Bɔ ni Wɔɔfee Wɔsaa Wɔhe kɛ Hiɛkpamɔ Wiemɔi ni Mɔɔ Shi
1. Mɛni hewɔ ehe miihia ni wɔkpa wɔwiemɔi lɛ ahiɛ jogbaŋŋ lɛ?
1 Taakɛ niyenii ko ŋma haa ashweɔ ni aye nakai niyenii lɛ, nakai nɔŋŋ hiɛkpamɔ wiemɔi ni mɔɔ shi haa wɔnáa hegbɛ ni wɔkɛ mɛi gbaa Biblia mli saji ni tswaa mɔ emaa shi. Esoro hiɛkpamɔ wiemɔi ni mɔɔ shi lɛ eko fɛɛ eko yɛ ekɛlɛ kɛ nibii ni awieɔ he yɛ mli, shi taakɛ eji yɛ niyenii ko ni ŋɔɔ lɛ hoomɔ mli lɛ, be fɛɛ be lɛ, ebiɔ niiahesusumɔ kɛ hesaamɔ. (Abɛi 15:28) Mɛni haa hiɛkpamɔ wiemɔ ko mɔɔ shi?
2. Te wɔɔfee tɛŋŋ wɔsaa wɔhe kɛ hiɛkpamɔ wiemɔ ni mɛi baanya he?
2 Halamɔ Saji ni Mɛi Baanya He: Kɛ́ shiatsɛ lɛ naaa wɔhiɛkpamɔ wiemɔ lɛ he miishɛɛ lɛ, ekolɛ eboŋ wɔsane lɛ toi. No hewɔ lɛ kɛ́ oosaa ohe lɛ, ha saji ni mɛi ni yɔɔ oshikpɔŋkuku lɛ mli lɛ baanya he lɛ ahi ojwɛŋmɔŋ. Ani amɛnyaa saji ni kɔɔ nɔyeli kpakpa, weku shihilɛ ni yɔɔ miishɛɛ, loo tai asɛɛ ni baafo lɛ he? Bei pii lɛ, mɛi sumɔɔ ni amɛtsɔɔ amɛjwɛŋmɔ yɛ saji ahe, no hewɔ lɛ, okɛ sanebimɔ ko ni baaha mɛi asusu nii ahe waa lɛ asaa ohe. Obaanyɛ ohala shiɛmɔ wiemɔi ni yɔɔ Wɔ Maŋtsɛyeli Sɔɔmɔ lɛ mli lɛ ekome ni otsake hiɛ bɔ ni mɛi ni yɔɔ oshikpɔŋkuku lɛ mli lɛ baanya he. Bei komɛi lɛ, nyɛbaanyɛ nyɛkase hiɛkpamɔ wiemɔi lɛ ekomɛi yɛ nyɛgbɛkɛ Weku Jamɔ lɛ shishi.
3. Kɛ́ wɔmiisaa wɔhiɛkpamɔ wiemɔ lɛ, mɛni hewɔ esa akɛ wɔsusu mɛi ni yɔɔ wɔshikpɔŋkuku lɛ mli lɛ akusumii kɛ amɛshihilɛ he?
3 Susumɔ Mɛi Akusumii kɛ Amɛshihilɛ He: Yɛ hei komɛi lɛ, esa akɛ wɔtsɔɔ nɔ hewɔ ni wɔnyiɛ lɛ tɛ̃ɛ. Shi yɛ hei krokomɛi lɛ, kɛ́ gbɔ ko tee shĩa ko mli ni eŋaaa shĩa bii lɛ, ebiii amɛ bɔ ni amɛyɔɔ ní ekolɛ etsɔɔ amɛ mɔ ni eji, ni etee esane lɛ nɔ tɛ̃ɛ lɛ, anaa lɛ akɛ ebuuu mɔ. Yɛ hei ni mɛi babaoo sumɔɔ Nyɔŋmɔjamɔ lɛ, wɔbaanyɛ wɔkɛ Biblia lɛ atsu nii yɛ wɔhiɛkpamɔ wiemɔ lɛ mli ni egbaaa amɛnaa. (Bɔf. 2:14-17) Shi kɛ́ mɛi lɛ kɛɛ jeee Kristofoi ji amɛ, loo amɛbɛ jamɔ ko kwraa mli lɛ, ekolɛ ebaahi akɛ wɔkɛ Biblia lɛ baatsu nii beni wɔyaafee sɛɛkuu-kɛsaramɔi, moŋ fe ni wɔkɛaatsu nii yɛ wɔhiɛkpamɔ wiemɔ lɛ mli.—Bɔf. 17:22-31.
4. Mɛni baaye abua wɔ ni wɔsaa wɔhiɛkpamɔ wiemɔ lɛ mli klɛŋklɛŋ wiemɔi lɛ jogbaŋŋ?
4 Klɛŋklɛŋ Wiemɔi Lɛ: Esa akɛ osusu oklɛŋklɛŋ wiemɔi lɛ ahe jogbaŋŋ. Bei pii lɛ, ehi waa akɛ wɔkɛ wiemɔi ni yɔɔ kuku ni shishinumɔ waaa baatsu nii. Bɔ ni wɔwieɔ wɔklɛŋklɛŋ wiemɔi lɛ wɔhaa lɛ hu he miihia. Okɛ miishɛɛ awie. Feemɔ ohiɛ ŋmɔlɔŋmɔlɔ kɛtsɔɔ shĩatsɛ lɛ akɛ osusuɔ ehe. Kɛ́ wɔkɛ ŋaawoi nɛɛ tsu nii lɛ, ebaaye ebua wɔ ni wɔsaa wɔhe kɛ hiɛkpamɔ wiemɔi ni jeɔ ŋma ni baawo mɛi ni yɔɔ wɔshikpɔŋkuku lɛ mli lɛ hewalɛ ní amɛbaye “[Yehowa] okpɔlɔ lɛ nɔ nii.”—1 Kor. 10:21.