Yitso 10

“Satan Nibii ni Mli Kwɔlɔ” lɛ Nyaŋemɔ

TIATIRA

1. Nɛgbɛ Tiatira yɔɔ kɛ akɛto asafoi krokomɛi lɛ ahe, ni mɛɛ jamɔ nɛkɛ yaa nɔ yɛ jɛmɛ?

NƆ NI ka Bergama (Pergamo) wuoyi-bokagbɛ aaafee shitoi 40 ji Turkeybii amaŋ Akhisar ni gbɔmɛi pii yɔɔ jɛmɛ lɛ. Aaafee afii 1,900 ni eho nɛ lɛ, no mli lɛ biɛ ji he ni Tiatira yɔɔ. Nɔkwɛlɔ gbɛfalɔ baanyɛ ashɛ nɛkɛ maŋ Tiatira nɛɛ mli oya kɛtsɔ gbɛ ni eeefa kɛtsɔ gbɛjegbɛ ni jɛɔ Pergamo lɛ nɔ ni agbɛnɛ ebɔle shi kɛya asafoi ni eshwɛ ni yɔɔ Kpojiemɔ yitso 3 lɛ amli—Sarde, Filadelfia, kɛ Laodikea. Tiatira tamɔɔɔ Pergamo, ejaakɛ ejeee he ko ni ehe gbɛi yɛ maŋtsɛ jamɔ lɛ mli, shi eyɛ gbatsui kɛ sɔlemɔtsui ni ajɔɔ nɔ aha wɔŋjalɔi anyɔŋmɔi. Ale Tiatira akɛ jarayeli maŋ diɛŋtsɛ.

2, 3. (a) Mɛni atsɔ hiɛ aŋma yɛ Tiatiranyo ni batsɔ Kristofonyo ko he? (b) Akɛ Yesu ji “Nyɔŋmɔ Bi” ni “ehiŋmɛii tamɔ lalilɛi” lɛ tsɔɔ mɛni kɛhaa Kristofoi ni yɔɔ Tiatira lɛ?

² Beni Paulo shiɛɔ yɛ Makedonia lɛ, ekɛ Tiatira yoo ko ni atsɛɔ lɛ Lidia, ni hɔɔ kɔɔjaŋ kpe. Lidia kɛ eshiabii lɛ fɛɛ kpɛlɛ sane ni Paulo shiɛɔ lɛ nɔ kɛ miishɛɛ ni amɛjie gbɔfeemɔ ni ekaaa kpo amɛtsɔɔ lɛ. (Bɔfoi lɛ Asaji 16:14, 15) Lɛ ji mɔ ni bafee klɛŋklɛŋ Tiatiranyo ni ale ni kpɛlɛ Kristojamɔ nɔ. Yɛ be ni sa mli lɛ, maŋ lɛ diɛŋtsɛ bana Kristofoi asafo. Yesu kɛ eshɛɛ sane ni kɛ fe fɛɛ lɛ ha amɛ yɛ jɛmɛ: “Ni Tiatira asafo lɛ bɔfo lɛ, ŋmaa oyaha lɛ akɛ: Nii ni Nyɔŋmɔ Bi lɛ ni ehiŋmɛii tamɔ lalilɛi ni enaji tamɔ ayawa ni kpɛɔ nyeramnyeram lɛ kɛɛ nɛ.”—Kpojiemɔ 2:18, New World Translation.

³ Enɛ ji be pɛ mli ni wiemɔ “Nyɔŋmɔ Bi” lɛ pueɔ yɛ Kpojiemɔ, eyɛ mli akɛ Yesu wieɔ Yehowa he yɛ hei krokomɛi akɛ “mi-Tsɛ.” (Kpojiemɔ 2:27; 3:5, 21) Eka shi faŋŋ akɛ sabala nɛɛ ni akɛtsu nii yɛ biɛ lɛ kaiɔ Tiatira Kristofoi lɛ akɛ Yesu kɛ Yehowa yeɔ yitsoŋ sane diɛŋtsɛ. Nɛkɛ Bi nɛɛ “hiŋmɛii tamɔ lalilɛi”—kɔkɔbɔɔ kɛha Kristofoi ni yɔɔ Tiatira lɛ akɛ ekojomɔ lɛ baatso tamɔ la ashi nɔ fɛɛ nɔ ni enaa ni gbeɔ asafo lɛ he guɔ lɛ. Akɛni shii enyɔ nɛ ni ewieɔ enaji ni tamɔ ayawa ni kpɛlɛɔ lɛ he hewɔ lɛ, emaa lɛ diɛŋtsɛ enɔkwayeli he nɔkwɛmɔnɔ ni kpɛlɛɔ kaŋkaŋ yɛ be mli ni enyiɛ shikpɔŋ nɛɛ nɔ lɛ nɔ mi. Ŋwanejee ko bɛ he akɛ Kristofoi ni yɔɔ Tiatira lɛ bo eŋaawoo lɛ toi, ni esa akɛ wɔfee nakai ŋmɛnɛ!—1 Petro 2:21.

