Yitso 2
Naanɔ Maŋtsɛ Lɛ
1. Mɛni hewɔ esa akɛ wɔna hekɛnɔfɔɔ yɛ Nyɔŋmɔ mli akɛ Tsɛ diɛŋtsɛ lɛ?
YESU kɛ Nyɔŋmɔ wie ni etsɛ lɛ “wɔ-Tsɛ” ni ekɛje “Nuŋtsɔ lɛ Sɔlemɔ lɛ” shishi. Dabi, jeee akɛ eji Yesu Kristo Tsɛ kɛkɛ, shi moŋ yɛ naagbee lɛ eji Tsɛ kɛha adesai fɛɛ ni kɛ toiboo jaa nɛkɛ ‘sɔlemɔ Toibolɔ’ ni yɔɔ suɔmɔ nɛɛ. (Lala 65:3) Akɛ “naanɔi a-Maŋtsɛ lɛ,” ejie anɔkwa miishɛɛ ni hiɔ shi kɛyaa naanɔ kpo yɛ ebɔɔnii ahe, tamɔ bɔ ni tsɛ feɔ ehaa ebii lɛ. (1 Timoteo 1:17) Esa akɛ wɔna hekɛnɔfɔɔ yɛ “wɔ-Tsɛ” lɛ mli akɛ Mɔ ni yɔɔ diɛŋtsɛ ni esusuɔ wɔhe. Wiemɔ ni wɔwieɔ jio, wɔ hewolonɔ su aloo gbɛhe ni wɔyɔɔ yɛ shihilɛ mli jio, esa akɛ wɔna he miishɛɛ akɛ wɔɔya eŋɔɔ be fɛɛ be, ejaakɛ “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.
2, 3. Mɛɛ gbɛ nɔ wɔ-Tsɛ lɛ eha ale lɛ akɛ eji Wala-Halɔ kɛ Nihalɔ Kpeteŋkpele fɛɛ yɛ? (1 Mose 1:1, 2, 31)
2 “Wɔ-Tsɛ ni yɔɔ ŋwɛi” lɛ ji Bɔlɔ lɛ, Mɔ ni ha gbɔmɛi adesai wala lɛ. (Mateo 6:9; Lala 36:10) Shi efe Wala-Halɔ kɛkɛ; lɛ nɔŋŋ hu ji wɔ Nihalɔ Kpeteŋkpele lɛ. Wɔbaakpa adesa tsɛ ni kwɛɔ ebii jogbaŋŋ lɛ gbɛ akɛ eha amɛ shia ni amɛhi mli kɛ amɛhiamɔ nii, kɛji enɛ baabi be kɛ deŋmegbomɔ babaoo po. Wɔ ŋwɛi Tsɛ lɛ efee enɛ, kɛ nibii krokomɛi babaoo, ni ekɛ nibii nɛɛ fɛɛ eha wɔ yaka.
3 Susumɔ bɔ ni “naanɔi a-Maŋtsɛ” nɛɛ saa shikpɔŋ nɛɛ fɛfɛo koni etsɔ wɔshia lɛ he okwɛ. Ekɛwo ŋwɛiniiaŋ he ni sa pɛpɛɛpɛ, ni etsɔ ehewalɛ ni fe fɛɛ lɛ nɔ eha nibii fɛɛ ni he hiaa kɛha adesai koni amɛnyɛ amɛhi shi lɛ ba shikpɔŋ lɛ nɔ. Kɛkɛ ni no sɛɛ lɛ ebɔ nuu kɛ yoo, ni ekɛ amɛ wo shia fɛfɛo nɛɛ mli—nikeenii kpele lɛlɛŋ, kɛha “gbɔmɛi abii”!—Lala 115:16; 19:2, 3.
4. (a) Mɛɛ nilee ni jɛ mlihilɛ mli wɔ-Tsɛ lɛ jie lɛ kpo yɛ wɔshia nɛɛ saamɔ mli? (b) Mɛni maa nɔ mi kɛhaa wɔ akɛ eesumɔ ni wɔna miishɛɛ?
