Bɔ Ni Obaafee Ni Okaye Otsui Fe Nine

Kɛ́ oye otsui waa yɛ nɔ ko he lɛ, ebaanyɛ eye bo awui yɛ gbɔmɔtsoŋ kɛ henumɔŋ fɛɛ. Ebaanyɛ ehã bo naagbai wuji fe naagbai ni oyeɔ otsui yɛ he lɛ po.

Ŋaawoi ni baahã okaye otsui fe nine

• 

  Gbɔ adafitswai ni haoɔ mɔ ni okaneɔ, okwɛɔ, loo oboɔ toi lɛ anɔ. Kɛ́ naagba ko miiya nɔ lɛ, ehe ehiaaa doo akɛ ole nɔ fɛɛ nɔ ni kɔɔ he. Kɛ́ amaniɛbɔi ni ofɔɔ kanemɔ, oboɔ toi, loo okwɛɔ lɛ kɔɔ nibii ni fãa mɔ tsui lɛ ahe lɛ, ebaahã oshe gbeyei ni ohiɛnɔkamɔ baatã.

  Biblia mli shishitoo mla: “Tsui ni ekumɔ lɛ, egbɔjɔɔ mɔ.”​—Abɛi 17:22.

  “Ewaaa kwraa akɛ obaasumɔ ni be fɛɛ be lɛ, ole saji hei ni eba kɛ nɔ ni fãa mɔ tsui yɛ Intanɛt lɛ nɔ, shi no yeee ebuaaa bo. Kɛ́ migbɔ adafitswai ni mikwɛɔ, miboɔ toi, loo mifɔɔ kanemɔ lɛ anɔ lɛ, ehãaa maye mitsui tsɔ.”​—John.

  Kɛhã hesusumɔ: Ani osumɔɔ ni be fɛɛ be lɛ ole amaniɛbɔi hei ni eba?

• 

  Too gbɛjianɔ, ni ohi shi yɛ naa. Bɔɔ mɔdɛŋ oto gbɛjianɔ kɛhã be ni okɛbaate shi yɛ saa mli, be ni okɛbaaye nii, be ni okɛbaatsu shĩa nitsumɔ, kɛ be ni okɛbaawɔ, ni ohi shi yɛ naa. Kɛ́ oyɛ gbɛjianɔ ni oto kɛhã nibii fɛɛ lɛ, ehãa be fɛɛ be lɛ, oyɛ nɔ ko feemɔ, no hewɔ lɛ onáaa be kɛye otsui yɛ nibii ahe.

  Biblia mli shishitoo mla: “Mɔdɛŋbɔlɔ gbɛjianɔtoi baaye omanye kɛ̃.”​—Abɛi 21:5.

  “Be ni COVID-19 tsɛŋemɔ hela lɛ je shishi lɛ, miku mihiɛ mishwie gbɛjianɔ ni mito kɛtsuɔ nibii ahe nii lɛ nɔ, ni mikɛ be babaoo jieɔ mihiɛtserɛ. Mina akɛ esa akɛ mikɛ mibe atsu nii jogbaŋŋ, no hewɔ lɛ, mibato gbɛjianɔ kɛhã sɔ̃i ni esa akɛ matsu he nii lɛ.”​—Joseph.

  Kɛhã hesusumɔ: Ani oto gbɛjianɔ ko yɛ gbi lɛ mli ni okɛtsuɔ nii gbi fɛɛ gbi, ni kɛ́ gbi lɛ ba naagbee lɛ onuɔ he akɛ otsu nɔ ko?

• 

  Okɛ ojwɛŋmɔ ama nibii kpakpai ni baa yɛ oshihilɛ mli lɛ anɔ. Kɛ́ okɛ ojwɛŋmɔ ma nibii ni kulɛ esa akɛ ofee yɛ be ni eho lɛ amli lɛ anɔ, loo okɛ ojwɛŋmɔ ma nibii ni ekolɛ osusuɔ akɛ ebaaba onɔ lɛ anɔ lɛ, ebaahã oye otsui fe nine. Yɛ no najiaŋ lɛ, susumɔ nibii enyɔ loo etɛ komɛi ni obaanyɛ oda Nyɔŋmɔ shi yɛ he lɛ ahe.

  Biblia mli shishitoo mla: “Nyɛfea nyɛhe mɛi ni le shidaa.”​—Kolosebii 3:15.

