Okɛ Mɔdɛŋbɔɔ ‘Aye Odase Kɛmɔ Shi’
1, 2. Mɛni saa ohiɛ yɛ bɔ ni Paulo susu sanekpakpa lɛ shiɛmɔ he eha lɛ hewɔ, ni te wɔɔfee tɛŋŋ wɔkase enɔkwɛmɔnɔ lɛ yɛ bɔ ni ‘eye odase kɛmɔ shi’ lɛ he lɛ?
1 Taakɛ Yesu kɛ blema tsuji anɔkwafoi krokomɛi pii ji lɛ, bɔfo Paulo hu ji sanekpakpa shiɛlɔ ni yɔɔ ekãa, ‘eye odase kɛmɔ shi’ ni bɔ ni shihilɛ lɛ ji lɛ kɔɔɔ he eko. Yɛ be mli ni awo lɛ tsuŋ yɛ shia po lɛ, “ehereɔ mɛi fɛɛ ní baa eŋɔɔ lɛ, ni eshiɛɔ Nyɔŋmɔ maŋtsɛyeli lɛ he sane lɛ, ni ekɛ ekãa fɛɛ jajeɔ Nuŋtsɔ Yesu Kristo he saji lɛ etsɔɔ amɛ, ni mɔ ko mɔ ko etsĩii lɛ gbɛ.”—Bɔf. 28:16-31.
2 Wɔ hu wɔbaanyɛ ni wɔkɛ mɔdɛŋbɔɔ ‘aye odase kɛmɔ shi’ yɛ bei fɛɛ mli. Nɔ ni fata enɛ he ji odase ni wɔɔye gbɔmɛi ni wɔkɛ amɛ kpeɔ beni wɔfãa gbɛ kɛyaa kɛbaa yɛ kpeei bibii ashishi kɛ “Okɛ Anunyam Aha Nyɔŋmɔ” Kpokpaa Wulu nɔ Kpee lɛ shishi kɛ agbɛnɛ beni wɔyɔɔ maŋ ni afeɔ kpee lɛ yɛ mli lɛ.—Bɔf. 28:23; Lala 145:10-13.
3. Te wɔɔfee tɛŋŋ wɔkwɛ jogbaŋŋ koni wɔ trukaa odaseyeli lɛ akatsɔ nɔ ni atoko he gbɛjianɔ lɛ he mɔdɛŋbɔɔ ko kɛkɛ?
3 Odaseyeli ni Atoko He Gbɛjianɔ loo Trukaa Odaseyeli? Ani srɔto yɛ mli? Hɛɛ. Nɔ ko ni atoko he gbɛjianɔ lɛ baa kɛkɛ yɛ heniianaa loo nɔ ko ni agbalako jwɛŋmɔ kɛyako nɔ, tamɔ nɔ ni atoko he gbɛjianɔ loo ehe ehiaaa. Yɛ anɔkwale mli lɛ enɛ jeee wɔsɔɔmɔ lɛ mlitsɔɔmɔ. Taakɛ eji anɔkwale yɛ Paulo gbɛfaŋ lɛ, anunyam ni wɔkɛhaa Nyɔŋmɔ kɛtsɔɔ wɔ odaseyeli lɛ nɔ lɛ he hiaa wɔ, ni esa akɛ wɔkɛfee wɔjwɛŋmɔ akɛ wɔbaaye odase yɛ he fɛɛ he ni sa, yɛ wɔgbɛfãai amli afi nɛɛ. Shi kɛlɛ, abaanyɛ atsɔɔ gbɛ ni wɔtsɔɔ nɔ wɔyaa mɛi aŋɔɔ lɛ mli yɛ gbɛ ni ja nɔ akɛ trukaa—ni ji akɛ, nɔ ni yɔɔ miishɛɛ, naanyobɔɔ su yɛ mli, ni yɔɔ adebɔɔ naa. Gbɛ ni tamɔ nɛkɛ baanyɛ awo yibii kpakpai.
