Okɛ Ekãa Aye Odase yɛ Shikpɔŋkuku ni Nitsumɔhei Yɔɔ mli lɛ Mli
1. Mɛni hewɔ esaaa akɛ wɔnijiaŋ jeɔ wui kɛ́ wɔsheɔ gbeyei akɛ wɔɔshiɛ yɛ nitsumɔhei?
1 Ani osheɔ gbeyei akɛ obaaye odase yɛ nitsumɔhei? Kɛ́ nakai ni lɛ, onijiaŋ akaje wui, ejaakɛ ehe bahia ni Paulo ni ji shiɛlɔ ni yɔɔ ekãa ni sheee gbeyei lɛ po ‘aná ekãa’ kɛshiɛ. (1 Tes. 2:2) Naa naagbai komɛi ni mɛi kɛfɔɔ kpee kɛ ŋaawoi ni sa ni abaanyɛ akɛtsu amɛhe nii.
2. Mɛni hewɔ esaaa akɛ wɔsusuɔ akɛ nitsulɔi lɛ amli baafũ wɔ lɛ?
2 Ani Nitsulɔi lɛ Amli Baafũ kɛ́ Okɛ Amɛ Wie Fioo? Yɛ nitsumɔhei babaoo lɛ, nitsulɔi lɛ sɔmɔɔ maŋbii lɛ, no hewɔ lɛ amɛkpaa gbɛ akɛ mɛi kɛ amɛ baabawie be mli ni amɛtsuɔ nii lɛ. Bei pii lɛ, amɛbaatse amɛhiɛ amɛha bo ejaakɛ ekolɛ amɛbaasusu akɛ ooba okɛ amɛ abaye jara. Kɛ́ otade kɛ ohesaamɔ sa jogbaŋŋ ni ofee ohiɛ ŋmɔlɔŋmɔlɔ lɛ, no baaha amɛkɛ bulɛ aha bo.
3. Mɛni esa akɛ wɔfee koni wɔkawo nihelɔi lɛ amli la?
3 Ani Esa akɛ Mashiɛ yɛ Nihelɔi Babaoo Ahiɛ? Kɛ́ eeehi lɛ, kwɛmɔ be ni mɛi faaa yɛ shwapoi lɛ anaa, tamɔ kɛ́ agbele shwapo lɛ naa nɔŋŋ nɛkɛ. Kɛ́ okɛ mɔ ni kwɛɔ shwapo lɛ nɔ loo mɔ ni hɔɔ nibii lɛ baagba sane lɛ, mɛɛ kɛyashi ooona akɛ mɔ ko bɛ emasɛi dã. Ha oshiɛmɔ wiemɔ lɛ afee kuku.
4. Kɛ́ wɔmiishiɛ yɛ nitsumɔhei lɛ, mɛni wɔbaanyɛ wɔkɛɛ?
4 Mɛni Mawie? Kɛ́ nitsulɔi lɛ ayi fa lɛ, okɛ mɔ ni kwɛɔ nitsumɔ lɛ nɔ lɛ awie. Obaanyɛ okɛɛ akɛ: “Ewa akɛ wɔnine baashɛ nitsulɔi anɔ yɛ amɛshĩai, no hewɔ ni wɔba oŋɔɔ yɛ onitsumɔhe lɛ. Akɛni ootsu nii hewɔ lɛ, mafo miwiemɔ lɛ kuku.” Bɔni afee ni akasusu akɛ wɔmiihɔɔ nii lɛ, bei pii lɛ ehi jogbaŋŋ akɛ wɔkatsĩ oniatsumɔ gbɛjianɔtoo lɛ tã, ja abi wɔ bɔ ni feɔ ni wɔnáa shika kɛfiɔ wɔnitsumɔ lɛ sɛɛ dã. Obaanyɛ obi mɔ ni kwɛɔ nitsumɔ lɛ nɔ lɛ gbɛ koni okɛ nitsulɔi lɛ awie kuku, shi no baajɛ bɔ ni nitsumɔ lɛ yɔɔ ha. Shiɛmɔ oha amɛ hu. Kɛ́ ona akɛ nitsulɔ ko bɛ dekã kwraa lɛ, foo oshiɛmɔ wiemɔ lɛ kuku ni oshi dɛhiɛmɔ wolo ko oha lɛ. Kɛ́ aŋmɛɛɛ gbɛ ni okɛ nitsulɔi lɛ awie lɛ, ekolɛ abaaha oshi wolo oha amɛ yɛ he ni amɛjɔɔ amɛhe yɛ lɛ.
5. Mɛɛ yiŋtoi ahewɔ esa akɛ wɔkɛ ekãa aye odase yɛ nitsumɔhei lɛ?
5 Yesu kɛ Paulo fɛɛ kɛ ekãa shiɛ ha mɛi yɛ mɛi lɛ anitsumɔhei, ni bo hu obaanyɛ ofee nakai. (Mat. 4:18-21; 9:9; Bɔf. 17:17) Bi Yehowa koni eye ebua bo ni otsui akafã, ni ofee ekãa. (Bɔf. 4:29) Efɔɔɔ kaa akɛ wɔbaaya shikpɔŋkukuji ni nitsumɔhei yɔɔ mli lɛ amli ni wɔnaaa mɛi, no hewɔ lɛ, mɛni hewɔ okaaa shiɛmɔ gbɛ ni woɔ yibii babaoo nɛɛ okwɛɛɛ?