Sane Ko Ni Waaa Kwraa Ni Obaanyɛ Obi

Nyɛmi yoo ko ni atsɛɔ lɛ Mary lɛ kɛ ewu John,a yɛ maŋ ko ni mɛi pii jɛɔ Philippines amɛbahiɔ shi yɛ jɛmɛ ni amɛtsuɔ nii lɛ nɔ. Mary kɛ John sumɔɔ waa akɛ amɛshiɛ sane kpakpa lɛ amɛhã mɛi nɛɛ. Yɛ COVID-19 be lɛ mli lɛ, Mary kɛ mɛi babaoo ni yɔɔ maŋ nɔ ni eyɔɔ lɛ kɛ je lɛŋ hei krokomɛi lɛ je Biblia mli nikasemɔ shishi. Te efee tɛŋŋ ni ekɛ mɛi nɛɛ bɔi nikasemɔ lɛ?

Mary biɔ mɛi ni ekɛkaseɔ nii lɛ akɛ, “Ani ole mɔ ko hu ni baasumɔ ni akɛ lɛ akase Biblia lɛ?” Kɛ́ e-Biblia mli nikaselɔ lɛ kɛɛ hɛɛ lɛ, ebiɔ lɛ koni ehã ekɛ mɔ lɛ awie. Bei pii lɛ, sanebimɔ ni tamɔ nɛkɛ lɛ woɔ yibii kpakpai. Mɛni hewɔ? Nɔ hewɔ lɛ ji, bei pii lɛ, mɛi ni nyaa nibii ni amɛkaseɔ yɛ Biblia lɛ mli lɛ ahe lɛ sumɔɔ ni amɛgba amɛwekumɛi kɛ amɛnanemɛi nibii ni amɛkaseɔ lɛ. Mɛni ejɛ sane nɛɛ ni ebiɔ e-Biblia mli nikaselɔi lɛ mli kɛba?

Mary Biblia mli nikaselɔ ko ni atsɛɔ lɛ Jasmin lɛ hã lɛ mɛi ejwɛ ni miisumɔ ni akɛ amɛ akase Biblia lɛ. Atsɛɔ mɛi nɛɛ ateŋ mɔ kome Kristine. Enya nikasemɔ lɛ he aahu akɛ, ekɛɛ Mary ni ekɛ lɛ akase nii shii enyɔ yɛ otsi mli. Mary bi Kristine hu kɛji ele mɛi komɛi ni baasumɔ ni amɛ hu amɛkase Biblia lɛ, ni ekɛɛ lɛ akɛ, “Hɛɛ, mahã okɛ minanemɛi lɛ ekomɛi agba sane.” Yɛ otsii fioo pɛ mli lɛ, Kristine hã Mary mɛi ejwɛ ni miisumɔ ni akɛ amɛ akase Biblia lɛ. Sɛɛ mli lɛ, Kristine hã lɛ enanemɛi krokomɛi kɛfata he, ni enanemɛi nɛɛ hu hã lɛ mɛi krokomɛi.

Kristine miisumɔ ni akɛ ewekumɛi ni yɔɔ Philippines lɛ hu akase Biblia lɛ. No hewɔ lɛ, ekɛ ebiyoo ni atsɛɔ lɛ Andrea lɛ wie. Shishijee lɛ, Andrea yasusu akɛ, Yehowa Odasefoi ahemɔkɛyeli lɛ yɛ nɔ ko ko, amɛheee Yesu nɔ amɛyeee, ni Kpaŋmɔ Momo lɛ pɛ amɛkɛtsuɔ nii. Shi be ni akɛ lɛ kase nii shi kome pɛ lɛ, ena akɛ bɔ ni esusuɔ yɛ Yehowa Odasefoi lɛ ahe lɛ, jeee nakai kwraa eji. Be fɛɛ be ni ebaakase nɔ ko hee lɛ, ewieɔ akɛ, “Kɛ́ nɛkɛ Biblia lɛ ewie lɛ, belɛ anɔkwale ni!”