4. Mɛni ha Paulo nyɛ eye odase yɛ he ni eyahi lɛ?
4 Saamɔ Ohe Koni Oye Odase: Ehe bahia ni Paulo atao hegbɛi ni eeetsɔ nɔ ekɛye odase beni awo lɛ tsuŋ yɛ shia yɛ Roma lɛ. Ekɛ hegbɛ ni eyɔɔ lɛ tsu nii ni ekɛfɔ nine etsɛ Yudafoi ajamɔ mli hiɛnyiɛlɔi ni yɔɔ maŋ lɛ mli lɛ koni amɛba shia ni eyɔɔ mli lɛ. (Bɔf. 28:17) Eyɛ mli akɛ Kristofoi asafo ko yɛ Roma moŋ, shi Paulo ná le akɛ Kristofoi ahemɔkɛyeli lɛ he saji fioo ko pɛ Yudafoi akutso ni yɔɔ nakai maŋtiase lɛ mli lɛ yɔɔ. (Bɔf. 28:22; Rom. 1:7) Ekpaaa Yesu Kristo kɛ Nyɔŋmɔ Maŋtsɛyeli lɛ he ‘odase ni eyeɔ kɛmɔɔ shi’ lɛ.
5, 6. Mɛɛ hegbɛi wɔbaanyɛ wɔna ni wɔkɛye trukaa odase, ni mɛɛ hesaamɔi wɔbaanyɛ wɔfee bɔni afee ni wɔfee nakai kɛmɔ shi?
5 Tsɔ hiɛ osusu gbɔmɛi fɛɛ ni ekolɛ okɛ amɛ baakpe yɛ ogbɛfãai amli, ni Yehowa Odasefoi ahe nilee fioo ko pɛ amɛyɔɔ lɛ ahe. Ekolɛ amɛleee po akɛ wɔkɛ mɛi feɔ shia Biblia mli nikasemɔi ni wɔheee nɔ ko. Ha ohiɛ ahi ohe nɔ yɛ hegbɛi ni onáa koni okɛye mɛi ni okɛkpeɔ lɛ odase yɛ be mli ni ofãa gbɛ, yɛ he ni omɛɔ yɛ fioo koni ojɔɔ ohe, beni oheɔ pɛtro, beni oheɔ nii, beni oyahi gbɔiatoohei, beni oyeɔ nii yɛ niyelihei, beni ota bɔɔs mli, kɛ ekrokomɛi lɛ ahe. Jwɛŋmɔ nɔ ni obaakɛɛ koni okɛje sanegbaa shishi ni otsɔ mli oye odase kuku lɛ he. Ekolɛ obaanyɛ oka enɛ feemɔ yɛ gbii ni jwere ohiɛ lɛ amli kɛtsɔ trukaa odase ni oooye akutsoŋbii, wekumɛi, nanemɛi nitsulɔi, kɛ mɛi krokomɛi ni ole amɛ lɛ nɔ.
6 Woji srɔtoi abɔ ahe baahia bo ni okɛtsu nii beni oyeɔ trukaa odase lɛ. Te emli nɔ ni ji? Obaanyɛ ni okɛ dɛhiɛmɔ wolo, Ani Obaasumɔ ni Ole Biblia lɛ Mli Saji Babaoo? lɛ atsu nii. Gbalamɔ jwɛŋmɔ kɛya klɛŋklɛŋ kukuji enumɔ lɛ nɔ, yɛ he ni átsɔɔ yiŋtoi srɔtoi ahewɔ ni esa akɛ akane Biblia lɛ yɛ lɛ. Okɛ esɛɛgbɛ wolo ni akɛbiɔ shia Biblia mli nikasemɔ ni aheee nɔ ko yɛ he lɛ atsɔɔ lɛ. Kɛji akɛ oná mɔ ko ni nyãa he lɛ, okɛ Taoɔ wolo bibioo lɛ aha lɛ. Akɛni okpaa gbɛ akɛ okɛ gbɔmɛi ni wieɔ wiemɔ kroko baakpe hewɔ lɛ, okɛ wolo bibioo ni ji Good News for All Nations lɛ afata ohe kɛya. Baafa 2 lɛ tsɔɔ bɔ ni akɛtsuɔ nii yɛ odaseyeli mli. Kɛji akɛ okɛ kar miifa gbɛ lɛ, obaanyɛ okɔlɔ woji krokomɛi fioo ko kɛha mɛi ni jieɔ miishɛɛ diɛŋtsɛ kpo yɛ Maŋtsɛyeli shɛɛ sane lɛ he lɛ.
