Maŋ Shikpálɔi 12 Lɛ

KWƐMƆ tsei ayibii ni hii nɛɛ tere lɛ. Kwɛ bɔ ni wein yibii kusha lɛ da hã. Ebiɔ mɛi enyɔ dani amɛbaanyɛ amɛkɛ tso awó nɔ. Ni kwɛmɔ agbamii lɛ kɛ akutui lɛ hu. Nɛgbɛ akɛ tsei ayibii fɛfɛji nɛɛ jɛ? Akɛjɛ Kanaan shikpɔŋ lɛ nɔ. Kaimɔ akɛ, Kanaan ji he ni Abraham kɛ Isak kɛ Yakob hi be ko lɛ. Shi yɛ hɔmɔ ni ba jɛmɛ hewɔ lɛ, Yakob kɛ eweku lɛ fã kɛtee Mizraim. Agbɛnɛ, aaafee afii 216 sɛɛ lɛ, Mose nyiɛ Israelbii lɛ ahiɛ kɛmiiya Kanaan ekoŋŋ. Amɛbashɛ he ko yɛ ŋa lɛ nɔ ni atsɛɔ jɛmɛ akɛ Kadesh.

Gbɔmɛi fɔji yɔɔ Kanaan shikpɔŋ lɛ nɔ. No hewɔ lɛ Mose tsu maŋ shikpálɔi 12 ni ekɛɛ amɛ akɛ: ‘Nyɛyakwɛa akɛ mɛi enyiɛ yɔɔ jɛmɛ, ni nyɛkwɛa akɛ ani amɛhe wa lo. Nyɛkwɛa akɛ ani shikpɔŋ lɛ hi kɛha nidumɔ hu lo. Ni nyɛkai ni nyɛkɛ enɔ tsei ayibii lɛ eko abaa.’

Beni maŋ shikpálɔi lɛ ku amɛsɛɛ amɛba Kadesh lɛ, amɛkɛɛ Mose akɛ: ‘Eji shikpɔŋ kpakpa waa diɛŋtsɛ.’ Ni amɛkɛ tsei ayibii lɛ eko batsɔɔ Mose ni amɛkɛma nɔ mi. Shi maŋ shikpálɔi lɛ ateŋ mɛi 10 kɛɛ akɛ: ‘Gbɔmɛi ni yɔɔ jɛmɛ lɛ dara waa ni amɛhe wa hu. Kɛ wɔtee akɛ wɔyaaŋɔ shikpɔŋ lɛ, amɛbaagbe wɔ fɛɛ.’

Israelbii lɛ atsui fã beni amɛnu enɛ lɛ. No hewɔ lɛ amɛkɛɛ akɛ: ‘Ehi akɛ wɔɔgboi yɛ Mizraim moŋ aloo yɛ ŋa nɛɛ nɔ po. Abaagbe wɔ yɛ ta mli, ni abaamɔmɔ wɔŋamɛi kɛ wɔbii fɛɛ. Nyɛhaa wɔhalaa hiɛnyiɛlɔ kroko yɛ Mose najiaŋ, ni wɔku wɔsɛɛ kɛya Mizraim!’

Shi maŋ shikpálɔi lɛ ateŋ mɛi enyɔ kɛ amɛhiɛ fɔ̃ Yehowa nɔ, ni amɛbɔ mɔdɛŋ ní amɛwo maŋbii lɛ hewalɛ. Amɛgbɛi ji Yoshua kɛ Kaleb. Amɛkɛɛ akɛ: ‘Nyɛkashea gbeyei. Yehowa kɛ wɔ yɛ. Etɔŋ wɔ ni wɔnine baashɛ shikpɔŋ lɛ nɔ.’ Shi gbɔmɛi lɛ booo toi. Amɛmiitao ni amɛgbe Yoshua kɛ Kaleb po.

Enɛ ha Yehowa mli fu waa ni ekɛɛ Mose akɛ: ‘Gbɔmɛi ni eye kɛjɛ afii 20 kɛyaa lɛ ateŋ mɔ ko mɔ ko eyaŋ Kanaan shikpɔŋ lɛ nɔ. Amɛna naakpɛɛ nii ni mifee yɛ Mizraim kɛ ŋa lɛ nɔ lɛ, shi kɛlɛ amɛkɛ amɛhiɛ efɔɔɔ minɔ. No hewɔ lɛ amɛbaakpa shi yɛ ŋa lɛ nɔ afii 40 kɛyashi amɛteŋ naagbee mɔ baagbo. Yoshua kɛ Kaleb pɛ baaya Kanaan shikpɔŋ lɛ nɔ.’