4 Mɛɛ shia fɛfɛo wɔ ŋwɛi Tsɛ lɛ fee eha ebii lɛ yɛ shikpɔŋ nɛɛ nɔ nɛkɛ! Eto he gbɛjianɔ bɔni afee ni jenamɔ ni jɔɔ bɔ ni sa anyiɛ jetsɛremɔ ni akɛtsuɔ nii lɛ sɛɛ. Efã koni afi lɛ mli bei sɔrɔtoi lɛ aba yɛ be naa kɛha wɔ sɛɛnamɔ kɛ miishɛɛnamɔ. (1 Mose 8:22) Efee nu ni he hiaa waa lɛ babaoo, ni ekɛwo shikpɔŋ lɛ nɔ he fɛɛ he koni wɔnine anyɛ ashɛ nɔ yɛ he fɛɛ he ni ehe baahia wɔ yɛ. Ekɛ kwɛ̃ɛ nii ni yɔɔ baa ŋmɔŋ eha shikpɔŋ—ni dalɛ shɛɔ shitoi akpekpei abɔ lɛ fɛɛ nɔ—yɛ wɔ jeŋ muu fɛɛ shia lɛ mli. Ni ewula lɛ kɛ fɔfɔii ni hiɛ sui sɔrɔtoi fɛfɛji babaoo. Esaa shikpɔŋ lɛ hiɛ fɛfɛo kɛfata nibii krokomɛi tamɔ kooi, kpaakpoi kɛ gɔji ni yɔɔ fɛo lɛ ahe. Ekɛ ŋai, mu kɛ nibii krokomɛi ni anaa hewalɛ kɛjɛɔ mli lɛ babaoo ewo shikpɔŋ lɛ “nitoohe” lɛ mli. Eyaa nɔ ekɛ ŋmaa henɔi, aduawai, baibai kɛ nibii krokomɛi ni ŋɔɔ woɔ shikpɔŋ lɛ “niyenii toohe” lɛ mli babaoo kɛtekeɔ nɔ. Mɛɛ Nihalɔ ni le nii, ni susuɔ mɔ he waa wɔ ŋwɛi Tsɛ lɛ ji nɛkɛ! Biblia lɛ tsɛɔ lɛ akɛ “miishɛɛ Nyɔŋmɔ.” Ni eka shi faŋŋ akɛ, eesumɔ ni wɔ hu wɔna miishɛɛ.—1 Timoteo 1:11, NW; Yesaia 25:6-8.
WƆ-TSƐ LƐ “GBƐI”
5. Mɛni esa akɛ efee nɔ ni wɔtsui shweɔ kɛji wɔmiikɛɛ Yesu sɔlemɔ he nɔkwɛmɔ nɔ lɛ mli shishijee wiemɔi lɛ yɛ wɔsɔlemɔ mli?
5 Wɔ ŋwɛi Tsɛ ni yɔɔ suɔmɔ lɛ yɛ “gbɛi kpakpa,” gbɛi kpakpa akɛ Nihalɔ Kpeteŋkpele. Eyɛ lɛ diɛŋtsɛ egbɛi ni akɛtsɛɔ lɛ hu, taakɛ adesa tsɛ fɛɛ tsɛ yɔɔ gbɛi lɛ. Kɛ wɔyɛ heloonaa tsɛ ni sa bulɛ lɛ, wɔsumɔŋ ni wɔna akɛ heguɔgbee eba egbɛi kɛ bulɛ ni eyɔɔ lɛ nɔ. Esa akɛ wɔsumɔ ni wɔna akɛ abuɔ egbɛi lɛ. Ni nɔ ni fe nakai lɛ, esa akɛ wɔshwe akɛ wɔɔna akɛ aawo wɔ ŋwɛi Tsɛ lɛ hiɛ nyam. No hewɔ lɛ, esa akɛ wɔnyɛ wɔjɛ wɔtsui muu fɛɛ mli wɔsɔle kɛ Yesu wiemɔi ni ekɛye klɛŋklɛŋ gbɛhe yɛ Sɔlemɔ Nɔkwɛmɔ Nɔ lɛ mli lɛ, akɛ: “Wɔ-Tsɛ ni yɔɔ ŋwɛi, ha ogbɛi lɛ he atse.”—Mateo 6:9, NW; Abɛi 22:1, NW shishigbɛ niŋmaa.