4, 5. (a) Mɛni hewɔ Yesu baanyɛ ajie Kristofoi ni yɔɔ Tiatira lɛ ayi lɛ? (b) Mɛɛ gbɛ nɔ asafo ni yɔɔ Tiatira lɛ tamɔ asafoi ni yɔɔ ŋmɛnɛ lɛ?

⁴ Yɛ miishɛɛ mli lɛ, Yesu baanyɛ ajie mɛi ni yɔɔ Tiatira lɛ ayi. Ekɛɔ akɛ: “Mile onitsumɔi lɛ kɛ osuɔmɔ lɛ kɛ osɔɔmɔ lɛ kɛ ohemɔkɛyeli lɛ kɛ otsuishiŋmɛɛ lɛ, ni mile onitsumɔi lɛ akɛ sɛɛkpee nii lɛ fe tsutsu nii lɛ tete.” (Kpojiemɔ 2:19) Akɛ mɛi ni tamɔɔɔ Efesobii lɛ, Kristofoi ni afɔ amɛ mu ni yɔɔ jɛmɛ lɛ elajeko amɛ klɛŋklɛŋ suɔmɔ ni amɛyɔɔ kɛha Yehowa lɛ. Ni amɛhemɔkɛyeli mli wa. Agbɛnɛ hu, amɛnitsumɔi lɛ fa fe tsutsu nɔ lɛ, ni taakɛ asafoi etɛ ni tsɔ hiɛ lɛ ji lɛ, Kristofoi ni yɔɔ Tiatira lɛ miiŋmɛ amɛtsui shi. Kwɛ bɔni amɛfeɔ Yehowa Odasefoi asafoi aaafee 100,000 ni yɔɔ shikpɔŋ muu lɛ fɛɛ nɔ ŋmɛnɛ lɛ he mfoniri ha! Suɔmɔ kɛha Yehowa kpɛɔ kɛtsɔɔ mli, yɛ be mli ni ekaafeemɔ mumɔ ni amɛyɔɔ yɛ sɔɔmɔ nitsumɔ lɛ mli lɛ gbuɔ shi kɛboteɔ asafo lɛ mli, ni ekanyaa gbekɛbii kɛ onukpai fɛɛ lɛ. Amɛteŋ mɛi ni amɛyifalɛ miiya hiɛ kɛ amɛhe miiha akɛ gbɛgbalɔi, ni tsɔɔ akɛ amɛkɛ amɛbe ni eshwɛ lɛ miijaje Nyɔŋmɔ Maŋtsɛyeli ni baa lɛ anunyam hiɛnɔkamɔ lɛ amɛmiitsɔɔ yɛ nilee mli!—Mateo 24:14; Marko 13:10.

⁵ Afii nyɔŋmai abɔ nɛ ni anɔkwafoi pii, ni jɛ shwɛɛnii ni afɔ amɛ mu lɛ kɛ asafo babaoo lɛ ateŋ etee nɔ ejie tsuishiŋmɛɛ ni ekaaa kpo yɛ Nyɔŋmɔ sɔɔmɔ mli, yɛ be mli ni jeŋ ni ebɔle amɛhe kɛkpe lɛ maa eyi shi vii kɛboteɔ duŋ kpii ni hiɛnɔkamɔ bɛ mli lɛ mli lɛ. Shi nyɛhaa wɔnaa ekaa! Kpojiemɔ maa Nyɔŋmɔ gbalɔi ni tsɔ hiɛ lɛ odaseyeli lɛ nɔ mi. “Yehowa gbi wulu lɛ ebɛŋkɛ, ebɛŋkɛ ni eeye oyai naakpa.”—Zefania 1:14; Yoel 2:1; Habakuk 2:3; Kpojiemɔ 7:9; 22:12, 13.

“Nakai Yoo Isabel Lɛ”

6. (a) Yɛ nibii ni sa yijiemɔ lɛ fɛɛ sɛɛ lɛ, mɛɛ naagba Yesu kadi yɛ asafo ni yɔɔ Tiatira lɛ mli ni he hiaa ni atsu he nii amrɔ nɔŋŋ? (b)  Namɔ ji Isabel, ni ani eyɛ nɔ ni ja ni eeenyɛ edamɔ nɔ efee gbalɔyoo?