7, 8. Mɛɛ kɔkɔbɔɔ ni kɔɔ wɔhesaamɔ kɛ wɔjeŋba he esa akɛ wɔbo toi beni wɔfãa gbɛ lɛ kɛ beni akpa kpee?
7 Kwɛmɔ Ohesaamɔ kɛ Jeŋba Jogbaŋŋ: Esa akɛ wɔkwɛ jogbaŋŋ koni wɔjeŋba kɛ agbɛnɛ wɔ atadewoo kɛ hesaamɔ akaha mɛi krokomɛi miiná wɔhe jwɛŋmɔ fɔŋ, aloo ni eeeha ‘amɛwie amɛshi’ Yehowa gbɛjianɔtoo lɛ. (Bɔf. 28:22) Jeee yɛ be mli ni wɔyaa kpeei bibii kɛ kpeei wuji pɛ, shi beni wɔfaa gbɛ kɛ beni akpa kpee lɛ hu. August 1, 2002 Buu-Mɔɔ lɛ bɔ kɔkɔ yɛ baafa 18, kuku 14 akɛ: “Esaaa akɛ wɔhesaamɔ feɔ hwanyaŋŋ, nɔ ni yɔɔ srɔto kwraa, nɔ ni teeɔ bɔlɛnamɔ akɔnɔ shi, nɔ ni tɛŋɔ gbɔmɔtso lɛ, loo nɔ ni diɔ nɔ ni eba nɔ ehee lɛ sɛɛ ŋmiiŋmi. Kɛfata he lɛ, esa akɛ wɔsaa wɔhe yɛ gbɛ ni jieɔ ‘Nyɔŋmɔ gbeyeishemɔ’ kpo lɛ nɔ. No teeɔ sane hesusumɔ shi, aloo jeee nakai? Sane lɛ jeee ni asaa he bɔ ni sa beni ayaa asafoŋ kpeei [loo kpeei wuji] kɛkɛ, ni no sɛɛ lɛ asaa he eko-kɛ-eko kɛkɛ yɛ bei krokomɛi amli. Esa akɛ wɔ diɛŋtsɛ wɔhesaamɔ lɛ atsɔɔ be fɛɛ be akɛ wɔjieɔ nifeemɔ ni tsɔɔ Nyɔŋmɔ gbeyeishemɔ kɛ woo kpo ejaakɛ wɔji mɛi ni hiɔ shi akɛ Kristofoi kɛ sɔɔlɔi ŋmɛlɛtswai 24 gbi fɛɛ gbi.”—1 Tim. 2:9, 10.
8 Esa akɛ wɔkɛ hiɛshikamɔ kɛ woo asaa wɔhe. Kɛji akɛ wɔhesaamɔ kɛ wɔjeŋba jieɔ Nyɔŋmɔ ni wɔheɔ lɛ wɔyeɔ lɛ kpo be fɛɛ be lɛ, no lɛ wɔnuŋ he kɔkɔɔkɔ akɛ esa akɛ wɔkpa trukaa odaseyeli, akɛni wɔhesaamɔ jeee nɔ ni sa hiɛ hewɔ.—1 Pet. 3:15.
