Kɛ́ Wɔyɛ Mɛi ni Wɔhaa Amɛ Woji Tɛtrɛbii Daa lɛ, Ebaaye Ebua Wɔ ni Wɔje Biblia mli Nikasemɔi Ashishi
1. Mɛni hewɔ Yehowa asafo lɛ ejɛ jeeŋmɔ ewo shiɛlɔi hewalɛ ni amɛtao mɛi ni sumɔɔɔ ni akɛ amɛ kaseɔ Biblia lɛ shi amɛnyaa wɔwoji lɛ akanemɔ he lɛ?
1 Mɛi babaoo yɛ ni sumɔɔɔ ni wɔkɛ amɛ kaseɔ Biblia lɛ, shi amɛnyaa wɔwoji tɛtrɛbii lɛ akanemɔ he. No hewɔ lɛ, Yehowa asafo lɛ ejɛ jeeŋmɔ ewo shiɛlɔi hewalɛ ni amɛtao mɛi ni tamɔ nakai lɛ ni amɛha amɛ woji tɛtrɛbii lɛ daa nyɔɔŋ. Bei pii lɛ, mɛi ni kaneɔ wɔwoji tɛtrɛbii lɛ daa lɛ náa shwelɛ akɛ amɛbaakase Nyɔŋmɔ Wiemɔ lɛ. (1 Pet. 2:2) Naagbee lɛ, ekolɛ amɛbaakane nɔ ko ni baatee amɛmiishɛɛ shi ni baaha amɛkpɛlɛ ni akɛ amɛ abɔi Biblia lɛ kasemɔ.
2. Te wɔɔfee tɛŋŋ wɔtee mɛi ni wɔhaa amɛ woji daa nyɔɔŋ lɛ amiishɛɛ shi lɛ?
2 Shwiemɔ Anɔkwale Dumɔwui lɛ anɔ “Nu”: Yɛ nɔ najiaŋ ni okɛ woji tɛtrɛbii lɛ baaha shiatsɛ lɛ kɛkɛ ni oshi lɛ lɛ, okɛ lɛ agba sane ni obɔ mɔdɛŋ ni okɛ lɛ abɔ naanyo. Enɛ baaye abua bo ni ole shihilɛ mli ni eyɔɔ, nibii ni esumɔɔ, kɛ nibii ni eheɔ eyeɔ, koni onyɛ okɛ hiɛshikamɔ awie. (Abɛi 16:23) Be fɛɛ be kɛ́ obaaya jɛmɛ lɛ, tsɔ hiɛ osaa ohe. Obaanyɛ owie oti ko ni yɔɔ wolo tɛtrɛɛ lɛ mli lɛ he kuku ni okane ŋmalɛ ko ni kɔɔ he, okɛ nakai feemɔ baashwie anɔkwale dumɔwu fɛɛ dumɔwu ni yɔɔ etsui mli lɛ nɔ nu. (1 Kor. 3:6) Ŋmaa bei ni okɛtee eŋɔɔ lɛ, wolo ni oha lɛ, sane ni nyɛgba kɛ ŋmalɛi ni nyɛkane lɛ oshwie shi.
3. Shii enyiɛ esa akɛ wɔku wɔsɛɛ wɔyasara mɛi ni wɔhaa amɛ woji tɛtrɛbii daa nyɔɔŋ lɛ?
3 Ani Wɔbaanyɛ Wɔya Amɛŋɔɔ Kpitiokpitio? Esa akɛ oku osɛɛ oya mɛi nɛɛ aŋɔɔ shi kome daa nyɔɔŋ ni oyaha amɛ woji tɛtrɛbii hee ni eba lɛ eko. Kɛlɛ, kɛ́ oshihilɛ baaŋmɛ bo gbɛ, ni mɔ lɛ hu yɛ sane lɛ he miishɛɛ lɛ, obaanyɛ ofɔ eŋɔɔ yaa. Akɛ nɔkwɛmɔnɔ lɛ, kɛ́ oha mɔ lɛ wolo lɛ, otsi loo otsii enyɔ sɛɛ lɛ, obaanyɛ oku osɛɛ kɛya eŋɔɔ ni okɛɛ lɛ akɛ, “Mitsɔ biɛ ni mikɛ be kukuoo ko abatsɔɔ bo nɔ ko yɛ woji tɛtrɛbii ni mikɛha bo nyɛsɛɛ lɛ mli.” Enɛ baatee mɔ lɛ miishɛɛ shi koni ekane sane pɔtɛɛ ko yɛ wolo lɛ mli. Kɛ́ ekane momo lɛ, obaanyɛ obi lɛ bɔ ni ena nakai sane lɛ eha ni okɛ lɛ agba he sane kuku. Aloo kɛ́ mɔ lɛ nyaa wɔwoji lɛ akanemɔ he lɛ, obaanyɛ oku osɛɛ ni oyaha lɛ dɛhiɛmɔ wolo, wolo bibioo, loo wolo ni akɛhaa yɛ nakai nyɔɔŋ lɛ nɔ lɛ eko.
4. Yɛ be kɛ beaŋ lɛ, mɛni wɔbaanyɛ wɔfee koni wɔnyɛ wɔna kɛ́ mɛi ni wɔhaa amɛ woji tɛtrɛbii lɛ baasumɔ ni wɔkɛ amɛ akase Biblia lɛ?
4 Kaamɛ ni shiatsɛ lɛ diɛŋtsɛ bi ni okɛ lɛ abakase nii. Bo tsɔ hiɛ okɛɛ lɛ. Kɛ́ be ko ni eho lɛ esumɔɔɔ ni akɛ lɛ kaseɔ Biblia lɛ po lɛ, yɛ be kɛ beaŋ lɛ, obaanyɛ ogbala ejwɛŋmɔ kɛya Buu-Mɔɔ lɛ mli sane ni ji “Sanebimɔi ni Biblia lɛ Eha Hetoo” lɛ nɔ, ni okɛ lɛ agba he sane kɛ́ eesumɔ. Ekolɛ obaanyɛ okɛ lɛ aje Biblia mli nikasemɔ shishi yɛ shinaa naa. Shi kɛ́ onyɛɛɛ okɛ lɛ aje Biblia mli nikasemɔ shishi po lɛ, obaanyɛ oya nɔ oha lɛ woji tɛtrɛbii lɛ, bɔni afee ni emiishɛɛ lɛ naa akaba shi.