Rahab Kɛ Maŋ Shikpálɔi Lɛ To

HII nɛɛ ebote haomɔ mli. Esa akɛ amɛjo foi, kɛ jeee nakai lɛ abaagbe amɛ. Israelbii maŋ shikpálɔi ji amɛ, ni yoo ni yeɔ ebuaa amɛ lɛ ji Rahab. Rahab shia yɛ Yeriko maŋ lɛ gbogboi lɛ anɔ, ni jɛmɛ eyɔɔ. Nyɛhaa wɔtaoa nɔ hewɔ ni hii nɛɛ ebote haomɔ mli lɛ.

Israelbii lɛ efee klalo akɛ amɛbaafo Yordan Faa lɛ kɛya Kanaan shikpɔŋ lɛ nɔ. Shi dani amɛbaafee nakai lɛ, Yoshua tsu maŋ shikpálɔi enyɔ. Ekɛɛ amɛ akɛ: ‘Nyɛyaa ni nyɛyakwɛa shikpɔŋ lɛ kɛ Yeriko maŋ lɛ.’

Beni maŋ shikpálɔi lɛ ba Yeriko lɛ, amɛtee Rahab shia lɛ. Shi mɔ ko yakɛɛ Yeriko maŋtsɛ lɛ akɛ: ‘Israelbii enyɔ komɛi ba biɛ gbɛkɛ nɛɛ koni amɛbakpá shikpɔŋ lɛ shi.’ Beni enu nɛkɛ sane nɛɛ lɛ, maŋtsɛ lɛ tsu mɛi kɛtee Rahab ŋɔɔ ni amɛkɛɛ lɛ akɛ: ‘Jiemɔ hii lɛ ni ba oŋɔɔ lɛ kɛba!’ Shi Rahab kɛ maŋ shikpálɔi lɛ eyato etsũ lɛ yiteŋ. No hewɔ lɛ ekɛɛ akɛ: ‘Hii komɛi ba miŋɔɔ, shi mileee he ni amɛjɛ. Ni amɛshi beni je ena lɛ, dani aŋamɔ maŋ lɛ agboi lɛ. Kɛji nyɛtiu amɛ mramra lɛ, nyɛbaanina amɛ!’ No hewɔ lɛ gbɔmɛi lɛ tiu amɛ kɛ foi.

Beni gbɔmɛi lɛ shi lɛ, Rahab kwɔ oya kɛtee tsũ lɛ yiteŋ. Ekɛɛ maŋ shikpálɔi lɛ akɛ: ‘Mile akɛ Yehowa kɛ shikpɔŋ nɛɛ baaha nyɛ. Wɔnu bɔ ni eha Ŋshɔ Tsuru lɛ gbi beni nyɛshi Mizraim lɛ, kɛ bɔ ni nyɛgbe Sihon kɛ Og maŋtsɛmɛi lɛ. Ni amrɔ nɛɛ mifee nyɛ ejurɔ, no hewɔ lɛ, nyɛfainɛ, nyɛwoa mi shi akɛ nyɛbaana mi mɔbɔ. Nyɛherea mipapa kɛ mimami, kɛ minyɛmimɛi hii kɛ minyɛmimɛi yei lɛ ayiwala.’

Maŋ shikpálɔi lɛ wo lɛ shi akɛ amɛbaafee nakai, shi esa akɛ Rahab afee nɔ ko. Maŋ shikpálɔi lɛ kɛɛ: ‘Okɛ taŋkpee tsuru nɛɛ afi osamfɛlɛ lɛ naa, ni obua owekumɛi lɛ fɛɛ anaa ofata ohe yɛ oshia lɛ. Ni kɛ wɔ fɛɛ wɔku wɔsɛɛ kɛba ni wɔbaŋɔ Yeriko lɛ, wɔbaana nɛkɛ taŋkpee nɛɛ yɛ osamfɛlɛ lɛ naa, ni wɔgbeŋ mɔ ko mɔ ko yɛ oshia lɛ.’ Beni maŋ shikpálɔi lɛ ku amɛsɛɛ amɛtee Yoshua ŋɔɔ lɛ, amɛgba lɛ nɔ fɛɛ nɔ ni ba lɛ.