9. Mɛɛ omanye Paulo ye yɛ odaseyeli mli yɛ Roma?
9 Trukaa Odaseyeli Woɔ Yibii: Yɛ afii enyɔ ni Paulo kɛhi shia akɛ gboklɛfonyo yɛ Roma lɛ mli lɛ, ena yibii kpakpai ni jɛ mɔdɛŋ ni ebɔ yɛ odase ni eye lɛ mli ba lɛ. Luka bɔ amaniɛ akɛ, “mɛi komɛi hé wiemɔ ní ewie lɛ amɛye.” (Bɔf. 28:24) Paulo diɛŋtsɛ ŋmɛ bɔ ni ‘odase ni eye jogbaŋŋ lɛ’ mɔɔ shi lɛ ekwɛ beni eŋma akɛ: “Saji ni ba minɔ lɛ eha sanekpakpa lɛ eshwere moŋ, ni eha mikpãai lɛ eje shi faŋŋ yɛ Kristo mli yɛ Pretorio (Kaisare asraafoi amɔ̃ɔ) lɛ mli fɛɛ kɛ mɛi ni eshwɛ lɛ fɛɛ ateŋ, ni nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo etsɔ mikpãai lɛ anɔ ená ekãa babaoo fe tsutsu lɛ kɛmiijaje Nyɔŋmɔ wiemɔ lɛ ni amɛsheee gbeyei.”—Fil. 1:12-14.
10. Mɛɛ odaseyeli mli omanye wu kɛ ŋa ko ye yɛ nyɛsɛɛ afi lɛ mli?
10 Yɛ nyɛsɛɛ afi lɛ mli lɛ, wu kɛ ŋa ko ná niiashikpamɔ ko ni wo yibii beni amɛye nitsulɔ ko ni bi amɛ sane yɛ wolo ni tsɛ amɛtsitsi naa yɛ kpokpaa wulu nɔ kpee lɛ shishi lɛ he lɛ. Amɛgba lɛ kpokpaa wulu nɔ kpee lɛ he sane kɛ agbɛnɛ hu hiɛnɔkamɔ ni Biblia lɛ kɛhaa adesai awɔsɛɛ be lɛ he sane. Amɛha lɛ dɛhiɛmɔ wolo ni ji Ani Obaasumɔ ni Ole Biblia lɛ Mli Saji Babaoo? lɛ eko, ni amɛtsɔɔ lɛ shia Biblia mli nikasemɔ he gbɛjianɔtoo ni aheee nɔ ko lɛ mli. Yoo lɛ kɛɛ eesumɔ ni mɔ ko abasara lɛ, ni eŋma egbɛi kɛ adrɛs ewo dɛhiɛmɔ wolo lɛ sɛɛ, ni ebi ni gbalashihilɛ mli hefatalɔi lɛ ato he gbɛjianɔ. Mɛɛ omanye ekolɛ obaaná mli ŋɔɔmɔ afi nɛɛ kɛtsɔ mɔdɛŋbɔɔ ni ‘okɛaaye odase kɛmɔ shi’ lɛ nɔ?
11. Mɛɛ hesaai esa akɛ wɔná bɔni afee ni wɔha sanekpakpa lɛ aya hiɛ afi nɛɛ kɛtsɔ ‘odase ni wɔɔye kɛmɔ shi’ lɛ nɔ?
11 Ha Sanekpakpa lɛ Aya Hiɛ Kɛmɔ Shi Kwraa: Susumɔ bɔ ni Paulo ná miishɛɛ eha, beni enu akɛ nanemɛi Kristofoi lɛ miikase ekãa he nɔkwɛmɔnɔ ni efee lɛ! Eba akɛ wɔɔfee nɔ fɛɛ nɔ ni wɔɔnyɛ ni wɔkɛha sanekpakpa lɛ aya hiɛ kɛtsɔ wɔhemɔkɛyelii ni damɔ Biblia lɛ nɔ lɛ he trukaa odase ni wɔɔye lɛ nɔ, yɛ be mli ni wɔ hu wɔnáa afi nɛɛ teokrase henaabuamɔi ahe sɛɛ lɛ.
[Caption on page 3]
Woji ni He Hiaa Kɛha Trukaa Odaseyeli
■ Ani Obaasumɔ ni Ole Biblia lɛ Mli Saji Babaoo? (dɛhiɛmɔ wolo)
■ Mɛni Nyɔŋmɔ Taoɔ yɛ Wɔdɛŋ? (wolo bibioo)
■ Good News for All Nations (wolo bibioo)
■ Woji krokomɛi ni he hiaa