Ani Akɛ Bo Ekase Wolo ni Ji Enyɔ lɛ Agbe Naa?

1. Mɛni hewɔ ato “Nyɔŋmɔ Suɔmɔ” wolo lɛ he gbɛjianɔ?

¹ Yɛ afi 2008 lɛ, Yehowa webii ni yɔɔ jeŋ fɛɛ lɛ ná miishɛɛ waa be ni ajie wolo hee ni ji, ‘Nyɛhia Nyɔŋmɔ Suɔmɔ lɛ Mli’ lɛ kpo yɛ “Nyɔŋmɔ Mumɔ lɛ Tsɔɔ Wɔ Gbɛ” Kpokpaa Wulu nɔ Kpeei lɛ ashishi lɛ! Taakɛ atswa adafi yɛ nakai beaŋ lɛ, ato wolo nɛɛ he gbɛjianɔ koni eye ebua wɔ ni wɔle, ni wɔsumɔ jeŋba he mlai ni Yehowa ewo lɛ, shi jeee ni wɔkɛtsɔɔ mɛi Biblia mli shishijee tsɔɔmɔi. No hewɔ lɛ, wɔkɛ wolo nɛɛ hãaa yɛ shĩa fɛɛ shĩa shiɛmɔ nitsumɔ lɛ mli. Belɛ, te esa akɛ akɛ wolo nɛɛ atsu nii ahã tɛŋŋ?

2. Te esa akɛ akɛ wolo nɛɛ atsu nii ahã tɛŋŋ, ni namɔ esa akɛ akɛ lɛ akase?

² ‘Nyɛhia Nyɔŋmɔ Suɔmɔ lɛ Mli’ wolo lɛ ji wolo ni ji enyɔ ní akɛ Biblia mli nikaselɔi baakase kɛ́ akɛ amɛ gbe Biblia lɛ Tsɔɔ wolo lɛ kasemɔ naa. Kɛ́ abaptisi nikaselɔ ko be ni egbeko Biblia lɛ Tsɔɔ wolo lɛ kɛ “Nyɔŋmɔ Suɔmɔ” wolo lɛ kasemɔ naa lɛ, no lɛ esa akɛ akɛ lɛ atsa nikasemɔ lɛ nɔ kɛyashi ebaagbe “Nyɔŋmɔ Suɔmɔ” wolo lɛ naa. Eyɛ mli akɛ abaptisi nikaselɔ lɛ moŋ, shi mɔ ni kɛ lɛ kaseɔ nii lɛ baanyɛ abu be, sɛɛkuukɛsaramɔ, kɛ nikasemɔ lɛ he akɔntaa. Kɛ́ shiɛlɔ ko fata ehe kɛtee, ni ekɛ ehe wo nikasemɔ lɛ mli lɛ, lɛ hu ebaanyɛ ebu be lɛ he akɔntaa.

3. Mɛni hewɔ ehe miihia ni mɛi hei lɛ agbe woji enyɔ lɛ kasemɔ naa lɛ?

³ Kɛ́ akɛ mɛi komɛi kase Biblia lɛ Tsɔɔ wolo lɛ agbe naa lɛ, amɛnuɔ he akɛ amɛle anɔkwale lɛ, no hewɔ lɛ, mɛni hewɔ mɔ ni nyɔŋ anɔkwafo lɛ jieɔ yi akɛ akɛ mɛi akase wolo ni ji enyɔ lɛ? Nɔ hewɔ ji akɛ, ehe miihia ni mɛi hei lɛ anane amɔ shi jogbaŋŋ yɛ anɔkwale lɛ mli dani akɛ amɛ akpa nikasemɔ. Esa akɛ amɛshishifãi “amɔmɔ shi” yɛ Kristo lɛ mli, ni ‘amɛfi shi yɛ hemɔkɛyeli lɛ mli’ koni amɛnyɛ amɛkpee kai ni amɛkɛbaakpe lɛ anaa. (Kol. 2:6, 7; 2 Tim. 3:12; 1 Pet. 5:8, 9) Kɛfata he lɛ, dani amɛbaanyɛ amɛtsɔɔ mɛi krokomɛi anii jogbaŋŋ lɛ, esa akɛ “amɛshɛ anɔkwale lɛ lee mli.” (1 Tim. 2:4) Kɛ́ wɔkɛ mɛi ni wɔkɛkaseɔ nii lɛ gbe woji enyɔ lɛ akasemɔ naa lɛ, no baatsɔɔ akɛ wɔmiiye wɔmiibua amɛ ní amɛya nɔ amɛnyiɛ ‘gbɛ ni kɛ mɔ yaa wala mli lɛ’ nɔ. (Mat. 7:14) Yɛ yiŋtoi nɛɛ ahewɔ lɛ, esa akɛ mɔ fɛɛ mɔ ni kɛ mɔ ko kaseɔ Biblia lɛ abɔ mɔdɛŋ ni ekɛ gbɛtsɔɔmɔ ni tsɔɔ akɛ wɔkɛ mɛi ni wɔkɛkaseɔ nii ni abaptisi amɛ lɛ akase woji enyɔ lɛ wɔgbe naa lɛ atsu nii.

4. Mɛni asafoŋ onukpai lɛ baanyɛ afee kɛye abua mɛi ni abaptisi amɛ etsɛko lɛ koni amɛnyɛ amɛkase wolo ni ji enyɔ lɛ amɛgbe naa?

⁴ Esa akɛ asafoŋ onukpai lɛ hu akwɛ ni akɛ mɛi fɛɛ ni abaptisi amɛ etsɛko lɛ akase wolo ni ji enyɔ lɛ agbe naa. (Abɛi 27:23) Bei komɛi lɛ, Asafoŋ Sɔɔmɔ Ajinafoi Akuu lɛ baanyɛ akɛɛ shiɛlɔ ko ni ekɛ mɔ ko ni ekpa shiɛmɔyaa lɛ akase “Nyɔŋmɔ Suɔmɔ” wolo lɛ mli yitsei pɔtɛi komɛi. Kɛ́ akɛ nitsumɔ ni tamɔ nɛkɛ wo odɛŋ lɛ, kaimɔ akɛ esaaa akɛ nikasemɔ lɛ yaa nɔ be kpalaŋŋ, shi yɛ nakai beaŋ nɔŋŋ lɛ, esa akɛ okɛ hiɛdɔɔ kɛ anɔkwayeli atsu he nii.

5. Mɛni esa akɛ mɛi ni afii fioo nɛ ni abaptisi amɛ, ni akɛ amɛ ekaseko “Nyɔŋmɔ Suɔmɔ” wolo lɛ kɛgbeko naa lɛ afee?

⁵ Yehowa kɛ nyɔŋ anɔkwafo lɛ le nɔ tuuntu ni he hiaa wɔteŋ mɔ fɛɛ mɔ ni baahã wɔnane ‘amɔ shi’ ni ‘wɔfi shi’ yɛ hemɔkɛyeli lɛ mli. No hewɔ lɛ, ani akɛ bo ekase wolo ni ji enyɔ lɛ agbe naa? Kɛ́ afii fioo nɛ ni abaptisi bo, ni ogbeko ekasemɔ naa lɛ, ofainɛ too gbɛjianɔ ni ofee nakai amrɔ nɔŋŋ! Wolo hee nɛɛ ji nikeenii ni nɔ bɛ ni akɛduro wɔ, ni ato he gbɛjianɔ koni eye ebua wɔ ni wɔya nɔ wɔhi “Nyɔŋmɔ suɔmɔ lɛ mli”!​—Yuda 21.