Nɔ ko ni Baaye Abua Wekui
1. Mɛɛ gbɛ nɔ wekui ni yɔɔ Israel lɛ ná daa otsi Hejɔɔmɔ Gbi lɛ he sɛɛ?
1 Wekui ná Hejɔɔmɔ Gbi lɛ ni Yehowa jɛ esuɔmɔ mli eto lɛ he sɛɛ jogbaŋŋ. Kɛ́ shɛ nakai be lɛ, Israelbii lɛ jɔɔ amɛhe kɛjɛɔ amɛnitsumɔi amli ni amɛjwɛŋɔ nibii kpakpai ni Yehowa feɔ kɛ wekukpaa ni kã amɛ kɛ lɛ teŋ lɛ nɔ. Fɔlɔi ŋɔɔ hegbɛ nɛɛ kɛduɔ Mla lɛ amɛwoɔ amɛbii lɛ atsui mli. (5 Mose 6:6, 7) Hejɔɔmɔ Gbi lɛ haa Yehowa webii lɛ náa be yɛ otsi fɛɛ otsi mli ni amɛkɛsusuɔ mumɔŋ nibii ahe.
2. Mɛni Hejɔɔmɔ Gbi lɛ tsɔɔ wɔ yɛ Yehowa he?
2 Yɛ anɔkwale mli lɛ, Yehowa biii ni wekui aye Hejɔɔmɔ Gbi lɛ dɔŋŋ. Shi, nakai mla lɛ tsɔɔ wɔ nɔ ko yɛ Nyɔŋmɔ he. Kɛjɛ teteete po lɛ, esusuɔ ewebii lɛ amumɔŋ hilɛkɛhamɔ he waa. (Yes. 48:17, 18) Ŋmɛnɛ lɛ, gbɛ kome ni Yehowa jɛɔ suɔmɔ mli etsɔɔ akɛ esusuɔ wɔhe ji kɛtsɔ gbɛkɛ Weku Jamɔ lɛ nɔ.
3. Mɛni ji yiŋtoo ni yɔɔ gbɛkɛ Weku Jamɔ lɛ sɛɛ?
3 Mɛni Ji Yiŋtoo ni yɔɔ Gbɛkɛ Weku Jamɔ lɛ Sɛɛ? Kɛjɛ January 2009 kɛbaa lɛ, afeɔ Asafo Woloŋ Nikasemɔ, Teokrase Sɔɔmɔ Skul, kɛ Sɔɔmɔ Kpee lɛ fɛɛ yɛ gbɛkɛ kome too lɛ nɔŋŋ mli. Yiŋtoo kome hewɔ ni afee tsakemɔ nɛɛ ji ni wekui aná hegbɛ kɛwaje amɛmumɔŋ shidaamɔ kɛtsɔ gbɛkɛ ko ni amɛaato akɛ, daa otsi lɛ amɛkɛbaafee weku jamɔ lɛ nɔ. Awo wekui fɛɛ hewalɛ akɛ, kɛ́ eehi lɛ, amɛfee amɛweku nikasemɔ lɛ yɛ gbɛkɛ ni tsutsu ko lɛ akɛfeɔ woloŋ nikasemɔ lɛ nɔ, ni amɛŋmɛ amɛtsui shi jogbaŋŋ ni amɛkɛ nɛkɛ be nɛɛ akase loo asusu Biblia mli sane ko ni kɔɔ amɛweku lɛ he lɛ he.
4. Ani esa akɛ weku lɛ kɛ ŋmɛlɛtswaa kome pɛ afee Weku Jamɔ lɛ? Tsɔɔmɔ mli.
4 Tsutsu lɛ, bɔni afee ni wɔnyɛ wɔya Asafo Woloŋ Nikasemɔ lɛ, ehe bahiaa ni wɔná be kɛwo atadei, wɔnyiɛ loo wɔfã gbɛ kɛya he ni afeɔ nikasemɔ lɛ yɛ lɛ, ni wɔfee nibii krokomɛi hu. Yɛ wɔteŋ mɛi babaoo agbɛfaŋ lɛ, nɛkɛ kpee nɛɛ heɔ wɔbei babaoo fe ŋmɛlɛtswaa kome ni wɔyayeɔ yɛ shishi lɛ. Tsakemɔ ni afee yɛ be ni wɔkɛyaa kpeei lɛ mli lɛ eha amrɔ nɛɛ wɔná nɛkɛ gbɛkɛ nɛɛ kɛjáa Yehowa akɛ weku. Enɛ hewɔ lɛ, ejeee doo akɛ wɔkɛ ŋmɛlɛtswaa kome pɛ afee wɔgbɛkɛ Weku Jamɔ lɛ. Moŋ lɛ, esa akɛ wɔsusu wɔweku lɛ hiamɔ nii kɛ enyɛmɔi ahe, ni wɔto be falɛ ni sa kɛha Weku Jamɔ lɛ.