6. Yɛ Nyɔŋmɔ gbɛi lɛ gbɛfaŋ lɛ, mɛni obaasumɔ ni ona?
6 Lɛlɛŋ, esa akɛ efee wɔsɔlemɔ ni mli wa daa nɛɛ akɛ awó ŋwɛi kɛ shikpɔŋ Bɔlɔ kpeteŋkpele lɛ gbɛi nɔ gojoo, ni aha enɔ akwɔ fe gbɛi fɛɛ gbɛi, ni aha eje kpo faŋŋ akɛ no ji gbɛi ni jara wa, ni shishinumɔ yɔɔ he, ni asumɔɔ fe fɛɛ yɛ jeŋ muu fɛɛ. Nyɔŋmɔ gbɛi krɔŋkrɔŋ lɛ hetsemɔ he miihia kwraa fe yiwalaheremɔ ni wɔɔna. Esa akɛ atse egbɛi kɛ bulɛ ni yɔɔ he lɛ he—ni abu lɛ bem kɛjɛ heguɔgbee ni bɔɔnii ni hiɛ eshwie shi lɛ kɛba nɔ lɛ mli.
7. Mɛni Biblia lɛ kɛɔ akɛ no ji Nyɔŋmɔ gbɛi diɛŋtsɛ?
7 Mɛni ji wɔ ŋwɛi Tsɛ lɛ gbɛi diɛŋtsɛ? Ajie gbɛi nɛɛ kpo yɛ ehe wiemɔ ni tsɔɔ akɛ nakai gbɛi kpeteŋkpele lɛ Nɔtsɛ lɛ yɛ henyɛlɔi lɛ mli. Beni etsɔɔ bɔ ni mɛnɛɛmɛi ji lɛ mli lɛ, Lala 83, kukuji 18 kɛ 19 lɛ kaneɔ yɛ King James Version (Ga) Biblia lɛ mli akɛ: “Amɛhiɛ agboi ni amɛhe akpokpo daadaa, amɛbɔ amɛhe ahora ni amɛhao daa nɛɛ, koni amɛna amɛle akɛ bo, ni okome too ogbɛi ji YEHOWA lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!”—Kwɛmɔ Lala 100:3 hu.
8. Mɛni Nyɔŋmɔ henyɛlɔi lɛ eka akɛ amɛaafee egbɛi lɛ, ni mɛni ejɛ mli eba?
8 No hewɔ lɛ, Nyɔŋmɔ gbɛi ji YEHOWA. Shi gbɔmɛi ni kɛɔ akɛ amɛjaa Nyɔŋmɔ lɛ ateŋ mɛi pii ejieee bulɛ kpo amɛhaaa nakai gbɛi lɛ. Mɛi komɛi po ejie egbɛi lɛ kɛjɛ amɛ Biblia shishitsɔɔmɔi amli, ni amɛkɛ sablai tamɔ “NUŊTSƆ” kɛ “NYƆŊMƆ” ni akɛ niŋmaa okadii wuji eŋmala eye najiaŋ. Jeee teemɔ kɛkɛ nɛkɛ nifeemɔ nɛɛ kɛ Nyɔŋmɔ gbɛi ni yɔɔ nyam nɛɛ teeɔ, shi moŋ ehaa futumɔ baa Nuŋtsɔ Yehowa kɛ Nuŋtsɔ Yesu Kristo kɛ “nuŋtsɔmɛi” kɛ “nyɔŋmɔi” krokomɛi ni atsĩ amɛ tã yɛ Biblia lɛ mli lɛ ateŋ. (Lala 110:1; 5 Mose 10:17; Romabii 1:4; 1 Korintobii 8:5, 6) Te aaafee tɛŋŋ ni gbɔmɛi asɔle yɛ anɔkwayeli mli akɛ aha Tsɛ lɛ gbɛi he atse, aloo afee lɛ krɔŋkrɔŋ, yɛ be mli ni amɛmiibɔ mɔdɛŋ ni amɛtsimɔ nakai gbɛi lɛ nɔ?