  “Akɛni mikaneɔ Biblia lɛ hewɔ lɛ, eyeɔ ebuaa mi ni mijieɔ mijwɛŋmɔ kɛjeɔ adafitswaa gbohii anɔ, ni mikɛ mijwɛŋmɔ maa ekpakpai lɛ anɔ. Ekolɛ, obaakɛɛ enɛ lɛ jeee nɔ ko tsɔ ni, shi etsuɔ nii waa!”​—Lisa.

  Kɛhã hesusumɔ: Ani ofɔɔ nibii gbohii ni yaa nɔ yɛ oshihilɛ mli lɛ anɔ jwɛŋmɔ, ni okuɔ ohiɛ oshwieɔ nibii kpakpai lɛ anɔ?

• 

  Susumɔ mɛi krokomɛi ahe. Nɔ najiaŋ ni obaatse ohe lɛ, susumɔ nibii komɛi ni obaanyɛ ofee kɛye obua mɛi ni ehia amɛ lɛ ahe. Ejaakɛ, kɛ́ otse ohe lɛ, ewaaa kwraa akɛ obaaye otsui fe nine.

  Biblia mli shishitoo mla: “Nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ lɛ.”​—Filipibii 2:4.

  “Kɛ́ mifee nibii mihã mɛi lɛ, mimii shɛɔ mihe waa. Mifeɔ nibii ni hãa mɛi atsui nyɔɔ amɛmli, ni nakai beiaŋ nɔŋŋ lɛ ehãaa maye mitsui tsɔ. Anɔkwa, mikɛ mibe pii yeɔ mibuaa mɛi, no hewɔ lɛ, mináaa deka kɛye mitsui tsɔ.”​—Maria

  Kɛhã hesusumɔ: Mɛi ni ole lɛ ateŋ namɛi ni yelikɛbuamɔ krɛdɛɛ ko he miihia amɛ, ni mɛni obaanyɛ ofee kɛye obua amɛ?

• 

  Kwɛmɔ ogbɔmɔtsoŋ hewalɛnamɔ nɔ jogbaŋŋ. Ná be ni sa kɛgbɔle okpɔiaŋ jogbaŋŋ, ni oná be hu kɛjɔɔ ohe. Ye niyenii ni baahã oná gbɔmɔtsoŋ hewalɛ kpakpa. Kɛ́ okwɛɔ ogbɔmɔtsoŋ hewalɛnamɔ nɔ jogbaŋŋ lɛ ehãa bo hiɛnɔkamɔ, ni ehãaa oye otsui tsɔ.

  Biblia mli shishitoo mla: “Kpɔiaŋgbɔlemɔ he yɛ sɛɛnamɔ.”​—1 Timoteo 4:8, shishigbɛ niŋmaa.

  “Mi kɛ mibi nuu ni eye afii nyɔŋma kɛ ekpaa lɛ fɛɛ nyɛɛɛ afee nibii komɛi yɛ maŋ mli, no hewɔ lɛ, wɔkɛ kpɔiaŋgbɔlemɔ efata nibii ni wɔfeɔ daa gbi yɛ wɔshĩa mli lɛ ahe. Enɛ ehã wɔmii eshɛ wɔhe fe tsutsu lɛ, wɔjieɔ mlihilɛ kpo wɔtsɔɔ wɔhe, ni wɔtoɔ wɔtsui shi wɔhãa wɔhe.”​—Catherine

  Kɛhã hesusumɔ: Kɛ́ okwɛ lɛ, ani oona akɛ esa akɛ oye niyenii kpakpa, ni ofɔ okpɔiaŋ gbɔlemɔ koni oná gbɔmɔtsoŋ hewalɛ kpakpa?

Mɛi babaoo kɛ ŋaawoi nɛɛ etsu nii, ni ehã amɛyeee amɛtsui tsɔ yɛ saji ahe. Kɛfata he lɛ, amɛkase Biblia lɛ ni amɛbale akɛ Nyɔŋmɔ ewo shi akɛ wɔsɛɛ lɛ, ebaahã wɔná shihilɛ kpakpa, ni eye ebua amɛ waa. Kanemɔ sane ni ji “Mɛni Nyɔŋmɔ Maŋtsɛyeli Lɛ Baatsu?” lɛ.