5. Ani esa akɛ akɛ be lɛ fɛɛ asusu nii ahe kutuu? Tsɔɔmɔ mli.
5 Ani Esa akɛ Akɛ Be lɛ Fɛɛ Asusu Nii Ahe Kutuu? Kɛ́ gbalashihilɛ mli hefatalɔi loo wekui ni gbekɛbii yɔɔ mli susu Ŋmalɛ mli saji ahe kutuu lɛ, amɛkɛ no wowoɔ amɛhe hewalɛ. (Rom. 1:12) Ehaa weku lɛ bɛŋkɛɔ amɛhe kpaakpa. No hewɔ lɛ, esa akɛ Ŋmalɛ mli saji afee nɔ titri ni asusuɔ he yɛ gbɛkɛ Weku Jamɔ lɛ mli. Shi weku lɛ mlibii lɛ ateŋ mɔ fɛɛ mɔ baanyɛ ekɛ be lɛ eko afee aŋkro nikasemɔ. Akɛ nɔkwɛmɔnɔ lɛ, kɛ́ weku lɛ susu nii ahe kutuu amɛgbe naa lɛ, amɛbaanyɛ amɛya nɔ amɛta shi ni mɔ fɛɛ mɔ aya nɔ akase lɛ diɛŋtsɛ enii, ekolɛ, ni egbe ehesaamɔ kɛha asafoŋ kpeei lɛ naa loo ekane woji tɛtrɛbii lɛ eko. Wekui komɛi kpɛɔ amɛyiŋ akɛ amɛsuŋ tɛlivishiŋ nakai gbɛkɛ muu lɛ fɛɛ.
6. Te esa akɛ afee Weku Jamɔ lɛ aha tɛŋŋ?
6 Te Esa akɛ Afee Weku Jamɔ lɛ Aha Tɛŋŋ? Ehe ehiaaa ni daa nɛɛ efeɔ sanebimɔ kɛ hetoo. Bɔni afee ni gbɛkɛ Weku Jamɔ lɛ afee nɔ ni yɔɔ miishɛɛ lɛ, wekui babaoo eto amɛnɔ lɛ he gbɛjianɔ tamɔ bɔ ni afeɔ wɔ-otsi teŋ kpeei lɛ. Amɛjaraa gbɛkɛ Weku Jamɔ lɛ mli amɛwoɔ fãi srɔtoi amli, ni amɛtsuɔ he nii yɛ gbɛi srɔtoi anɔ. Akɛ nɔkwɛmɔnɔ lɛ, amɛbaanyɛ amɛfee ekome kɛkane Biblia lɛ, amɛsaa amɛhe kɛha asafoŋ kpeei lɛ fã ko, ni amɛfee shiɛmɔ wiemɔi ahe nɔkwɛmɔnii amɛkwɛ. Baafa 6 lɛ kɛ enɛ he ŋaawoi komɛi haa.
