Sanebimɔhe

◼ Namɔ esa akɛ eŋmala coupon nɔ nii loo ebi kɛtsɔ Intanɛt lɛ nɔ ni akɛ lɛ akase nii?

Bei pii lɛ, akɛ coupon ní mɔ ko baanyɛ aŋmala nɔ nii ní ekɛmaje nitsumɔhe nine lɛ kɛbi koni amaje lɛ wolo loo ní aha Yehowa Odasefonyo ko kɛ lɛ abakase nii lɛ woɔ wɔwoji lɛ amli. Kɛfata he lɛ, mɔ ko baanyɛ abi kɛtsɔ wɔ-Wɛb saiti, ni ji www.watchtower.org lɛ nɔ koni akɛ lɛ abakase Biblia lɛ. Enɛɛmɛi miiye miibua mɛi babaoo ni amɛmiikase anɔkwale lɛ. Shi kɛlɛ, shiɛlɔi komɛi etsɔ enɛɛmɛi anɔ amɛto gbɛjianɔ koni aha amɛwekumɛi kɛ mɛi krokomɛi woji loo akɛ amɛ akase Biblia lɛ, ni enɛ kɛ naagbai eba.

Mɛi komɛi ni nitsumɔhe nine lɛ emaje amɛ woji ni amɛleee he nɔ ko lɛ ewie amɛshi enɛ, ejaakɛ amɛsusu akɛ wɔsafo lɛ miigba amɛnaa, ni ákɛ akɛ amɛ efata mɛi ni wɔsafo lɛ eto akɛ ebaamaje amɛ woji daa lɛ ahe. Mɛi komɛi ni jeee amɛ diɛŋtsɛ amɛbi akɛ aha mɔ ko aba amɛŋɔɔ lɛ amli woɔ la, ni enɛ woɔ shiɛlɔi ni abi ni amɛya amɛŋɔɔ lɛ hiɛgbele. Enɛ hewɔ lɛ, esa akɛ mɛi ni yɔɔ wiemɔ lɛ he miishɛɛ lɛ diɛŋtsɛ aŋmala coupon lɛ nɔ nii loo amɛbi kɛtsɔ wɔ-Wɛb saiti lɛ nɔ ni akɛ amɛ abakase nii, ni esaaa akɛ shiɛlɔi feɔ enɛ amɛhaa mɛi. Kɛ́ nitsumɔhe nine lɛ na akɛ shiɛlɔ ko ji mɔ ni fee enɛ eha mɔ ko lɛ, bei pii lɛ, atsuŋ he nii.

Belɛ, mɛɛ gbɛ nɔ wɔɔtsɔ wɔye wɔbua wɔwekunyo ko loo mɔ ko ni wɔle lɛ lɛ yɛ mumɔŋ? Kɛ́ ootao ni enine ashɛ wolo ko nɔ lɛ, mɛni hewɔ bo diɛŋtsɛ okɛmajeee lɛ akɛ nikeenii? Kɛ́ ená wiemɔ lɛ he miishɛɛ ni eesumɔ ni Odasefoi abasara lɛ, shi oleee bɔ ni ooofee onine ashɛ asafoŋ onukpai ni yɔɔ he ni eyɔɔ lɛ anɔ lɛ, no lɛ esa akɛ oŋma Please Follow Up (S-43) wolo lɛ nɔ nii ni okɛha osafoŋ woloŋmalɔ lɛ, ni kɛ́ ekwɛ mli egbe naa lɛ, ekɛbaamaje nitsumɔhe nine lɛ. Shi kɛ́ awo mɔ ni yɔɔ wiemɔ lɛ he miishɛɛ lɛ tsuŋ, eyɛ he ni akwɛɔ mɛi ni kɛ tsofai tsuɔ nii yɛ gbɛ ni ejaaa nɔ, loo ekã helatsamɔhe lɛ, esaaa akɛ oŋmaaa kɛyaa nitsumɔhe nine lɛ yɛ enajiaŋ akɛ aye abua lɛ. Yɛ no najiaŋ lɛ, obaanyɛ owo lɛ hewalɛ ni ena nyɛmimɛi ni baa he ni eyɔɔ lɛ, loo lɛ diɛŋtsɛ eŋma kɛya nitsumɔhe nine lɛ.