9. (a) Te Nyɔŋmɔ gbɛi lɛ jeɔ kpo yɛ Hebri wiemɔ mli, kɛ agbɛnɛ wiemɔi krokomɛi hu mli tɛŋŋ? (b) Biblia lɛ tsɔɔ akɛ mɛi enyiɛ ji Nyɔŋmɔ?
9 Akɛ niŋmaa okadii יהוה, ni mɛi komɛi tsɛɔ lɛ akɛ Yahʹweh lɛ damɔɔ shi ahaa Nyɔŋmɔ gbɛi ni gbɛi ko kɛ lɛ yeee egbɔ lɛ yɛ Hebri, ni ji klɛŋklɛŋ wiemɔ ni akɛtsu nii yɛ Biblia lɛ ŋmaa mli lɛ mli. Gbɛi lɛ su ni afɔɔ nɔkpɛlɛmɔ yɛ Blɔfo mli ji “Jehovah,” ni akɛ gbɛi ni tamɔ nakai damɔɔ shi ahaa lɛ yɛ wiemɔi krokomɛi amli. Kɛ wɔkɛ gbɛi “Yehowa” lɛ tsu nii lɛ, wɔnyɛɔ wɔtsɔɔ mɔ ni wɔwieɔ ehe lɛ faŋŋ. “Yehowa kome” ni. Jeee lɛ ji Yesu Kristo, ejaakɛ Yesu ji Nyɔŋmɔ Bi anɔkwafo, “mɔ nɔŋŋ ni ji Nyɔŋmɔ ni anaaa lɛ subaŋ, bɔɔnii fɛɛ ateŋ kromɔ bi lɛ.”—Kolosebii 1:15; Marko 12:29; 5 Mose 6:4.
10. Mɛni ji Nyɔŋmɔ gbɛi lɛ shishinumɔ, ni eha ana enɛ faŋŋ yɛ mɛɛ gbɛ nɔ?
10 Gbɛi “Yehowa” lɛ hiɛ shishinumɔ ko ni mli wa waa. Etsɔɔ akɛ: “Ehaa Ebaa Mli (aloo, Ehaa Ebaa).” Enɛ kɔɔ Lɛ Diɛŋtsɛ ehe, shi jeee nibii ni E-bɔ lɛ ahe. Enɛ hewɔ lɛ, ewie akɛ “Yehowa” ji “ekaimɔ” gbɛi, beni eshwɛ fioo ni ebaatsɔ emaŋ Israel Kpɔlɔ ni he yɔɔ naakpɛɛ kɛjɛ Mizraim Farao dɛŋ lɛ. (2 Mose 3:13-15) Yɛ sɛɛ mli, beni gbalɔ Yeremia wie Nuŋtsɔ Maŋtsɛ Yehowa he akɛ ŋwɛi kɛ shikpɔŋ Feelɔ ‘kɛtsɔ ehewalɛ kpele kɛ enine ni ekpã mli lɛ’ nɔ, kɛ agbɛnɛ akɛ ‘eda yɛ ŋaawoo gbɛfaŋ, ni ehe wa yɛ nitsumɔ gbɛfaŋ’ lɛ, Yehowa ma nɔ mi eha egbalɔ lɛ akɛ, yɛ Lɛ diɛŋtsɛ ebe ni eto mli lɛ, E-baatsu nitsumɔ ko ni tamɔ nɔ ni anyɛŋ atsu kɛtsɔ E-webii lɛ Ajielɔ kɛmiijɛ Babilon Maŋtsɛyeli lɛ nyɔŋyeli mli ni eeetsɔ lɛ nɔ. Ni efee nakai hu!—Yeremia 32:17-19, 27, 44; 2 Kronika 36:15-23.
