‘Nyɛkɛ Gbɔmɛi Fɛɛ Ahia Shi yɛ Toiŋjɔlɛ Mli’
1. Mɛɛ Biblia mli ŋaawoo esa akɛ wɔkɛtsu nii kɛ́ wɔkɛ shiatsɛmɛi ni mli efu kpe?
1 Yehowa webii sumɔɔ toiŋjɔlɛ, ni wɔshiɛmɔ nitsumɔ lɛ ji toiŋjɔlɛ nɔ. (Yes. 52:7) Kɛlɛ, bei komɛi lɛ, mɛi amli fuɔ wɔ akɛni wɔba amɛŋɔɔ lɛ hewɔ. Mɛni baaye abua wɔ koni wɔkɛ mɛi ahi shi yɛ toiŋjɔlɛ mli yɛ shihilɛi ni tamɔ nɛkɛ mli?—Rom. 12:18.
2. Mɛni hewɔ ehe hiaa ni wɔkɛ sɛɛyoomɔ atsu nii lɛ?
2 Okɛ Sɛɛyoomɔ Atsu Nii: Eyɛ mli akɛ mɛi komɛi amli fuɔ wɔ akɛni amɛsumɔɔɔ anɔkwale lɛ hewɔ moŋ, shi mɛi krokomɛi hu amli fuɔ yɛ saji krokomɛi ni kɔɔɔ wɔsane lɛ he. Ekolɛ be ni wɔkɛba jɛmɛ lɛ ehiii haaa amɛ. Ekolɛ lɛ diɛŋtsɛ esaji komɛi ni gbáa enaa lɛ hewɔ ni emli efu lɛ. Kɛ́ sanekpakpa lɛ hewɔ po ni emli efu lɛ, esa akɛ wɔkai akɛ ekolɛ lakamɔ ni alaka lɛ lɛ hewɔ efeɔ enii nakai lɛ. (2 Kor. 4:4) Kɛ́ wɔkɛ sɛɛyoomɔ tsu nii lɛ ebaaye ebua wɔ ni wɔfee kpoo ni wɔyɔse akɛ jeee wɔ emli efu lɛ.—Abɛi 19:11.
3. Mɛɛ gbɛ nɔ wɔɔtsɔ wɔjie bulɛ kpo wɔtsɔɔ shiatsɛ lɛ?
3 Jiemɔ Bulɛ Kpo: Mɛi ni yɔɔ shikpɔŋkuku lɛ mli lɛ ateŋ babaoo yɛ hemɔkɛyeli ni mli wa yɛ nibii komɛi ahe. (2 Kor. 10:4) Amɛyɛ hegbɛ akɛ amɛaabo wɔ toi loo amɛboŋ wɔ toi. Esaaa akɛ wɔbaa nibii ni shiatsɛmɛi lɛ heɔ amɛyeɔ lɛ ashi kɔkɔɔkɔ loo ní wɔɔha amɛnu he akɛ wɔle Biblia lɛ mli fe amɛ. Kɛ́ amɛkɛɛ wɔ akɛ wɔshi lɛ, esa akɛ wɔjɛ bulɛ mli wɔshi.
4. Kɛ́ akɛɛ wɔwiemɔ he aba nyam lɛ, te atsɔɔ tɛŋŋ?
4 Okɛ Wiemɔ ni Yɔɔ Nyam Atsu Nii: Kɛ́ ajɛ wɔ po lɛ, esa akɛ wɔha nɔ ni wɔbaawie lɛ he aba nyam, ni wɔfee kpoo. (Kol. 4:6; 1 Pet. 2:23) Nɔ najiaŋ ni wɔkɛ amɛ baaje ŋwane lɛ, esa akɛ wɔbɔ mɔdɛŋ wɔtao nɔ ko ni wɔkɛ amɛ kpãa gbee yɛ he. Ekolɛ wɔbaanyɛ wɔjɛ mlihilɛ mli wɔbi shiatsɛ lɛ nɔ hewɔ ni esumɔɔɔ akɛ eboɔ wɔsane lɛ toi lɛ. Bɔni afee wɔkaha emli fu waa lɛ, bei komɛi lɛ ebaafee nɔ ni hi jogbaŋŋ akɛ wɔɔfo sanegbaa lɛ sɛɛ.—Abɛi 9:7; 17:14.
5. Kɛ́ wɔfee kpoo yɛ shiɛmɔ lɛ mli lɛ mɛɛ sɛɛ wɔnáa?
5 Kɛ́ wɔfee kpoo lɛ, ekolɛ shiatsɛ lɛ baakai bɔ ni wɔfee wɔnii wɔha lɛ ni ebaabo sane lɛ toi kɛ́ mɔ ko bɔ mɔdɛŋ eye lɛ odase be kroko. (Rom. 12:20, 21) Kɛ́ wɔna akɛ esumɔɔɔ wɔsane kwraa po lɛ, ekolɛ be ko baashɛ ni ebaatsɔ wɔnyɛmi. (Gal. 1:13, 14) Kɛ́ ebalɛ akɛ ejieee miishɛɛ kpo yɛ anɔkwale lɛ he kwraa po lɛ, wɔbaawo Yehowa hiɛ nyam ni wɔbaawula wɔnitsɔɔmɔ lɛ kɛ́ wɔtee nɔ wɔye wɔhe nɔ ni wɔkɛ mɛi hi shi yɛ toiŋjɔlɛ mli.—2 Kor. 6:3.