⁶ Yesu hiŋmɛii ni tamɔ lalilɛi lɛ egbu shi kɛtee shɔŋŋ. Ekadiɔ nɔ ko ni sa akɛ atsu he nii amrɔ nɔŋŋ. Ekɛɔ Kristofoi ni yɔɔ Tiatira lɛ akɛ: “Shi kɛlɛ, mikɛo yɛ sane ko, akɛ oŋmɛ nakai yoo Isabel lɛ, ni tsɛɔ ehe gbalɔyoo lɛ gbɛ, ni etsɔɔ mitsuji lɛ anii ni elakaa amɛ ni amɛbɔ ajwamaŋ ni amɛye nibii ni akɛsha afɔle aha wɔji.” (Kpojiemɔ 2:20, New World Translation) Yɛ afii ohai nyɔŋma D.Ŋ.B. lɛ mli lɛ, Maŋnyɛ Isabel, Israel Maŋtsɛ Ahab ŋa Baal jalɔ lɛ bafee mɔ ni he gbɛi gbonyo yɛ egbɔmɔgbee, egbalafitemɔ kɛ nɔnyɛɛ gbɛi lɛ ahewɔ. Yehu, akɛ mɔ ni Yehowa efɔ lɛ mu lɛ ha agbe lɛ. (1 Maŋtsɛmɛi 16:31; 18:4; 21:1-16; 2 Maŋtsɛmɛi 9:1-7, 22, 30, 33) Isabel wɔŋjalɔ lɛ nyɛŋ atsɔɔ akɛ gbalɔyoo ji lɛ. Etamɔɔɔ Miriam kɛ Debora, ni sɔmɔ akɛ gbalɔyei anɔkwafoi yɛ Israel lɛ. (2 Mose 15:20, 21; Kojolɔi 4:4; 5:1-31) Ni Yehowa mumɔ lɛ hu tsirɛɛɛ lɛ koni egba taakɛ bɔ ni etsirɛ Hana ni egbɔ lɛ kɛ Filipo sanekpakpashiɛlɔ lɛ biyei ejwɛ lɛ.—Luka 2:36-38; Bɔfoi lɛ Asaji 21:9.

7. (a) “Nakai yoo Isabel” lɛ ni Yesu tsi eta lɛ tsɔɔ akɛ ekɛmiitsɔɔ mɛɛ su loo hewalɛ ko? (b) Yɛ mɛɛ gbɛ nɔ ekolɛ yei komɛi ni kɛ amɛhe ebabɔ asafo lɛ he lɛ buɔ amɛ pɛsɛmkunya gbɛ ni yɔɔ keketee lɛ bem?

⁷ Eka shi faŋŋ akɛ, “nakai yoo Isabel” lɛ ni kɛɔ akɛ eji gbalɔyoo yɛ Tiatira lɛ ji amalelɔ. Nyɔŋmɔ mumɔ lɛ fiii esɛɛ. Namɔ ji yoo nɛɛ? Eka shi faŋŋ akɛ eji yoo ko loo yei akuu ko ni hiɛ gbooo nii ni miifee nii koni amɛfite asafo lɛ. Ekolɛ yei ni kɛ amɛhe ebabɔ asafo lɛ he lɛ miiha asafo lɛ mlibii lɛ ateŋ mɛi komɛi kɛ amɛhe miiwo jeŋba shara mli, ni amɛkɛ hiɛwaa miibu nɛkɛ amɛ pɛsɛmkunya gbɛ ni amɛtsɔɔ nɔ nɛɛ bem kɛtsɔ ŋmalɛi ni amɛtsɔɔ shishi yɛ gbɛ ni ejaaa nɔ lɛ nɔ. Eji apasa gbalɛ diɛŋtsɛ! Amɛbaalaka mɛi krokomɛi koni amɛbanyiɛ amɛ diɛŋtsɛ amɛ “ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ” nifeemɔi lɛ asɛɛ. (Kolosebii 3:5) Amɛbaasumɔ ni mɛi ni yɔɔ asafo lɛ mli lɛ kɛ amɛhe awo jeŋba shara, akɔnɔi asɛɛdii shihilɛ ni amrɔ nɛɛ akpɛlɛɔ nɔ loo akuɔ hiɛ ashwieɔ nɔ yɛ Kristendom jamɔi babaoo mli lɛ mli.

8. (a) Mɛni Yesu jaje yɛ “Isabel” ni yɔɔ Tiatira lɛ he? (b) Anu yei ahewalɛ he yɛ gbɛ ni ejaaa nɔ yɛ ŋmɛnɛŋmɛnɛ beaŋ yɛ mɛɛ gbɛ nɔ?