11. Abaanyɛ akɛ Nyɔŋmɔ gbɛi atsa emaŋtsɛyeli lɛ ŋmɛnɛ yɛ mɛɛ gbɛ nɔ?
11 Ŋmɛnɛ hu, Yehowa ji Nyɔŋmɔ kpeteŋkpele ni “haa ebaa mli.” Lɛ diɛŋtsɛ enyɛɔ etsɔɔ nɔ fɛɛ nɔ ni he hiaa, ni etsuɔ gbɛhe fɛɛ gbɛhe ni he hiaa he nii, bɔni afee ni ekɛtsu naakpɛɛ nibii ahe nii kɛtsɔ e-Maŋtsɛyeli lɛ nɔ, yɛ egbɛi lɛ hetsemɔ mli, kɛ agbɛnɛ kɛha ewebii asɛɛnamɔ. Nɔ fɛɛ nɔ ni ekpɛɔ eyiŋ akɛ ebaafee lɛ, efeɔ, kɛ omanyeyeli.—Yesaia 48:17; 55:11.
ATSE NYƆŊMƆ GBƐI LƐ HE?
12. Te gbɔmɛi adesai ebu Nyɔŋmɔ amɛha tɛŋŋ?
12 Ani adesai ejie hiɛsɔɔ, bulɛ kɛ suɔmɔ kpo amɛha Nyɔŋmɔ kpeteŋkpele, ni ja ni eha ebɔɔnii ni yɔɔ shikpɔŋ nɛɛ nɔ lɛ nibii babaoo nɛɛ? Kwɛmɔ je lɛŋ he fɛɛ he kɛkpe, ni obaana hetoo lɛ. Kwɛ bɔ ni eji dɔlɛ sane akɛ jamɔi babaoo ni yɔɔ maji ni atsɛɔ amɛ Kristofoi amaji amli lɛ eha gbɔmɛi ena Nyɔŋmɔ he jwɛŋmɔ fɔŋ! Nɛkɛ maji nɛɛ ateŋ babaoo buɔ lɛ akɛ eji mligbalamɔ Nyɔŋmɔ, ni amɛsɔleɔ amɛhaa lɛ ni eye ebua amɛ ni amɛwuu amɛshi amɛnanemɛi gbɔmɛi. Mɛi krokomɛi hu buɔ lɛ akɛ Nyɔŋmɔ yitsoŋwalɔ, ni tsirɛɔ “susumai ni egboi” lɛ ewoɔ amanehulu la ni ji naanɔ piŋmɔ mli. Ni mɛi krokomɛi hu eba lɛ shi kwraa ni amɛkɛ lɛ toɔ tsei kɛ tɛi amagai ni wala bɛ amɛmli lɛ ahe. Mɛi babaoo eje gbɛ amɛku ejalɛ mlai lɛ amli, ni amɛkɛɔ akɛ Nyɔŋmɔ enaaa nii, aloo jeee ehe sane ji nɔ ko.—Okɛ Bɔfoi lɛ Asaji 10:34, 35; Yeremia 7:31; Yesaia 42:8 kɛ 1 Petro 5:7 ato he.
