Shikpálɔi Nyɔŋma Kɛ Enyɔ Lɛ

Be ni Israelbii lɛ shi Sinai Gɔŋ lɛ he lɛ, amɛfã gbɛ kɛtsɔ Paran ŋa lɛ nɔ kɛtee Kadesh. Yehowa kɛɛ Mose yɛ jɛmɛ akɛ: ‘Halamɔ hii 12, mɔ kome yɛ tsɛmɛi ashĩa fɛɛ tsɛmɛi ashĩa mli, koni amɛyakwɛ bɔ ni Kanaan shikpɔŋ lɛ yɔɔ hã. Mikɛ Kanaan shikpɔŋ lɛ baahã Israelbii lɛ.’ No hewɔ lɛ, Mose hala hii 12, ni ekɛɛ amɛ akɛ: ‘Nyɛyaa Kanaan ni nyɛkwɛa kɛji amɛshikpɔŋ lɛ hi kɛhã nidumɔ. Nyɛkwɛa kɛji mɛi ni yɔɔ shikpɔŋ lɛ nɔ lɛ ahe wa aloo amɛhe waaa, ni nyɛkwɛa kɛji amɛhiɔ mama tsũi amli aloo amɛhiɔ maji amli.’ Shikpálɔi 12 lɛ shi kɛtee Kanaan. Mɛi 12 lɛ ateŋ mɛi enyɔ ji Yoshua kɛ Kaleb.

Gbii 40 sɛɛ lɛ, shikpálɔi lɛ ku amɛsɛɛ, ni amɛkɛ shikpɔŋ lɛ nɔ yibii lɛ ekomɛi, tamɔ agbamii, pomegranetii, kɛ wain yibii ba. Amɛbabɔ amaniɛ akɛ: ‘Shikpɔŋ lɛ hi, shi mɛi ni yɔɔ nɔ lɛ ahe wa, ni gbogboi ni yɔɔ amɛmaji lɛ ahe lɛ kwɔlɔ.’ Shi Kaleb wie akɛ: ‘Wɔbaanyɛ wɔye amɛnɔ kunim. Nyɛhãa wɔyaŋɔa shikpɔŋ lɛ bianɛ nɔŋŋ!’ Ani ole nɔ hewɔ ni Kaleb wie nakai lɛ? Ewie nakai, ejaakɛ ekɛ Yoshua fɛɛ kɛ amɛhiɛ fɔ̃ Yehowa nɔ. Shi shikpálɔi nyɔŋma lɛ wie akɛ: ‘Dabi! Mɛi ni yɔɔ jɛmɛ lɛ ji gbɔmɛi agboi, tamɔ oblaŋi! Wɔtamɔ kooloi bibii komɛi kɛkɛ yɛ amɛhiɛ.’

Enɛ hã Israelbii lɛ anijiaŋ je wui. Amɛbɔi tɔkemɔ, ni amɛkɛɛkɛɛ amɛhe akɛ: ‘Nyɛhãa wɔhalaa hiɛnyiɛlɔ kroko, ni wɔku wɔsɛɛ kɛya Ejipt. Mɛni hewɔ esa akɛ wɔya ni ayagbe wɔ?’ Yoshua kɛ Kaleb kɛɛ amɛ akɛ: ‘Nyɛkafea nɔ ko ni Yehowa sumɔɔɔ, ni nyɛkashea gbeyei. Yehowa baabu wɔhe.’ Shi Israelbii lɛ booo Yoshua kɛ Kaleb toi, ni kulɛ amɛmiitao amɛgbe amɛ!

Mɛni Yehowa fee? Ekɛɛ Mose akɛ: ‘Nɔ ni mifee mihã Israelbii nɛɛ fɛɛ sɛɛ lɛ, amɛbooo mi toi lolo. No hewɔ lɛ, amɛbaahi ŋa nɛɛ nɔ afii 40, ni amɛbaagboi yɛ biɛ. Amɛbii lɛ kɛ Yoshua kɛ Kaleb pɛ ni baaya shikpɔŋ ni miwo amɛ shi akɛ mikɛbaahã amɛ lɛ nɔ.’