Te Esa Akɛ Kristofonyo Ahi Shi Ahã Tɛŋŋ?​—⁠Mɛni Biblia Lɛ Kɛɔ Yɛ He?

Ŋmɛnɛ lɛ, mɛi babaoo ni yɔɔ je lɛŋ hei srɔtoi lɛ kɛ ekãa tsɛɔ amɛhe Kristofoi; kɛ̃lɛ amɛkɛ amɛnifeemɔi kɛ amɛwiemɔi yeɔ mɛi awui. Amɛteŋ mɛi komɛi fóɔ amɛ pɛ amɛnɔ mli, amɛyeee anɔkwa, ni amɛnaaa mɔbɔ. Amɛteŋ mɛi komɛi hu yeee amɛgbalashihilɛ mli hefatalɔi anɔkwa, no ji, amɛfiteɔ gbãla. Amɛjeŋba kɛ amɛnifeemɔi hãa mɛi biɔ amɛhe akɛ: ‘Te esa akɛ Kristofonyo ahi shi ahã tɛŋŋ?’

Nibii ni tsɔɔ akɛ mɔ ko ji Kristofonyo diɛŋtsɛ

Ewaaa akɛ mɔ ko baakɛɛ akɛ Kristofonyo ji lɛ. Shi jeee no kɛkɛ feɔ mɔ ko Kristofonyo. Biblia lɛ tsɔɔ akɛ, Kristofonyo ji mɔ ko ni kaseɔ Yesu Kristo. (Bɔfoi 11:26) Yesu diɛŋtsɛ wie akɛ: “Kɛji nyɛhi miwiemɔ lɛ mli lɛ, belɛ mikaselɔi ji nyɛ lɛɛlɛŋ.” (Yohane 8:31) Anɔkwa sane ji akɛ, mɔ ko bɛ ni baanyɛ aye Yesu wiemɔi lɛ fɛɛ nɔ kɛmɔ shi. Shi esa akɛ Kristofonyo abɔ mɔdɛŋ ni ehi shi yɛ Yesu tsɔɔmɔi lɛ anaa, ni ana yɛ enifeemɔi amli daa gbi. Naa bɔ ni esa akɛ Kristofonyo ahi shi ahã lɛ ekomɛi.

Kristofoi jieɔ suɔmɔ krɔŋŋ kpo amɛtsɔɔ mɛi

Nɔ ni Yesu kɛɛ: “Miihã nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ. Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.”​—Yohane 13:34, 35.

Nɔ ni Yesu Fee: Yesu jie suɔmɔ krɔŋŋ kpo etsɔɔ mɛi fɛɛ, ekɔɔɔ he eko shihilɛi amli ni amɛyɔɔ, hei ni amɛjɛ, loo bɔ ni ale amɛ ahã. Etsa helatsɛmɛi, ehã mɛi ni hɔmɔ miiye amɛ lɛ niyenii, ni ekɛ ewala tete hã koni mɛi aná wala.​—Mateo 14:14-21; 20:28.

Bɔ ni esa akɛ Kristofoi ahi shi ahã: Kristofoi feɔ mɛi ejurɔ, amɛkwɛɛɛ hiɛiaŋ, amɛkɛ mɛi atɔmɔi keɔ amɛ kɛtsɔɔ akɛ amɛsumɔɔ mɛi, ni amɛfóoo amɛ pɛ amɛnɔ mli. Amɛyeɔ amɛbuaa mɛi ni ehia amɛ lɛ, ni amɛkɛ nibii ni he hiaa waa shãa afɔle koni amɛnyɛ amɛwa mɛi.​—1 Yohane 3:16.

Kristofoi yeɔ anɔkwa

Nɔ ni Yesu kɛɛ: “Miji . . . anɔkwale lɛ.”​—Yohane 14:6.

