Kɛ́ otsuɔ nii waa lɛ, etamɔ nɔ ni oogbɔle okpɔiaŋ. Obaaná he sɛɛ bianɛ kɛ wɔsɛɛ fɛɛ
KƐHÃ OBLAHII KƐ OBLAYEI
11 Tsu Nii Waa
NƆ NI ETSƆƆ
Mɔ ni sumɔɔ nitsumɔ lɛ, ejooo nitsumɔ naa foi. Moŋ lɛ, etsuɔ nii waa koni enyɛ ekwɛ ehe ni enyɛ eye ebua mɛi krokomɛi hu, kɛ́ nitsumɔ ni etsuɔ lɛ jeee nitsumɔ ni mɛi buɔ po.
NƆ HEWƆ NI EHE HIAA
Oosumɔ jio, osumɔɔɔ jio, ni oyɔɔ wala mli nɛɛ, esa akɛ otsu nɔ ko kɛ̃. Ŋmɛnɛ lɛ, mɛi pii sumɔɔɔ ni amɛtsuɔ nii waa, shi kɛ́ otsuɔ nii waa lɛ, onáa he sɛɛ.—Jajelɔ 3:13.
“Miyɔse akɛ, kɛ́ otsuɔ nii waa lɛ, onáa bulɛ ohãa ohe ni otsui hu nyɔɔ omli. Bɔ ni mitsui nyɔɔ mimli kɛ́ mitsu nii lɛ, ehã mibasumɔ nitsumɔ waa. Kɛ́ otsuɔ nii jogbaŋŋ lɛ, ehãa onáa gbɛ́i kpakpa.”—Reyon.
BIBLIA MLI SHISHITOO MLA: “Sɛɛnamɔ yɛ nitsumɔ ni wa fɛɛ nitsumɔ ni wa mli.”—Abɛi 14:23.
NƆ NI OBAANYƐ OFEE
Feemɔ nibii ni nyiɛ sɛɛ nɛɛ koni ewa bo ni ona jwɛŋmɔ ni ja yɛ nitsumɔ he.
Kasemɔ bɔ ni atsuɔ nii jogbaŋŋ. Kɛ́ ootsu shĩa nitsumɔ jio, oofee homwɛk jio, ootsu heloonaa nitsumɔ jio lɛ, okɛ otsui fɛɛ atsu. Kɛ́ obale bɔ ni atsuɔ nɔ ko jogbaŋŋ lɛ, taomɔ gbɛi ni obaanyɛ otsɔ nɔ oya ohiɛ yɛ mli. Obaanyɛ ofee lɛ oyayaayai loo ofee lɛ jogbaŋŋ fe tsutsu lɛ. Babaoo ni ohe saa kɛ nɔ ko tsumɔ lɛ, babaoo ni onáa nitsumɔ lɛ he miishɛɛ ji no.
BIBLIA MLI SHISHITOO MLA: “Nuu ni he esa yɛ enitsumɔ mli lɛ, ebaadamɔ maŋtsɛmɛi ahiɛ; edamɔŋ mɛi foji ahiɛ.”—Abɛi 22:29.
Kaasusu bo pɛ ohe. Bei babaoo lɛ, kɛ́ otsu osɔ̃i ahe nii jogbaŋŋ lɛ, mɛi krokomɛi hu náa he sɛɛ. Akɛ nɔkwɛmɔnɔ lɛ, kɛ́ obɔɔ mɔdɛŋ otsuɔ oshĩa nitsumɔ jogbaŋŋ lɛ, ogbɔɔ weku lɛ mli bii krokomɛi lɛ anitsumɔ nɔ.
BIBLIA MLI SHISHITOO MLA: “Nɔhãmɔ hãa mɔ náa miishɛɛ fe hemɔ.”—Bɔfoi 20:35.
Feemɔ fe bɔ ni akpaa gbɛ yɛ odɛŋ lɛ po. Nɔ najiaŋ ni obaafee nɔ ni abiɔ yɛ odɛŋ lɛ kɛkɛ lɛ, bɔɔ mɔdɛŋ ni ofee fe bɔ ni akpaa gbɛ lɛ po. Kɛ́ ofee nakai lɛ, etsɔɔ akɛ bo diɛŋtsɛ ojɛɔ otsuiŋ otsuɔ osɔ̃i kɛ nibii krokomɛi ahe nii, shi jeee ja anyɛ onɔ dani otsuɔ.—Mateo 5:41.
BIBLIA MLI SHISHITOO MLA: ‘Ekpakpa ni obaafee lɛ kaafee yɛ nɔnyɛɛ naa, shi moŋ jɛɛ bo diɛŋtsɛ osuɔmɔ mli ofee.’—Filemon 14.
Ŋmɛɛ pɛpɛɛpɛ. Mɔ ni sumɔɔ nitsumɔ efeee anihao, ni etsuuu nii fe nine hu. Ebɔɔ mɔdɛŋ eŋmɛɔ pɛpɛɛpɛ. Enáa enitsumɔ he miishɛɛ ni enáa be kɛjɔɔ ehe hu.
BIBLIA MLI SHISHITOO MLA: “Hejɔɔmɔ dɛ̃ kɔkɔ obɔ lɛ, ehi fe nii ni atsuɔ waa dɛ̃ kɔkɔi obɔbɔ enyɔ kɛ kɔɔyɔɔ sɛɛtiumɔ.”—Jajelɔ 4:6.