⁸ Yesu tee nɔ ekɛɛ onukpai ni yɔɔ Tiatira lɛ akɛ: “Ni miha lɛ be, koni ekɛtsake etsui, shi esumɔɔɔ akɛ etsake kɛjɛ ejwamaŋbɔɔ lɛ mli. Naa, mikɛ lɛ miifɔ saa nɔ ni mikɛ mɛi ni kɛ lɛ efite gbala lɛ hu miiwo amanehulu kpeteŋkpele mli, ja amɛtsake amɛtsuii kɛjɛ enitsumɔi lɛ amli.” (Kpojiemɔ 2:21, 22) Taakɛ bɔ ni eka shi faŋŋ akɛ shishijee Isabel lɛ ye Ahab nɔ ni ebuuu Nyɔŋmɔ blafo, Yehu hu lɛ, nakai nɔŋŋ nɛkɛ yei asu nɛɛ baanyɛ abɔ mɔdɛŋ ni amɛkudɔ wumɛi kɛ onukpai. Etamɔ nɔ ni onukpai ni yɔɔ Tiatira lɛ miiŋmɛ hewalɛ ni Isabel ni bɛ heshibaa nɛɛ naa yɛ mɛi anɔ lɛ gbɛ. Yesu miibɔ amɛ kɔkɔ ni mli wa yɛ biɛ, kɛ agbɛnɛ kɛha Yehowa webii asafo ni yɔɔ jeŋ muu fɛɛ lɛ ŋmɛnɛ. Yɛ ŋmɛnɛŋmɛnɛ beaŋ hu lɛ, yei komɛi ni yɔɔ keketee lɛ etsɔ amɛwumɛi ayiŋ ni amɛbatsɔmɔ hemɔkɛyeli kwalɔi ni amɛkɛ Yehowa anɔkwa tsuji lɛ po etee saneyeli hei.—Okɛto Yuda 5-8 he.

9. (a) Mɛni hewɔ Yesu wiemɔi ni kɔɔ Isabel he lɛ etsɔɔɔ akɛ aawie yei fɛɛ ni yɔɔ asafo lɛ mli lɛ ahe efɔŋ lɛ? (b) Mɛɛ be mli pɛ Isabel su loo hewalɛ teɔ shi?

⁹ Enɛ egbeee yei anɔkwafoi ni yɔɔ Kristofoi asafo lɛ mli lɛ ahe guɔ yɛ gbɛ ko nɔ. Mɛi ni tsuɔ odaseyeli nitsumɔ lɛ titri yɛ ŋmɛnɛŋmɛnɛ gbii nɛɛ amli lɛ ji nyɛmimɛi yei anɔkwafoi; yɛ shia Biblia mli nikasemɔi ni amɛfeɔ lɛ hewɔ lɛ, amɛkɛ mɛi pii miiba asafo lɛ mli. Nyɔŋmɔ diɛŋtsɛ jɔɔ nɛkɛ gbɛjianɔtoo nɛɛ nɔ, taakɛ atsɔɔ yɛ Lala 68:12 lɛ: “Nuŋtsɔ [Yehowa] lɛ ha anu hewalɛ wiemɔ; yei ni shiɛɔ kunimyeli lɛ fa babaoo.” Ŋamɛi aheshibaa kɛ bulɛ subaŋ ni “jara wa yɛ Nyɔŋmɔ hiɛ” lɛ naa amɛwumɛi anɔ hewalɛ kpakpa. (1 Petro 3:1-4) Maŋtsɛ Lemuel jieɔ yoo kpakpa ni le nitsumɔ lɛ yi. (Abɛi 31:10-31) Yɛ be mli ni yei jeɔ amɛŋɛlɛ nɔ ni amɛlakaa hii loo amɛtswaa yitsoyeli lɛ mpoa aloo amɛkuɔ amɛhiɛ amɛshwieɔ nɔ lɛ pɛ haa Isabel hewalɛ lɛ teɔ shi.—Efesobii 5:22, 23; 1 Korintobii 11:3.

10. (a) Mɛni hewɔ Isabel kɛ ebii lɛ anine shɛ fɔbuu kojomɔ nɔ lɛ? (b) Mɛɛ shihilɛ ko ni oshara yɔɔ mli mɛi ni batsɔmɔɔ Isabel bii lɛ boteɔ mli, ni mɛni ji nɔ ni esa akɛ mɛi ni tamɔ nɛkɛ afee?

