‘Ye Odase Fitsofitso’
1. Mɛɛ nɔkwɛmɔnɔ kpakpa Bɔfo Paulo fee yɛ shiɛmɔ nitsumɔ lɛ mli?
1 “Tsu osɔɔmɔ nitsumɔ lɛ fitsofitso.” (2 Tim. 4:5, Byington) Ekã shi faŋŋ akɛ bɔfo Paulo yɛ wiemɔ mli heyeli yɛ wiemɔ ni ekɛha Timoteo nɛɛ mli. Anɔkwa, kɛjɛ afi 47 Ŋ.B. kɛyashi afi 56 Ŋ.B. lɛ, Paulo gbe maŋsɛɛ sɔɔmɔ nitsumɔi etɛ anaa. Bɔfoi lɛ Asaji lɛ tsĩɔ tã shii abɔ akɛ Paulo ‘ye odase fitsofitso.’ (Bɔf. 23:11; 28:23) Mɛɛ gbɛ nɔ wɔbaanyɛ wɔtsɔ wɔfee nakai ŋmɛnɛ?
2. Te wɔbaafee tɛŋŋ wɔye odase fitsofitso beni wɔshiɛɔ yɛ shĩa kɛ shĩa lɛ?
2 Yɛ Shĩa kɛ Shĩa: Beni wɔbɔɔ mɔdɛŋ akɛ wɔbaaya wɔyashiɛ wɔha mɛi ni nuko sanekpakpa lɛ dã lɛ, ekolɛ ehe baahia ni wɔtsake bei ni wɔkɛyaa amɛŋɔɔ lɛ mli. Ekolɛ, nuu ni yɔɔ shĩa lɛ hiɔ shĩa gbɛkɛnaashi loo otsi lɛ naagbee. Esa akɛ wɔbɔ mɔdɛŋ akɛ wɔkɛ mɔ ko kɛ̃ baawie yɛ shĩa fɛɛ shĩa, koni wɔku wɔsɛɛ shii abɔ wɔya mɛi ni wɔnine shɛɛɛ amɛnɔ yɛ shĩai lɛ aŋɔɔ. Ni kɛ́ mɔdɛŋ ni obɔɔ akɛ onine ashɛ mɔ ko nɔ lɛ yeee omanye hu? Ekolɛ, kɛ́ oŋma mɔ lɛ wolo loo otswa lɛ tɛlifoŋ lɛ, ebaawo yibii kpakpai.
3. Mɛɛ hegbɛi oyɔɔ ni okɛbaaye odase yɛ blohuiaŋ loo jaji anɔ kɛ beni onyiɛɛɛ shiɛmɔ nɔ?
3 Blohuiaŋ loo Jaji Anɔ kɛ Beni Onyiɛɛɛ Shiɛmɔ Nɔ: Ŋmɛnɛ lɛ, Yehowa tsuji haa mɛi fɛɛ ni boɔ amɛ toi lɛ náa ‘anɔkwa nilee.’ Bei komɛi lɛ, enɛ baa “yɛ blohuiaŋ” loo “yɛ jaji anɔ.” (Abɛi 1:20, 21) Be fɛɛ be ni wɔyaa wɔbaa lɛ, ani wɔhaa wɔhiɛ hiɔ wɔhe nɔ akɛ wɔbaaye mɛi odase? Ani abaanyɛ akɛɛ yɛ wɔhe akɛ ‘wɔhiɛ dɔɔ yɛ wiemɔ lɛ he’? (Bɔf. 18:5) Kɛ́ nakai ni lɛ, belɛ wɔmiitsu sɔ̃ ni kã wɔnɔ akɛ ‘wɔye odase fitsofitso’ lɛ he nii.—Bɔf. 10:42; 17:17; 20:20, 21, 24.
4. Mɛɛ gbɛ nɔ sɔlemɔ kɛ sanenɔjwɛŋmɔ yeɔ ebuaa wɔ ni wɔyeɔ odase fitsofitso?
4 Kɛlɛ bei komɛi lɛ, ekolɛ wɔgbɔjɔmɔi tamɔ gbɔmɔ gbeyeishemɔ kɛ ekrokomɛi ni tamɔ nakai loo wɔhiɛ ni gboɔ hewɔ lɛ, ebaawa kɛha wɔ akɛ wɔbaaye odase. Anɔkwa sane ji akɛ Yehowa le wɔfatɔi. (Lala 103:14) Fɛɛ sɛɛ lɛ, kɛ́ ebalɛ nakai lɛ, wɔbaanyɛ wɔsɔle wɔbi Yehowa koni eha wɔná ekãa kɛwie. (Bɔf. 4:29, 31) Kɛfata he lɛ, kɛ́ wɔmiifee aŋkro nikasemɔ ni wɔmiijwɛŋ Nyɔŋmɔ Wiemɔ lɛ nɔ lɛ, wɔbaanyɛ wɔkɛfee oti ni ma wɔhiɛ akɛ wɔbaaha hiɛsɔɔ ni wɔyɔɔ kɛha sanekpakpa ni nɔ bɛ lɛ aya hiɛ. (Fil. 3:8) Enɛ baaha wɔkɛ ekãa ajaje sanekpakpa lɛ!
5. Te wɔbaafee tɛŋŋ wɔná Yoel gbalɛ lɛ mlibaa mli gbɛfaŋnɔ?
5 Yoel gbalɛ lɛ tsɔɔ mli akɛ dani Yehowa gbi wulu ni yɔɔ gbeyei lɛ baaba lɛ, Nyɔŋmɔ webii lɛ baaya nɔ amɛshiɛ, ni amɛhaŋ nɔ ko kwraa atsĩ amɛshiɛmɔ lɛ naa. (Yoel 2:2, 7-9) Nyɛhaa wɔfea nɔ fɛɛ nɔ ni wɔbaanyɛ koni wɔkɛ wɔhe awo odaseyeli nitsumɔ ni akuŋ sɛɛ atsuŋ dɔŋŋ nɛɛ mli!