7. Mɛni esa akɛ fɔlɔi afee koni Weku Jamɔ lɛ afee nɔ ni yɔɔ miishɛɛ?
7 Mɛni Esa akɛ Fɔlɔi Afee Koni Weku Jamɔ lɛ Afee Nɔ ni yɔɔ Miishɛɛ? Oweku lɛ mlibii lɛ baakase nii jogbaŋŋ kɛ́ otsɔ suɔmɔ gbɛ nɔ ofee nikasemɔ lɛ kɛ miishɛɛ. Bei komɛi lɛ, nyɛbaanyɛ nyɛkase nii lɛ yɛ agbo lɛ naa kɛ́ kɔɔyɔŋ hi. Kɛ́ ehe bahia lɛ, nyɛbaanyɛ nyɛjɔɔ nyɛhe fioo kɛfo nikasemɔ lɛ mli. Wekui komɛi jieɔ amɛdaaŋ kɛ amɛgbe Weku Jamɔ lɛ naa. Eyɛ mli akɛ esaaa akɛ fɔlɔi kãa loo amɛgbalaa amɛbii lɛ atoi yɛ gbɛkɛ Weku Jamɔ lɛ mli moŋ, shi amɛbaanyɛ amɛkɛ be lɛ eko atsu nii kɛwie su loo naagba ko ni miiya nɔ yɛ weku lɛ mli lɛ he. Shi ebaahi jogbaŋŋ akɛ otao be kroko yɛ otsi lɛ mli ni okɛ gbekɛ ko pɛ awie sane ko ni kɔɔ ehe ni baanyɛ awo lɛ hiɛgbele lɛ he, koni ehiɛ akagbo yɛ enyɛmimɛi lɛ ahiɛ. Esaaa akɛ gbɛkɛ Weku Jamɔ lɛ feɔ kpɛŋŋ, shi moŋ esa akɛ efee nɔ ni yɔɔ miishɛɛ, ejaakɛ Nyɔŋmɔ ni wɔjáa lɛ lɛ ji miishɛɛ Nyɔŋmɔ.—1 Tim. 1:11.
8, 9. Mɛɛ gbɛ nɔ weku yitsei lɛ baanyɛ asaa amɛhe?
8 Mɛɛ Gbɛ nɔ Weku Yitso lɛ Baanyɛ Asaa Ehe? Kɛ́ daa otsi lɛ weku yitso lɛ tsɔɔ hiɛ etoɔ nɔ ni abaasusu he yɛ gbɛkɛ Weku Jamɔ lɛ mli kɛ gbɛ nɔ ni abaatsɔ asusu he lɛ he gbɛjianɔ, ni esaa ehe hu lɛ, weku lɛ baaná he sɛɛ babaoo. (Abɛi 21:5) Ebaahi jogbaŋŋ akɛ wu lɛ kɛ eŋa lɛ aaasusu enɛ he. (Abɛi 15:22) Weku yitsei, mɛni hewɔ be kɛ beaŋ lɛ, nyɛhaaa nyɛbii lɛ hu atsɔɔ nɔ ni amɛbaasumɔ ni asusu he? Kɛ́ nyɛfee nakai lɛ, ebaaye ebua nyɛ ni nyɛna nibii ni amɛnyaa he kɛ amɛnaagbai.
9 Ehe ehiaaa ni weku yitso lɛ kɛ be babaoo asaa ehe daa otsi. Ekã shi faŋŋ akɛ nɔ ko yɛ ni daa otsi lɛ nyɛbaafee, ni no hewɔ lɛ, ehe ehiaaa ni weku yitso lɛ kɛ gbɛjianɔtoo hee ko aba be fɛɛ be. Ekolɛ ebaahi jogbaŋŋ akɛ, kɛ́ agbe Weku Jamɔ lɛ naa lɛ, nakai gbɛkɛ lɛ nɔŋŋ lɛ, esaa ehe kɛha nɔ ni baanyiɛ sɛɛ enɔ otsi lɛ ejaakɛ nakai beaŋ lɛ, weku lɛ mumɔŋ hiamɔ nii lɛ yɛ ejwɛŋmɔ mli jogbaŋŋ. Weku yitsei komɛi ŋmaa nɔ ni abaasusu he lɛ he sane kuku yɛ wolo nɔ, ni amɛkɛkpɛtɛɔ he ko ni weku lɛ mlibii lɛ fɛɛ baanyɛ ana, tamɔ friji lɛ he nɛkɛ. Enɛ teɔ weku lɛ mlibii lɛ amiishɛɛ shi ni ehaa amɛnáa be kɛsaa amɛhe kɛji ehe baahia.