¹⁰ Yɛ be mli ni ewieɔ “nakai yoo Isabel” lɛ he lɛ, Yesu tee nɔ akɛ: “Ni ebii lɛ, gbe magbe amɛ; ni asafoi lɛ fɛɛ aaana ale akɛ mi ji mɔ ni taoɔ sabai kɛ tsuii amli, ni maha nyɛteŋ mɔ fɛɛ mɔ bɔ ni nyɛnitsumɔi lɛ yɔɔ lɛ.” (Kpojiemɔ 2:23) Yesu eha Isabel kɛ ebii lɛ be koni amɛtsake, shi amɛmiiya nɔ yɛ amɛjeŋba shara gbɛi lɛ amli lolo ni yɛ enɛ hewɔ lɛ esa akɛ amɛnine ashɛ kojomɔ nɔ. Shɛɛ sane ko ni mli wa yɛ biɛ kɛha Kristofoi ni yɔɔ ŋmɛnɛ lɛ. Mɛi ni kaseɔ Isabel, kɛ amɛji hii jio yei jio, ni amɛbatsɔmɔɔ ebii kɛtsɔɔ Biblia mli shishitoo mlai ni kɔɔ yitsoyeli kɛ jeŋba kpakpa he lɛ mli ni amɛkuɔ aloo kɛtsɔɔ kuɛŋtimɔ nɔ koni amɛku amɛhiɛ amɛshwie teokrase gbɛjianɔtoo nɔ lɛ, amɛbafeɔ mɛi ni yɔɔ mumɔŋ hela he oshara ko mli. Eji anɔkwale akɛ kɛji akɛ mɔ ni tamɔ nɛkɛ tsɛ onukpai ni yɔɔ asafo lɛ mli koni amɛsɔle amɛha lɛ lɛ, “hemɔkɛyeli sɔlemɔ lɛ aaahere helatsɛ lɛ yiwala, ni Nuŋtsɔ [Yehowa] lɛ aaatee lɛ shi”—kɛ ekɛ heshibaa aaatsu nii ni ekɛ nakai sɔlemɔ lɛ akpa gbee lɛ. Shi mɔ ko akasusu akɛ ebaanyɛ eshishiu Nyɔŋmɔ loo Kristo kɛtsɔ jeŋba shara ko ni aaafee atee lɛ nɔ aloo kɛtsɔ ekaa yɛ sɔɔmɔ lɛ mli ni aaajie lɛ kpo atsɔɔ yɛ kponɔ gbɛ lɛ nɔ.—Yakobo 5:14, 15.

11. Mɛɛ gbɛ nɔ atsɔɔ ayeɔ abuaa asafoi lɛ ŋmɛnɛ koni amɛhiɛ ahi amɛhe nɔ yɛ yei ahewalɛ ni abaasumɔ ni akɛbote asafo lɛ mli yɛ gbɛ ni esaaa nɔ lɛ he yɛ?

¹¹ Yɛ miishɛɛ mli lɛ, Yehowa Odasefoi asafoi ni yɔɔ ŋmɛnɛ lɛ babaoo hiɛ yɛ amɛhe nɔ yɛ nɛkɛ oshara nɛɛ he. Onukpai lɛ kwɛɔ sui ni jeee teokrase sui kɛ nɔ fɔŋ feemɔ sui lɛ. Amɛbɔɔ mɔdɛŋ ni amɛye amɛbua hii kɛ yei fɛɛ ni yɔɔ oshara mli lɛ bɔni afee ni amɛmumɔŋ shihilɛ ahi ni ajaje amɛ dani efee akɛ ekpe sɛɛ tsɔ. (Galatabii 5:16; 6:1) Nɛkɛ nɔkwɛlɔi Kristofoi nɛɛ kɛ suɔmɔ kɛ shiŋŋfeemɔ tsiɔ mɔdɛŋ ni yoo ko aaabɔ ni eto kui loo eha nifeemɔi komɛi ni tamɔ yei aheyeli ashwere lɛ naa. Agbɛnɛ, akɛ ŋaawoo ni sa haa yɛ be kɛ bei amli yɛ Yehowa Odasefoi lɛ awoji amli.a

12. Yɛ mɛɛ gbɛ nɔ Yohane kuu ni yɔɔ ŋmɛnɛ lɛ jieɔ ekaa ni tamɔ Yehu nɔ lɛ kpo?

¹² Shi, kɛ jeŋba shara ni ehiii kwraa etee nɔ, ni titri lɛ he ni enɛ feɔ nɔ ko ni afɔɔ feemɔ lɛ, esa akɛ ashwie eshafeelɔi ni tsakeee amɛtsui lɛ kɛjɛ asafo lɛ mli. Wɔkaiɔ ekaa ni Yehu fee ni ekɛjie Isabel hewalɛ fɛɛ ni eyɔɔ yɛ Israel kɛjɛ jɛmɛ lɛ. Nakai nɔŋŋ hu Yohane kuu lɛ feɔ shiŋŋ ŋmɛnɛ yɛ nitsumɔ mli, ni amɛtoɔ okadi amɛhaa amɛnanemɛi “Yehonadab” bii lɛ, ni amɛkɛtsɔɔ akɛ esoro amɛ kwraa yɛ Kristendom sɔɔlɔi ni ŋmɛɔ nɔ fɛɛ nɔ feemɔ gbɛ lɛ ahe.—2 Maŋtsɛmɛi 9:22, 30-37; 10:12-17.

