Rahab Hã Shikpálɔi Lɛ Yatee

Be ni hii enyɔ lɛ ni Yoshua tsu lɛ tee Yeriko maŋ lɛ mli lɛ, amɛyahi yoo ko ni atsɛɔ lɛ Rahab lɛ shĩa. Shi Yeriko maŋtsɛ lɛ ná ele akɛ gbɔi komɛi eba maŋ lɛ mli, ni etsu asraafoi kɛtee Rahab shĩa lɛ. Rahab hã shikpálɔi enyɔ lɛ yatee yɛ etsũ lɛ yiteŋ, ni ehã asraafoi lɛ tsɔ he kroko. Kɛkɛ ni ekɛɛ shikpálɔi lɛ akɛ: ‘Maye mabua nyɛ ejaakɛ mile akɛ Yehowa kɛ nyɛ yɛ, ni nyɛbaaye Yeriko nɔ kunim. Nyɛfainɛ, nyɛwoa mi shi akɛ nyɛkpãtãŋ miwekumɛi lɛ ahiɛ.’

Shikpálɔi lɛ kɛɛ Rahab akɛ: ‘Wɔmiiwo bo shi akɛ mɔ fɛɛ mɔ ni baahi oshĩa lɛ mli lɛ, nɔ ko nɔ ko efeŋ lɛ.’ Amɛkɛfata he akɛ: ‘Okɛ kpãa tsuru afĩ osamfɛlɛ lɛ naa koni akakpãtã okɛ oweku lɛ hiɛ.’

Rahab hã shikpálɔi lɛ kɛ kpãa yi shi kɛtsɔ esamfɛlɛ lɛ mli. Amɛtee gɔji lɛ anɔ ni amɛyatee yɛ jɛmɛ gbii etɛ dani amɛku amɛsɛɛ kɛtee Yoshua ŋɔɔ. No sɛɛ lɛ, Israelbii lɛ fo Yordan Faa lɛ, ni amɛto gbɛjianɔ koni amɛyaŋɔ shikpɔŋ lɛ. Yeriko ji klɛŋklɛŋ maŋ ni amɛye nɔ kunim. Yehowa kɛɛ amɛ akɛ, amɛbɔle Yeriko maŋ lɛ shi kome daa gbi, ní amɛfee nakai gbii ekpaa. Gbi ni ji kpawo lɛ nɔ lɛ, amɛbɔle maŋ lɛ shii kpawo. Kɛkɛ ni osɔfoi lɛ kpã amɛtɛtɛrɛmantɛrɛi lɛ, ni asraafoi lɛ bolɔ waa diɛŋtsɛ. Yeriko gbogboi lɛ kumɔ eshwie shi! Rahab shĩa lɛ ma gbogbo lɛ nɔ, shi ekumɔɔɔ. Yehowa baa Rahab kɛ eweku lɛ yi, ejaakɛ ekɛ ehiɛ fɔ̃ enɔ.