10. Mɛni mɛi ni amɛ kome pɛ amɛyɔɔ lɛ baanyɛ amɛkɛ gbɛkɛ Weku Jamɔ lɛ afee?
10 Ni kɛ́ Mikome Miyɔɔ loo Mikome Pɛ Miyɔɔ Anɔkwale lɛ mli yɛ Miweku lɛ mli Hu? Mɛi ni amɛ kome pɛ amɛyɔɔ lɛ baanyɛ amɛkɛ gbɛkɛ Weku Jamɔ lɛ afee aŋkro nikasemɔ. Nibii ni amɛbaanyɛ amɛfee yɛ aŋkro nikasemɔ lɛ mli lɛ ekomɛi ji ni amɛkane Biblia lɛ, amɛsaa amɛhe kɛha asafoŋ kpeei, kɛ Buu-Mɔɔ kɛ Awake! woji tɛtrɛbii lɛ ni amɛaakane. Shiɛlɔi komɛi kɛ nɔ ko pɔtɛɛ maa amɛhiɛ akɛ amɛbaakase kɛfata enɛɛmɛi ahe. Bei komɛi lɛ, amɛbaasumɔ ni amɛfɔ̃ shiɛlɔ kroko loo weku ko nine koni amɛbafata ehe kɛsusu Ŋmalɛ mli sane ko ni tswaa mɔ emaa shi lɛ he.
11, 12. Mɛni ji sɛɛnamɔi komɛi ni yɔɔ gbɛkɛ Weku Jamɔ ni afeɔ lɛ daa lɛ he?
11 Mɛɛ Sɛɛnamɔi yɔɔ Gbɛkɛ Weku Jamɔ ni Afeɔ lɛ Daa lɛ He? Mɛi ni jɛɔ tsui muu fɛɛ mli amɛkɛ amɛhe woɔ anɔkwa jamɔ mli lɛ bɛŋkɛɔ Yehowa kpaakpa. Kɛfata he lɛ, kɛ́ wekui fee ekome kɛja Yehowa lɛ, no wajeɔ wekukpaa ni yɔɔ amɛteŋ lɛ. Gbalashihilɛ mli hefatalɔi komɛi ŋma yɛ jɔɔmɔi ni amɛnáa lɛ he akɛ: “Akɛ gbalashihilɛ mli hefatalɔi ni fɔko ni sɔmɔɔ akɛ gbɛgbalɔi lɛ, wɔkɛ miishɛɛ babaoo kpaa wɔgbɛkɛ Weku Jamɔ lɛ gbɛ. Wɔnuɔ he akɛ wekukpaa ni yɔɔ wɔteŋ akɛ wu kɛ ŋa, kɛ agbɛnɛ hu, wɔ kɛ wɔŋwɛi Tsɛ lɛ teŋ lɛ mli miiwa. Amrɔ nɛɛ kɛ́ wɔte shi leebi yɛ gbi ni wɔto kɛha wɔnikasemɔ lɛ nɔ lɛ, wɔbiɔ wɔhe akɛ: ‘Kɛ okwɛ lɛ, mɛni wɔbaafee gbɛkɛ nɛɛ? Weku Jamɔ!’”
12 Gbɛkɛ Weku Jamɔ lɛ hu yeɔ ebuaa wekui ni bɛ dekã lɛ. Mami ko ni ji fɔlɔ mɔ kome mɔ ni ji daa gbɛgbalɔ ni yɔɔ bihii enyɔ lɛ ŋma akɛ: “Tsutsu ko lɛ, wɔweku nikasemɔ lɛ eyaaa nɔ jogbaŋŋ. Wɔnyɛɛɛ wɔfee lɛ daa, ni nɔ ni wɔnyɛɔ wɔfeɔ lɛ hu mɔɔɔ shi ejaakɛ no mli lɛ etɔ mi. Minaaa bɔ ni mafee maha eya nɔ jogbaŋŋ. No hewɔ lɛ, miiŋma kɛda nyɛ shi babaoo yɛ gbɛkɛ Weku Jamɔ lɛ hewɔ. Amrɔ nɛɛ, wɔnyɛɔ wɔfeɔ wɔweku nikasemɔ lɛ daa, ni wɔmiiná he sɛɛ.”
