Hiɛkpamɔ Wiemɔi ni Mɔɔ Shi
1 Kɛ wɔkɛ wɔhe wo shia-kɛ-shia nitsumɔ lɛ mli lɛ, sane ni wɔkɛkpeɔ ni ma wɔhiɛ be fɛɛ be ji “Mɛni po makɛɛ klɛŋklɛŋ?” Shiɛlɔi ni yɔɔ niiashikpamɔ ni yeɔ omanye yɛ sɔɔmɔ nitsumɔ lɛ mli lɛ kɛ ŋaawoo babaoo ni yeɔ buaa haa. Mɛni ji enɛɛmɛi ekomɛi?
2 Klɛŋklɛŋ lɛ, ehe hiaa ni ona gbɔmɛi ni owieɔ otsɔɔ amɛ lɛ ahe miishɛɛ. Nɛkɛ mɔ he miishɛɛnamɔ nɛɛ jeɔ kpo yɛ wiemɔi kɛ nifeemɔi amli. Ehe miihia ni osusu shiatsɛ lɛ jwɛŋmɔ hu he. Bi saji ni sa ni agbɛnɛ obo amɛhetoo toi jogbaŋŋ. Bɔ fɛɛ bɔ ni eji lɛ, esa akɛ wɔnyɛ wɔye wɔbua shiatsɛ lɛ ni ena bɔ ni sane ni wɔwieɔ he lɛ hesusumɔ he aaaba sɛɛnamɔ aha lɛ.
SUSUMƆ JWƐŊMƆ NI AMƐHIƐ LƐ HE
3 Beni Yesu yeɔ Samariayoo lɛ odase yɛ Sikar nu bu lɛ he lɛ, ewiemɔi lɛ ekomɛi ha yoo lɛ naakpɛ ehe. Amɛkɛ esusumɔi loo gbɛ ni etsɔɔ nɔ ejaa Nyɔŋmɔ lɛ kpaaa gbee. Yesu bo lɛ toi jogbaŋŋ, ni yɛ be mli ni ehaa hetoo lɛ, esusu nɔ ni yoo nɛɛ wie lɛ he. Eesumɔ ni eye ebua yoo nɛɛ. (Yohane 4:13, 14, 19-26) Ani wɔbɔɔ mɔdɛŋ ni wɔnyiɛ Yesu nɔkwɛmɔ nɔ lɛ sɛɛ yɛ enɛ mli yɛ be mli ni wɔkɛ wɔhe woɔ odaseyeli nitsumɔ lɛ mli lɛ?
4 Kɛji akɛ gbɔmɛi ni yɔɔ oshikpɔŋkuku lɛ mli lɛ ha ohiɛkpamɔ wiemɔi lɛ ahetoo ni amɛkɛɛ, “Miyɛ mi diɛŋtsɛ mijamɔ” lɛ, mɛni obaanyɛ ofee? Biblia ŋmalɔ lɛ kɛɛ: “Jalɔ tsui jwɛŋɔ hetoohamɔ he.” (Abɛi 15:28) Ani ofeɔ nakai? Ani osusu saji ni yɔɔ Reasoning wolo lɛ baafai 18-19 lɛ he ni ohiɛ nɛkɛ Ŋmalɛ nɛɛ mli Shishitoo mla lɛ yɛ ojwɛŋmɔ mli? Obaanyɛ okɛ shiɛlɔi ni he esa yɛ shiɛmɔ nitsumɔ lɛ mli atsu nii bɔni afee ni okase gbɛ ni oootsɔ nɔ ni oha ohiɛkpamɔ wiemɔi lɛ afee nɔ ni mɔɔ shi babaoo.
5 Yɛ hei pii ni mɛi kɛ naatsii wiemɔ kɛɔ akɛ amɛyɛ amɛ diɛŋtsɛ amɛjamɔ lɛ, obaanyɛ okpa nɛkɛ hetoo nɛɛ gbɛ koni bo moŋ otsɔ hiɛ owie amɛshihilɛ nɛɛ he. Akɛ nɔkwɛmɔ nɔ lɛ, beni oŋa mɔ lɛ, obaanyɛ okɛɛ: “Ani oyɛ bo diɛŋtsɛ ojamɔ? [Bo ehetoo lɛ toi.] Misusuɔ nakai ejaakɛ nakai gbɔmɛi ni yɔɔ akutso nɛɛ mli lɛ ji. Shi, yiŋtoo ni ha miba biɛ leebi nɛɛ ji . . .” Kɛkɛ lɛ agbɛnɛ otsa nɔ kɛ sane ni osumɔɔ ni okɛ lɛ awie he lɛ.
6 Kɛ shiatsɛmɛi pii kɛɛ “mibɛ deka” lɛ, obaanyɛ ohala hetoi babaoo ni aha yɛ baafai 19-20 ni yɔɔ Reasoning wolo lɛ mli lɛ ekome ni ekɛto hiamɔ nii ni yɔɔ oshikpɔŋkuku Iɛ mli lɛ he. Obaanyɛ otsake wiemɔi nɛɛ amli ni okɛkpee shitee-kɛ-woo ni onuɔ daa lɛ naa.
HIƐKPAMƆ WIEMƆI NI YƆƆ REASONING WOLO LƐ MLI LƐ KƐ NITSUMƆ
7 Mɛi pii miiye omanye waa yɛ hiɛkpamɔ wiemɔi ni yɔɔ Reasoning wolo lɛ baafai 9-15 lɛ kɛ nitsumɔ mli. Obaana akɛ enɛɛmɛi tsuɔ saji ni gbɔmɛi susuɔ he lɛ ahe nii. tamɔ saji ni yaa nɔ, mɔ diɛŋtsɛ shweshweeshwe shihilɛ, nitsumɔ, tsu taomɔ, weku shihilɛ kɛ wɔsɛɛ be hu. Shi, kadimɔ hu akɛ bɔ ni awie hiɛkpamɔ wiemɔ lɛ yɛ Reasoning wolo lɛ mli lɛ hu fɔɔ shiatsɛ lɛ nine koni etsɔɔ ejwɛŋmɔ. Eyeɔ ebuaa lɛ koni ena bɔ ni sane ni akɛfɔ ehiɛ lɛ he hiaa ha ni akɛ ekɔɔ lɛ diɛŋtsɛ ehe hu. Nɛkɛ hiɛkpamɔ wiemɔi nɛɛ kɛ nitsumɔ yɛ gbɛ ni mɔɔ shi nɔ lɛ haŋ shiatsɛmɛi lɛ ana shitee-kɛwoo wiemɔi komɛi amɛkɛha.
8 Susumɔ hiɛkpamɔ wiemɔi ni oheɔ oyeɔ akɛ eeenyɛ emɔ shi jogbaŋŋ yɛ oshikpɔŋkuku lɛ mli lɛ he. Kasemɔ bɔ ni ooofee ni okɛ hiɛkpamɔ wiemɔi ni yɔɔ Reasoning wolo lɛ mli lɛ atsu nii. Ha shiɛlɔi krokomɛi ahesaa lɛ he aba sɛɛnamɔ aha bo. Sɔlemɔ oha Yehowa ni ejɔɔ omɔdɛŋbɔi anɔ. Kɛ omia ohiɛ nakai lɛ. Yehowa hu baajɔɔ nɔ, ni nɔ ni baajɛ mli aba ji gbɔmɛi pii ni yɔɔ shikpɔŋkuku lɛ mli lɛ ni baahere sanekpakpa ni kɛ mɔ yaa yiwalaheremɔ mli lɛ nɔ.