13. Kɛji aŋmɛ gbɛ ni gbɔmɛi ni alaka amɛ lɛ tee nɔ yɛ amɛgbɛ ni suɔmɔ bɛ mli lɛ nɔ lɛ, mɛni baajɛ mli aba yɛ naagbee?
13 Shi, kɛji gbɔmɛi ni alaka amɛ lɛ sumɔɔɔ Nyɔŋmɔ ni amɛtseee egbɛi lɛ he lɛ, te amɛaafee tɛŋŋ amɛsumɔ amɛnanemɛi gbɔmɛi adesai? (1 Yohane 4:20, 21; 5:3) Ni kɛji asaaa atooo suɔmɔ shishi ekoŋŋ yɛ adesai aweku lɛ mli lɛ, no lɛ naagbee lɛ je lɛ baatsɔ he ko ni ekomefeemɔ bɛ, shi moŋ awuiyeli kɛ basabasa feemɔ. Hei komɛi yɛ ni shihilɛ lɛ etsɔ nakai momo po. Akɛni nuklea tawuu nii egbɛ eshwa jeŋmaji lɛ amli hewɔ lɛ, gbi ko lɛ gbɔmɛi ni sumɔɔ tawuu lɛ baanyɛ akpata adesai aweku muu lɛ fɛɛ hiɛ. Shi wɔ-Tsɛ ni yɔɔ suɔmɔ lɛ eŋmɛŋ gbɛ ni nɔ ko tamɔ nɛkɛ aba kɔkɔɔkɔ!—Lala 104:5; 119:90; Yesaia 45:18.
BƆ NI NYƆŊMƆ FEƆ ETSEƆ EGBƐI LƐ HE
14, 15. Namɔ nyiɛɔ hiɛ yɛ Nyɔŋmɔ gbɛi lɛ hetsemɔ mli, ni yɛ mɛɛ gbɛ nɔ?
14 Namɔ nyiɛɔ hiɛ yɛ Nyɔŋmɔ gbɛi lɛ hetsemɔ mli? Eka shi faŋŋ akɛ, Yehowa diɛŋtsɛ! Ni efeɔ enɛ kɛtsɔɔ nii ni efeɔ ni ekɛbuɔ ejalɛ shishitoo mlai lɛ bem lɛ nɔ. Ebaatsu kojomɔ he nii yɛ mɛi fɛɛ ni tseɔ esuɔmɔnaa nii krɔŋkrɔŋ lɛ hiɛ atua, kɛ mɛi hu ni nyɛɔ amɛnanemɛi gbɔmɛi anɔ, kɛ mɛi ni tsɔɔ amale tsɔɔmɔi yɛ Nyɔŋmɔ he lɛ anɔ. (Lala 140:13, 14; Yeremia 25:29-31) Yehowa nyɛŋ etsĩ ehe naa yɛ enɛ mli. Lɛ ji anɔkwa Nyɔŋmɔ lɛ, ni esa akɛ ebɔɔnii fɛɛ kɛ jamɔ aha ekome too pɛ. Lɛ ji Jeŋ Muu Fɛɛ Nuŋtsɔ, mɔ ni esa akɛ bɔɔnii fɛɛ afee toiboo amɛha lɛ lɛ.—Romabii 3:4; 2 Mose 34:14; Lala 86:9.
15 Yɛ egbɛi lɛ hetsemɔ mli lɛ, Jeŋ Muu Fɛɛ Nuŋtsɔ Yehowa baajie gbɔmɛi adesai fɛɛ ni kɛ amɛnifeemɔ fiteɔ nii, kɛteɔ shi woɔ esuɔmɔnaa nii lɛ kɛjɛ shikpɔŋ nɛɛ nɔ. Ebaafee enɛ ejaakɛ enyɛɔ efɔŋ feemɔ ni esumɔɔ jalɛ nifeemɔ. (Lala 11:5-7) Taakɛ lɛ diɛŋtsɛ ekɛɛ lɛ: “Ni mafee mihe agbo, ni mafee mihe krɔŋkrɔŋ, ni maha ale mi yɛ jeŋmaji pii ahiɛ, ni amɛaana amɛle akɛ miji Yehowa lɛ.” (Ezekiel 38:23) No hewɔ lɛ, belɛ eyɛ faŋŋ akɛ kɛji wɔmiitao ni wɔna Yehowa nɔkpɛlɛmɔ lɛ, no lɛ esa akɛ wɔ hu wɔtse egbɛi lɛ he, ni wɔbu lɛ akɛ gbɛi krɔŋkrɔŋ ni sa bulɛ kwraa kɛmɔ shi, ni wɔhi shi yɛ esuɔmɔnaa nifeemɔ kɛ gbeekpamɔ naa.