13. Mɛni baatsɔɔ bɔ ni oweku lɛ baaná gbɛjianɔtoo nɛɛ he sɛɛ eha?
13 Taakɛ Hejɔɔmɔ Gbi lɛ ji lɛ, gbɛkɛ Weku Jamɔ lɛ hu ji nikeenii ni jɛ wɔŋwɛi Tsɛ lɛ ŋɔɔ ni baanyɛ aye abua wekui. (Yak. 1:17) Bɔ ni wekui ni yɔɔ Israel lɛ fee amɛnii amɛha yɛ Hejɔɔmɔ Gbi lɛ nɔ lɛ ji nɔ ni tsɔɔ bɔ ni amɛná he sɛɛ yɛ mumɔŋ amɛha. Nakai nɔŋŋ hu bɔ ni wɔkɛ gbɛkɛ ni ato kɛha wɔ akɛ wɔkɛfee weku jamɔ lɛ tsuɔ nii wɔhaa lɛ ni baatsɔɔ bɔ ni wɔweku lɛ baaná he sɛɛ. (2 Kor. 9:6; Gal. 6:7, 8; Kol. 3:23, 24) Kɛ́ oweku lɛ kɛ gbɛjianɔtoo nɛɛ tsu nii jogbaŋŋ lɛ, nyɛbaanyɛ nyɛkɛɛ taakɛ lalatsɛ lɛ kɛɛ lɛ, akɛ: “Shi mi lɛ, Nyɔŋmɔ ŋɔɔ hilɛ hi ha mi; mikɛ Nuŋtsɔ Yehowa efee mibobaahe.”—Lala 73:28.
[Wiemɔ ni akɔ ni akɛmiitsu nii ni yɔɔ baafa 5]
Esaaa akɛ gbɛkɛ Weku Jamɔ lɛ feɔ kpɛŋŋ, shi moŋ esa akɛ efee nɔ ni yɔɔ miishɛɛ ejaakɛ Nyɔŋmɔ ni wɔjáa lɛ lɛ ji miishɛɛ Nyɔŋmɔ
[Akrabatsa ni yɔɔ baafa 6]
OKƐTO
Nibii Komɛi ni Obaanyɛ Ofee yɛ Gbɛkɛ Weku Jamɔ lɛ Mli
Biblia:
• Nyɛfea ekome kɛkanea daa otsi Biblia kanemɔ lɛ fã ko. Kɛji ŋmalɛ ni abaakane lɛ ji mɛi srɔtoi anaa wiemɔi lɛ, mɔ kome baanyɛ akane sanejajemɔ lɛ, ni mɛi krokomɛi akane mɛi ni yɔɔ ŋmalɛ lɛ mli lɛ anaa wiemɔi lɛ.
• Nyɛkɛ Biblia kanemɔ lɛ fã ko afea drama.
• Ha weku lɛ mlibii lɛ ateŋ mɔ fɛɛ mɔ atsɔ hiɛ akane Biblia kanemɔ kɛha otsi lɛ ni amɛŋmala sanebimɔ kome loo enyɔ ni amɛbaasumɔ ni amɛbi yɛ nɔ ni amɛkane lɛ he. No sɛɛ kɛ́ nyɛnaa bakpe shi lɛ, nyɛfea ekome kɛtaoa sanebimɔi lɛ eko fɛɛ eko hetoo.
• Daa otsi lɛ, ŋmalamɔ ŋmalɛ ko mli wiemɔi owo wolo ko nɔ ni nyɛbɔ mɔdɛŋ akɛ nyɛbaakase nyɛwo nyɛyitsoŋ, ni agbɛnɛ hu nyɛgbala mli. Nyɛbuaa woji nɛɛ anaa ni daa otsi lɛ nyɛpɛia mli ekoŋŋ nyɛkwɛa ŋmalɛi abɔ ni nyɛbaanyɛ nyɛkai.
• Nyɛboa Biblia kanemɔ ni arikɔdi lɛ toi ni nyɛnyiɛ sɛɛ yɛ nyɛ-Biblia lɛ mli.
Asafoŋ Kpeei:
• Nyɛfea ekome kɛsaa nyɛhe kɛha asafoŋ kpeei lɛ fã ko.
• Nyɛkasea Maŋtsɛyeli lalai ni abaala yɛ otsi ni nyiɛ sɛɛ lɛ mli lɛ alamɔ.
• Kɛ́ mɔ ko yɛ nifeemɔ ko yɛ Teokrase Sɔɔmɔ Skul lɛ mli loo nɔkwɛmɔnɔ ko yɛ Sɔɔmɔ Kpee lɛ mli lɛ, nyɛsusua bɔ ni ebaanyɛ efee lɛ eha lɛ he loo efee etsɔɔ weku muu lɛ.