13. Mɛni baaba mɛi ni baa amɛhe shi amɛhaa yei ahewalɛ ni ejaaa gbɛ lɛ anɔ?

¹³ Akɛ Yehowa Bɔfo kɛ Kojolɔ lɛ, Nyɔŋmɔ Bi lɛ tsuɔ nii amrɔ ni ehaa ayɔseɔ ŋmɛnɛŋmɛnɛ beaŋ Isabel ni ekɛ hela tswaa lɛ efɔɔ saa nɔ, ejaakɛ emumɔŋ hela lɛ ji nɔ ko ni anyɛŋ atsa. (Maleaki 3:1, 5) Mɛi ni kɛ amɛhe eha nɛkɛ yei asu fɔŋ nɛɛ hu baana amanehulu kpeteŋkpele—awerɛho ni ji shwiemɔ ni ashwieɔ amɛ, afoɔ amɛ ashɛɔ afɔɔ kɛjɛɔ Kristofoi asafo lɛ mli tamɔ amɛgboi. Ja amɛtsake, ni amɛtsi amɛhe, ni ahe amɛ kɛba asafo lɛ mli ekoŋŋ, kɛ jeee nakai lɛ gbɔmɔtso mli gbele diɛŋtsɛ kɛtsɔ ‘hela ni gbeɔ mɔ’—ni baaba yɛ amanehulu kpeteŋkpele lɛ mli lɛ aaaba amɛnɔ. Shi, abaanyɛ asaa amɛ ekoŋŋ kɛji akɛ amɛtsake amɛtsui kɛjɛ amɛnifeemɔi gbohii lɛ amli.—Mateo 24:21, 22; 2 Korintobii 7:10.

14. (a) Mɛɛ gbɛ nɔ Yesu kɛ onukpai lɛ tsuɔ nii ni amɛtsuɔ naagbai komɛi ahe nii, tamɔ hewalɛ ni Isabel naa lɛ nɛkɛ yɛ? (b) Te esa akɛ asafo lɛ afi onukpai ni tsuɔ naagbai nɛɛ ahe nii lɛ sɛɛ amɛha tɛŋŋ?

¹⁴ Esa akɛ “asafoi lɛ fɛɛ” ale akɛ Yesu taoɔ “sabai,” ni ji henumɔi ni mli kwɔlɔ lɛ, kɛ ‘tsui’ lɛ, mli gbɛ gbɔmɔ lɛ, ni yiŋtoi ni hɔlɔ shishi fata he lɛ amli. Yɛ enɛ hewɔ lɛ, ekɛ ŋulamii loo onukpai ni anyɛɔ akɛ he fɔɔ amɛnɔ tsuɔ nii yɛ naagbai komɛi ahe nitsumɔ mli, tamɔ yɛ he fɛɛ he ni Isabel hewalɛ nɛɛ aaajie ehe kpo yɛ lɛ nɛkɛ. (Kpojiemɔ 1:20) Beni nɛkɛ onukpai nɛɛ etao sane ni tamɔ nɛkɛ mli ni akɛ kojomɔ ni sa eha lɛ, ejeee gbɛnaa nii ni ka aŋkroaŋkroi anɔ dɔŋŋ akɛ amɛtao nɔ hewɔ kɛ mɛni hewɔ ni afee nakai lɛ mli. Esa akɛ mɔ fɛɛ mɔ akpɛlɛ bɔ ni onukpai lɛ etsu sane lɛ he nii lɛ nɔ yɛ heshibaa mli, ni amɛya nɔ amɛfi nɛkɛ asafo mli ŋulamii nɛɛ asɛɛ. Abaawo anɔkwayeli kɛha Yehowa kɛ egbɛjianɔ ni eto yɛ esafo lɛ mli lɛ he nyɔmɔ. (Lala 37:27-29; Hebribii 13:7, 17) Yɛ bo diɛŋtsɛ ogbɛfaŋ lɛ, eba akɛ gbɛfaŋnɔ ni onaa yɛ mli lɛ aaatsɔ jɔɔmɔ yɛ be mli ni Yesu kɛ mɔ fɛɛ mɔ nitsumɔ he nyɔmɔwoo haa lɛ lɛ.—Galatabii 5:19-24; 6:7-9.

“Nɔ ni Nyɛyɔɔ lɛ Nyɛhiɛa Mli”

15. (a) Mɛni Yesu yɔɔ ni ebaakɛɛ mɛi ni Isabel fiteko amɛ lɛ? (b) Mɛni tsɔɔ akɛ jeee mɛi fɛɛ ni kɛɔ akɛ amɛji Kristofoi yɛ afi 1918 mli lɛ Kristendom ni ekwa hemɔkɛyeli lɛ efite amɛ?