Sɛɛ mli lɛ, Andrea hã Mary kɛ enanemɛi enyɔ kɛ mɔ ko ni ekɛtsuɔ nii lɛ bɔi Biblia lɛ kasemɔ. Agbɛnɛ hu, be fɛɛ be ni Mary kɛ Andrea baakase nii lɛ, Andrea papa nyɛmi yoo ko ni eshwila ni atsɛɔ lɛ Angela lɛ boɔ amɛ toi ni amɛleee. Kɛkɛ ni gbi ko lɛ, Angela kɛɛ Andrea ni ehã ekɛ Mary awie, ni ekɛɛ Mary akɛ eesumɔ ni ekɛ lɛ hu akase Biblia lɛ. Angela nya nɔ ni akɛ lɛ kaseɔ lɛ he waa. Yɛ nyɔɔŋ kome pɛ mli lɛ, ekpe ŋmalɛi babaoo ewo eyitsoŋ ni ebi ni akɛ lɛ akase nii shii ejwɛ yɛ otsi mli. Daa otsi lɛ, ehãa Andrea yeɔ ebuaa lɛ ni etsɔɔ videoconferencing nɔ eyaa asafoŋ kpeei.

Mary yɔse akɛ, bei pii kɛ́ ekɛ Kristine miikase nii lɛ, ewu ni atsɛɔ lɛ Joshua lɛ yɛ jɛmɛ. No hewɔ lɛ, Mary bi lɛ kɛji ebaasumɔ ni efata amɛhe kɛkase nii lɛ. Joshua kɛɛ lɛ akɛ, “Mabo toi kɛkɛ, shi kaabi mi sane; kɛ́ obi mi sane nɔŋŋ lɛ, mate shi maya.” Be ni aje nikasemɔ lɛ shishi aaafee minitii enumɔ lɛ, Joshua ebi saji pii fe Kristine po, ni ebi ni akɛ lɛ hu akase Biblia lɛ.

Sane ni waaa kwraa ni Mary bi nɛɛ hã ená Biblia mli nikaselɔi babaoo. Ekɛ amɛteŋ mɛi komɛi hã nyɛmimɛi komɛi ni amɛkɛ amɛ akase nii. Yɛ fɛɛ mli lɛ, Mary kɛ mɛi 28 je Biblia mli nikasemɔ shishi yɛ maji srɔtoi ejwɛ anɔ.

Abaptisi Mary Biblia mli nikaselɔ ni wɔtsĩ etã klɛŋklɛŋ ni atsɛɔ lɛ Jasmin lɛ, yɛ April 2021. Abaptisi Kristine hu yɛ May 2022, ni eku esɛɛ etee ewekumɛi aŋɔɔ yɛ Philippines. Agbɛnɛ hu, abaptisi mɛi ni Kristine kɛhã Mary lɛ ateŋ mɛi enyɔ. Be ni abaptisi Kristine lɛ sɛɛ nyɔji fioo lɛ, abaptisi Angela hu, ni bianɛ lɛ eesɔmɔ akɛ daa gbɛgbalɔ. Kristine wu, Joshua, kɛ amɛbiyoo Andrea, kɛ mɛi krokomɛi ni akɛ amɛ kaseɔ nii lɛ hu miiya amɛhiɛ waa.

Yɛ blema Kristofoi lɛ abeiaŋ lɛ, mɛi babaoo gba amɛwekumɛi kɛ amɛnanemɛi nibii ni amɛkase yɛ Yesu he lɛ. (Yoh. 1:​41, 42a; Bɔf. 10:​24, 27, 48; 16:​25-33) No hewɔ lɛ, bi o-Biblia mli nikaselɔi lɛ loo mɛi ni yɔɔ wiemɔ lɛ he miishɛɛ lɛ akɛ, “Ani ole mɔ ko hu ni baasumɔ ni akɛ lɛ akase Biblia lɛ?” Namɔ aaale, ekolɛ bo hu obaanyɛ otsɔ sanebimɔ ni waaa ni mɔ fɛɛ mɔ baanyɛ abi nɛɛ nɔ oná Biblia mli nikaselɔi babaoo?