Nɔ ni Yesu fee: Yesu ye anɔkwa yɛ ewiemɔi kɛ enifeemɔi fɛɛ amli. Etsɔ̃ɔɔ ŋaa kɛlakaaa mɛi koni amɛfee nɔ ni esumɔɔ akɛ amɛfee, loo amɛhe nɔ ko ni bɛ mli amɛye. Mɛi le lɛ akɛ anɔkwafo, ni kɛ́ anɔkwa ni ebaaye lɛ baahã mɛi amli afu lɛ po lɛ, egbaaa enaa.​—Mateo 22:16; 26:63-67.

Bɔ ni esa akɛ Kristofoi ahi shi ahã: Kristofoi maleee. Amɛwoɔ too, amɛjuuu, kɛ́ amɛmiitsu nii amɛmiihã mɔ ko lɛ, amɛtseɔ amɛhe amɛtsuɔ lɛ jogbaŋaa ni amɛfitee be. (Romabii 13:5-7; Efesobii 4:28) Amɛtswaaa mɛi ojo, kɛ́ aafee kaa loo ɛzams lɛ amɛkɔpeee, kɛ́ amɛyaatao nitsumɔ lɛ amɛtsakeee amɛwoji ahiɛ, ni amɛfeee nibii krokomɛi tamɔ enɛɛmɛi.​—Hebribii 13:18.

Kristofoi jieɔ mlihilɛ kpo

Nɔ ni Yesu kɛɛ: “Nyɛbaa miŋɔɔ, nyɛ mɛi fɛɛ ni eetɔ nyɛ, ni nyɛtere jatsui ni tsii, ni mahã nyɛhe ajɔ nyɛ. Nyɛwóa mikɔɔŋtso lɛ nyɛfɔ̃a nyɛnɔ, ni nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ. Ejaakɛ mikɔɔŋtso lɛ teremɔ waaa, ni mijatsu lɛ etsiii.”​—Mateo 11:28-30.

Nɔ ni Yesu fee: Yesu jie mlihilɛ kpo, ni ehã mɛi atsui nyɔ amɛmli. Ehã gbekɛbii ba eŋɔɔ, eshɛje mɛi ni ehão lɛ amii, ni ejie bulɛ kpo etsɔɔ mɛi.—Marko 10:13-15; Luka 9:11.

Bɔ ni esa akɛ Kristofoi ahi shi ahã: Kristofoi toɔ amɛtsui shi amɛkɛ mɛi wieɔ yɛ mlihilɛ mli; amɛkɛ mɛi ewieee basabasa, ni amɛjɛɛɛ mɛi hu. (Efesobii 4:29, 31, 32) Amɛsusuɔ mɛi ahe waa, ni amɛkwɛɔ nibii ni amɛbaanyɛ amɛfee kɛye amɛbua mɛi.​—Galatiabii 6:10.

Kristofoi yeɔ amɛgbalashihilɛ mli hefatalɔi anɔkwa

Nɔ ni Yesu kɛɛ: “Nɔ ni Nyɔŋmɔ kɛtsa lɛ, gbɔmɔ ko akagbála mli.”​—Marko 10:9.

Nɔ ni Yesu fee: Yesu boteee gbalashihilɛ mli, shi ewo gbalashihilɛ mli hefatalɔi ŋaa akɛ amɛye amɛhe anɔkwa. (Mateo 19:9) Ebɔ kɔkɔ yɛ nibii ni baanyɛ ahã mɔ ko afite gbãla, ni efite ekɛ ehefatalɔ lɛ teŋ lɛ he.​—Mateo 5:28.

Bɔ ni esa akɛ Kristofoi ahi shi ahã: Kristofoi tsiɔ amɛhe kɛjeɔ nɔ fɛɛ nɔ ni kɛ́ amɛfee lɛ, etsɔɔ akɛ amɛbɛ bulɛ kɛhã amɛhefatalɔ lɛ he. (Hebribii 13:4) Wu kɛ ŋa kɛ amɛhe yeɔ yɛ suɔmɔ kɛ bulɛ mli.​—Efesobii 5:28, 33.