16. Mɛɛ gbɛfaŋnɔ wɔjeŋba naa yɛ Nyɔŋmɔ gbɛi lɛ hetsemɔ mli?
16 Mɛi fɛɛ ni jaa Yehowa lɛ ajeŋba woɔ Nyɔŋmɔ gbɛi lɛ hiɛ nyam aloo egbeɔ he guɔ. Eba akɛ wɔ fɛɛ wɔɔba wɔjeŋ bɔ ni baaha mɛi krokomɛi awie Nyɔŋmɔ kpeteŋkpele ni wɔsɔmɔɔ lɛ lɛ he ekpakpa, ni eha Yehowa diɛŋtsɛ hu tsui anya kɛ miishɛɛ. (1 Petro 2:12; Abɛi 27:11) Akɛ bii toibolɔi lɛ, esa akɛ wɔsumɔ akɛ wɔɔda wɔ Tsɛ lɛ shi yɛ nikeenii fɛɛ ni eha wɔ, ni wɔshia fɛfɛo—shikpɔŋ nɛɛ—fata he, ni abaasaa lɛ ni aha efee nyam babaoo yɛ e-Bi lɛ Maŋtsɛyeli nɔyeli lɛ shishi lɛ he.—Yesaia 6:3; 29:22, 23.
17. Mɛɛ su esa akɛ wɔkɛbɛŋkɛ “naanɔi a-Maŋtsɛ lɛ” yɛ sɔlemɔ mli?
17 Kwɛ bɔ ni wɔsumɔɔ waa akɛ wɔkɛ nɛkɛ “naanɔi a-Maŋtsɛ” nɛɛ ana wekukpaa ni ekpɛlɛɔ nɔ! Shi kɛlɛ, wɔnyɛŋ wɔfee enɛ yɛ wɔ diɛŋtsɛ wɔsalɛ naa, ejaakɛ wɔ fɛɛ lɛ, fɔlɔi ni yeee emuu ŋɔ wɔ hɔ, ni amɛfɔ wɔ akɛ mɛi ni yeee emuu. Shi wɔbaanyɛ wɔsɔle wɔha Nyɔŋmɔ taakɛ Maŋtsɛ David fee lɛ, akɛ: “Teemɔ ohiɛ kɛjɛ mihe eshai lɛ anɔ, ni ogbe minishaianii lɛ fɛɛ! Nyɔŋmɔ, bɔɔ tsui ni he tse oha mi, ni ofee mumɔ ni fiɔ shi ehee yɛ mimli.” (Lala 51:7-12) Beni wɔleɔ nɔ ni “wɔ-Tsɛ ni yɔɔ ŋwɛi” lɛ taoɔ yɛ wɔdɛŋ lɛ, wɔbaanyɛ wɔsɔle ni wɔna naanɔ jɔɔmɔi ni e-Maŋtsɛyeli lɛ kɛbaaba lɛ mli gbɛfaŋnɔ. Hɛɛ, wɔbaanyɛ wɔkɛ hekɛnɔfɔɔ asɔle ni Nyɔŋmɔ Maŋtsɛyeli lɛ aba. Ni mɛni nakai maŋtsɛyeli lɛ baatsɔɔ kɛha adesai yɛ shikpɔŋ nɛɛ nɔ? Ha wɔkwɛ.