Weku lɛ Hiamɔ Nii:
• Nyɛsusua nɔ ko he kɛjɛa Young People Ask loo Kasemɔ Nii Kɛjɛ Tsɔɔlɔ Kpele lɛ Ŋɔɔ woji lɛ amli.
• Nyɛfea bɔ ni abaafee atsu shihilɛ ko ni baanyɛ aba yɛ skul lɛ he nii lɛ he nɔkwɛmɔnɔ.
• Nyɛfea nɔkwɛmɔnɔ ko ni fɔlɔi lɛ baafee amɛnii tamɔ bii lɛ, ni bii lɛ hu baafee amɛnii tamɔ fɔlɔi lɛ yɛ mli. Bii lɛ baatao sane ko mli, ni no sɛɛ lɛ amɛkɛ fɔlɔi ni miifee amɛnii tamɔ bii lɛ asusu he.
Sɔɔmɔ Nitsumɔ:
• Nyɛfea shiɛmɔ wiemɔi ni nyɛkɛaatsu nii yɛ otsi lɛ naagbee lɛ ahe nɔkwɛmɔnii.
• Nyɛsusua otii ni nyɛweku lɛ baanyɛ ashɛ he ni nyɛbaanyɛ nyɛkɛmamɔ nyɛhiɛ koni nyɛkɛlɛɛ nyɛsɔɔmɔ nitsumɔ lɛ mli yɛ Kaimɔ be lɛ loo gbɛhamɔ loo hejɔɔmɔ beaŋ lɛ ahe.
• Ha weku lɛ mlibii lɛ ateŋ mɔ fɛɛ mɔ kɛ minitii fioo atao bɔ ni ebaaha sanebimɔi komɛi ni baanyɛ ate shi yɛ sɔɔmɔ nitsumɔ lɛ mli lɛ ahetoo, ni no sɛɛ lɛ, nyɛfea sanebimɔi srɔtoi lɛ ahe nɔkwɛmɔnii.
Nibii Krokomɛi:
• Nyɛfea ekome kɛkanea sane ko ni yɔɔ woji tɛtrɛbii ni ba nyɛsɛɛ nɛɛ nɔŋŋ lɛ amli.
• Ha weku lɛ mlibii lɛ ateŋ mɔ fɛɛ mɔ atsɔ hiɛ akane woji tɛtrɛbii ni eba nyɛsɛɛ nɛɛ nɔŋŋ lɛ amli sane ko ni enya he waa, ni no sɛɛ lɛ ebagba sane nɛɛ etsɔɔ.
• Yɛ be kɛ beaŋ lɛ, fɔ̃ɔ shiɛlɔ ko loo wu ko kɛ eŋa nine ni amɛbafata nyɛhe kɛfee nyɛgbɛkɛ Weku Jamɔ lɛ, ni kɛ́ eeehi po lɛ, nyɛbibii amɛ saji.
• Nyɛkwɛa wɔvidioi lɛ ateŋ eko ni nyɛsusua he.
• Nyɛfea ekome kɛsusua “Young People Ask” loo “For Family Review” ni yɔɔ Awake! lɛ mli lɛ he.
• Nyɛfea ekome kɛsusua “Tsɔɔmɔ Obii lɛ Anii” loo “Kɛha Oblahii kɛ Oblayei” ni yɔɔ Buu-Mɔɔ lɛ mli lɛ he.
• Nyɛkanea ni nyɛsusua Yearbook hee lɛ loo wolo ko ni ajie lɛ kpo yɛ kpokpaa wulu nɔ kpee ni nyɛtee nyɛsɛɛ nɛɛ nɔŋŋ lɛ shishi lɛ he.
• Kɛ́ nyɛtee kpokpaa wulu nɔ kpee loo kpokpaa nɔ kpee ko nyɛba lɛ, nyɛsusua emli otii lɛ ahe.
• Nyɛkɛ nyɛhiŋmɛii akwɛa Yehowa adebɔɔ nibii lɛ eko ni nyɛsusua nɔ ni etsɔɔ nyɛ yɛ Yehowa he lɛ he.
• Nyɛfea ekome kɛfea nɔ ko pɔtɛɛ tamɔ Noa adeka lɛ henɔ, shikpɔŋ he mfoniri ko, loo nyɛtɛŋa nɔ ko.