¹⁵ Yesu wiemɔi ni nyiɛ sɛɛ lɛ kɛ miishɛjemɔ baa: “Shi miikɛɛ nyɛ, nyɛ mɛi fɛɛ ni nyɛshwɛ yɛ Tiatira lɛ, mɛi abɔ ni ehiɛɛɛ tsɔɔmɔ nɛɛ mli, ni amɛleee Satan nibii ni mli kwɔlɔ lɛ (bɔ ni amɛkɛɔ lɛ), akɛ: Mikɛ jatsu kroko eŋmɛŋ nyɛnɔ; shi nɔ ni nyɛyɔɔ lɛ, nyɛhiɛa mli kɛyashi beyinɔ ni maba.” (Kpojiemɔ 2:24, 25) Susumai anɔkwafoi yɛ Tiatira ni Isabel nako amɛnɔ hewalɛ. Nakai nɔŋŋ hu aaafee afii 40 dani 1918 aaashɛ ni agbɛnɛ kɛjɛ no sɛɛ lɛ, jeee mɛi fɛɛ ni kɛɔ akɛ amɛji Kristofoi lɛ ekpɛlɛ Kristendom jeŋba shara gbɛ ni fiteɔ mɔ ni egbɛ eshwa babaoo lɛ nɔ. Biblia Kaselɔi akuu fioo lɛ, ni amrɔ nɛɛ ale amɛ akɛ Yehowa Odasefoi lɛ, ebɔ mɔdɛŋ ni amɛye amɛbua sɔlemɔi lɛ amlibii ni amɛna bɔ ni Kristendom tsɔɔmɔi babaoo jeee Kristofoi atsɔɔmɔ ni amɛtsi amɛhe kɛjɛ Babilon jamɔ mli hemɔkɛyelii kɛ nifeemɔi ni amɛnine shɛ nɔ kɛtsɔ hemɔkɛyeli kwalɔ Kristendom nɔ lɛ fɛɛ he. Nɔ ni fata enɛ he ji “nakai yoo Isabel” lɛ tsɔɔmɔi ni ŋmɛɔ nɔ fɛɛ nɔ feemɔ gbɛ lɛ.

16. Eyɛ mli akɛ Yesu kɛ klɛŋklɛŋ afii oha lɛ mli Kristofoi anɔyeli kuu lɛ kɛ jatsu ko fataaa he ehaaa amɛ moŋ, shi mɛni nibii esa akɛ amɛkwa?

¹⁶ Yohane kuu lɛ ni yɔɔ ŋmɛnɛ lɛ hu ewo amɛnanemɛi ni ji asafo babaoo lɛ hewalɛ, ni amɛhiɛ ahi amɛhe nɔ yɛ jeŋba shara sui tamɔ nɔ ni yɔɔ jeŋ ni eba shi nɛɛ hiɛtserɛjiemɔ mli lɛ ahe. Ehe ehiaaa ni okwɛ loo otsɔ fitemɔ ni tamɔ nɛkɛ mli ni ootao ole bɔ ni eji aloo ni okase bɔ ni ooofee ni ojo naa foi. Eji nilee gbɛ akɛ oootsi ohe kɛaaya shɔŋŋ kwraa kɛjɛ “Satan nibii ni mli kwɔlɔ” lɛ ahe. Taakɛ Yesu kɛɔ lɛ: “Mikɛ jatsu kroko eŋmɛŋ nyɛnɔ.” Enɛ kaiɔ wɔ Kristofoi anɔyeli kuu lɛ ni hi shi yɛ klɛŋklɛŋ afii oha lɛ mli lɛ akpɔ ni amɛwo lɛ: “Ejaakɛ esa mumɔ krɔŋkrɔŋ lɛ hiɛ ni esa wɔ hu wɔhiɛ akɛ, wɔkɛ jatsu ko akafɔ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji kɛ la kɛ kooloi ni ashɔtɔ kɛ ajwamaŋbɔɔ; kɛji nyɛhi enɛɛmɛi lɛ, nyɛfee jogbaŋŋ. Nyɛhia shi jogbaŋŋ!” (Bɔfoi lɛ Asaji 15:28, 29) Bɔni afee ni oshwere yɛ mumɔŋ lɛ, kwa apasa jamɔ, la ni akɛtsuɔ nii yɛ gbɛ ni ejaaa nɔ (tamɔ la ni agbalaa awoɔ mɔ mli), kɛ jeŋba shara! Ni enɛ hu baabu ogbɔmɔtsoŋ hewalɛnamɔ he.

17. (a) Yɛ mɛɛ gbɛ nɔ Satan kɛ “nibii ni mli kwɔlɔ” eka mɛi ŋmɛnɛ? (b) Mɛni esa akɛ efee wɔsubaŋ yɛ Satan je lɛ mli “nibii ni mli kwɔlɔ” ni yɔɔ hwanyaŋŋ lɛ he?

