oshinaa naa—yɛ he fɛɛ he ni onine baashɛ nɔ oya. Ha eko ahi oshiɛmɔ baagi lɛ mli kɛfee klalo kɛha bei ni okɛ mɔ ko ni obaanyɛ okɛ lɛ agba Biblia lɛ he sane baakpe.
12 Eba akɛ Yehowa Aaajɔɔ Wɔ Mɔdɛŋbɔi Anɔ: Oti ni Kristofoi fɛɛ shweɔ ji ni amɛtsɔɔ mɔ ko anɔkwale lɛ. (Mat. 28:19, 20) Ani okɛ mɔ ko miifee shia Biblia mli nikasemɔ bianɛ? Kɛ oofee nakai lɛ, ani obaanyɛ oná be kɛha ekroko yɛ odaa otsi be he gbɛjianɔtoo lɛ mli? Kɛji akɛ okɛ mɔ ko ekaseee nii bianɛ lɛ, eyɛ faŋŋ akɛ obaasumɔ ni ofee nakai. Sɔlemɔ oha Yehowa ni ejɔɔ omɔdɛŋbɔi anɔ koni oná mɔ ko ni obaanyɛ okɛ lɛ akase nii. Agbɛnɛ tsu nakai sɔlemɔi lɛ ahe nii.—1 Yoh. 5:14, 15.
13 Wɔyɛ dɛŋdade hee ni wɔkɛbaaje nikasemɔi ashishi! Kasemɔ enɛ jogbaŋŋ. Jaa oha mɛi kɛ miishɛɛ. Feemɔ bɔ fɛɛ bɔ ni ooonyɛ koni ‘ofee ejurɔ, ni otsɔ niiatsɛ yɛ ejurɔfeemɔi agbɛfaŋ, osumɔ nihamɔ, onine akpɔ’ yɛ nɔ ni okase yɛ Nyɔŋmɔ Wiemɔ lɛ he lɛ mli.—1 Tim. 6:18.
[Akrabatsa ni yɔɔ baafa 4]
HEGBƐI NI WƆƆNÁ NI WƆKƐJA DƐHIƐMƆ WOLO LƐ
◼ Yɛ daa gbi sanegbaai amli
◼ Beni mɔ ko ehe wɔ woji lɛ eko
◼ Beni mɔ ko bɛ shia
◼ Beni wɔfeɔ sɛɛsaramɔi
◼ Beni wɔkɛ mɔ ko kpeɔ yɛ gbɛjegbɛ nɔ odaseyeli mli
◼ Beni wɔyeɔ odase yɛ shikpɔŋkuku ni nitsumɔhei yɔɔ mli
◼ Beni wɔyeɔ odase trukaa
◼ Beni wɔŋmalaa woji
◼ Beni wɔtara tsɔnei amli
◼ Beni mɔ ko eba wɔ shinaa naa
◼ Beni wɔkɛ wekumɛi, akutsoŋbii, nanemɛi nitsulɔi, nanemɛi skulbii, kɛ mɛi krokomɛi ni wɔle wieɔ