‘Nyɛsumɔa Nyɛnyɛmimɛi lɛ Fɛɛ’
Ajɛ mumɔŋ aŋma saneyitso nɛɛ mli wiemɔi lɛ aaafee afii akpei enyɔ ni eho nɛ. (1 Pet. 2:17) Shi ehe miihia ni wɔkɛ wiemɔi nɛɛ atsu nii amrɔ nɛɛ fe be fɛɛ ni eho! Te wɔbaafee tɛŋŋ wɔsumɔ nɔ ko kpele tamɔ nyɛmimɛi ni yɔɔ je lɛŋ fɛɛ lɛ? Ni te wɔbaafee tɛŋŋ koni yɛ jeŋ ni suɔmɔ bɛ mli nɛɛ mli lɛ, wɔkwɛ ni wɔsuɔmɔ lɛ he akajɔ lɛ? (Mat. 24:12) Beni okwɛɔ vidio ni ji Our Whole Association of Brothers lɛ, kwɛmɔ kɛji obaanyɛ oha sanebimɔi ni nyiɛ sɛɛ nɛɛ ahetoo lo.
(1) Mɛɛ be tuuntu wɔbatsɔmɔɔ wɔ-Kristofoi anyɛmifeemɔ lɛ mli bii? (2) Mɛɛ nibii etɛ wɔkɛ wɔnyɛmimɛi ni yɔɔ je lɛŋ fɛɛ lɛ náa mli gbɛfaŋnɔ? (3) Mɛɛ gbɛ nɔ wɔnyɛmimɛi lɛ haa anaa amɛfaishitswaa akɛ amɛbaashiɛ yɛ (a) Alaska ŋa lɛ nɔ, (b) Yuropa lɛjiadaamɔhe wuji lɛ, kɛ (d) Peru koo haai lɛ amli? (4) Mɛni hewɔ esaaa akɛ wɔnuɔ he akɛ shiɛmɔ nitsumɔ lɛ ji nitsumɔ ko kɛkɛ lɛ? (5) Ha nɔkwɛmɔnɔ ni tsɔɔ akɛ Yehowa Odasefoi shɛjeshɛjeɔ amɛmii ni amɛyeɔ amɛbuaa amɛhe beni (a) shikpɔŋhosomɔ ko eba, (b) lasuogbele ko eba, kɛ beni (d) maŋ ta miiya nɔ? (6) Mɛɛ nibii wɔteŋ mɔ fɛɛ mɔ baanyɛ efee kɛtsɔɔ akɛ eyɛ wɔ-Kristofoi anyɛmifeemɔ kadimɔnii ni fe fɛɛ lɛ eko? (Yoh. 13:35) (7) Kɛ́ wɔfee ekome kɛmamɔ wɔ diɛŋtsɛ wɔ-Maŋtsɛyeli Asai lɛ, mɛɛ sɛɛ wɔnáa? (8) Te wɔnyɛmimɛi ni yɔɔ Yuropa Bokagbɛ kɛ Russia lɛ fee tɛŋŋ amɛkpɛtɛ Yehowa kpaakpa beni atsĩ nitsumɔ lɛ naa lɛ? (9) Mɛɛ mɔdɛŋ ni sa kadimɔ waa Odasefoi babaoo bɔɔ koni amɛnyɛ amɛya kpokpaa nɔ kpeei, ni mɛni hewɔ? (10) Mɛɛ gbɛ nɔ vidio nɛɛ ewo ofaishitswaa mli hewalɛ akɛ (a) okɛ onyɛmimɛi lɛ baafee ekome kɛjá Yehowa yɛ Kristofoi akpeei ashishi, (b) obaaye obua mɛi krokomɛi yɛ fimɔ beaŋ, kɛ (d) obaashiɛ be fɛɛ be, kɛ gbɛ fɛɛ gbɛ ni obaanyɛ otsɔ nɔ ofee nakai lɛ? (11) Mɛɛ gbɛ nɔ wɔbaanyɛ wɔkɛ vidio nɛɛ atsu nii yɛ shiɛmɔ nitsumɔ lɛ mli, ni mɛɛ be wɔbaanyɛ wɔfee nakai?
Yiŋtoo titri hewɔ ni wɔsumɔɔ akɛ wɔfata wɔ-Kristofoi anyɛmifeemɔ lɛ he ji suɔmɔ ni wɔyɔɔ kɛha Yehowa lɛ. No hewɔ lɛ, ekã wɔtsui nɔ akɛ wɔbaakase Yehowa he nii koni wɔtsɔɔ mɛi krokomɛi ni amɛle lɛ. Ni wɔsumɔɔ mɛi ni Yehowa sumɔɔ amɛ lɛ. Kɛ́ efi amɛ ni wɔye wɔbua amɛ lɛ, wɔkpaaa Nyɔŋmɔ gbɛ akɛ eda wɔshi. No najiaŋ lɛ, wɔdaa Nyɔŋmɔ shi ejaakɛ wɔnaa wɔ-Kristofoi anyɛmifeemɔ lɛ akɛ eji nɔ ko ni nɔ bɛ ni ekɛke wɔ. Beni jeŋ ni suɔmɔ bɛ mli nɛɛ bɛŋkɛɔ enaagbee lɛ, nyɛhaa wɔyaa nɔ wɔjiea suɔmɔ kpo wɔtsɔa wɔnyɛmimɛi ni yɔɔ je lɛŋ fɛɛ lɛ!