¹⁷ Satan yɛ “nibii ni mli kwɔlɔ” krokomɛi ŋmɛnɛ, tamɔ nibii ni akaa yiŋ awieɔ lɛ hwanyaŋŋ kɛ jeŋ nilee sɔrɔtoi ni jieɔ mɛi ni le nii lɛ ayi lɛ. Kɛfata nɔ fɛɛ nɔ feemɔ gbɛ ni aŋmɛɔ, jeŋba shara mli susumɔi ahe lɛ, nɔ ni fata enɛɛmɛi ahe hu ji mumɔi atsɛmɔ kɛ sutsakemɔ tsɔɔmɔ ni akaa yiŋ awieɔ lɛ. Te Bɔlɔ, nilee fɛɛ tsɛ lɛ buɔ nɛkɛ “nibii ni mli kwɔlɔ” nɛɛ tɛŋŋ? Bɔfo Paulo ŋɔ ewiemɔi lɛ ekɛtsu nii akɛ: “Mafite nilelɔi anilee.” Nɔ ni tamɔɔɔ enɛ lɛ, “Nyɔŋmɔ nibii ni mli kwɔlɔ” lɛ yɛ mlɛo, amɛmli ka shi faŋŋ, ni eshɛjeɔ mɔ mii. Kristofoi ni le nii lɛ kpooɔ Satan je lɛ mli “nibii ni mli kwɔlɔ” ni yɔɔ hwanyaŋŋ lɛ. Kaimɔ akɛ, “je lɛ miiho aya kɛ ekɔnɔi, shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Korintobii 1:19, Kingdom Interlinear; 2:10; 1 Yohane 2:17.

18. Mɛɛ jɔɔmɔi Yesu wo Kristofoi ni afɔ amɛ mu ni hiɔ shi akɛ anɔkwafoi kɛyashiɔ naagbee lɛ shi yɛ he, ni mɛɛ hegbɛ mɛi ni abaatee amɛ shi nɛɛ baana yɛ Harmagedon?

¹⁸ Agbɛnɛ Yesu kɛ miishɛjemɔ wiemɔi haa nakai Kristofoi ni yɔɔ Tiatira lɛ. Wiemɔi nɛɛ hu woɔ Kristofoi ni afɔ amɛ mu lɛ hewalɛ ŋmɛnɛ: “Ni kunimyelɔ lɛ kɛ mɔ ni toɔ minitsumɔi lɛ kɛyashiɔ naagbee lɛ, maha lɛ hegbɛ yɛ jeŋmaji lɛ anɔ, ni ekɛ dadetso aaakpala amɛ ni eeejwara amɛ tamɔ ajwaraa su gbɛi lɛ, taakɛ bɔ ni mi hu mina kɛjɛ mi-Tsɛ ŋɔɔ lɛ.” (Kpojiemɔ 2:26, 27) Eji hegbɛ ni yɔɔ naakpɛɛ lɛlɛŋ! Nɛkɛ hegbɛ ni kunimyelɔi ni afɔ amɛ mu nɛɛ anine shɛɔ nɔ yɛ amɛshitee lɛ mli lɛ ji gbɛfaŋnɔ ni amɛkɛ Yesu naa yɛ hiɛkpatamɔ “dadetso” ni amɛkɛtsuɔ nii amɛshiɔ jeŋmaji atuatselɔi lɛ yɛ Harmagedon lɛ mli. Nakai jeŋmaji lɛ anuklea lɛ fɛlɛmɔ baatamɔ kukwɛi shishi lai ni efɔ fɛlɛmɔ ni no pɛ amɛbaanyɛ amɛfee, yɛ be mli ni Kristo jwaraa ehenyɛlɔi lɛ dukuduku taakɛ afeɔ gbɛshɔlɔ gbɛ lɛ.—Lala 2:8, 9; Kpojiemɔ 16:14, 16; 19:11-13, 15.

19. (a) Namɔ ji “leebi ŋulami” [tooloo] lɛ, ni akɛ lɛ baaha mɛi ni yeɔ kunim lɛ yɛ mɛɛ gbɛ nɔ? (b) Mɛɛ hewalɛwoo akɛhaa asafo babaoo lɛ?

¹⁹ Yesu kɛfata he akɛ: “Ni maŋɔ leebi ŋulami [tooloo] lɛ maha lɛ.” (Kpojiemɔ 2:28, New World Translation.) Yɛ sɛɛ mli lɛ, Yesu tsɔɔ nɔ ni nɛkɛ “ŋulami” nɛɛ diɛŋtsɛ ji lɛ mli, akɛ: “Mi ji David shishifa lɛ kɛ eseshinyo lɛ, leebi ŋulami [tooloo] ni kpɛɔ lɛ.” (Kpojiemɔ 22:16, New World Translation) Hɛɛ, Yesu ji mɔ ni haa gbalɛ ni Yehowa nyɛ Bileam nɔ ni ejaje kɛjɛ naabui ni sumɔɔɔ akɛ efeɔ nakai lɛ mli lɛ baa mli: “Ŋulami ko aaajɛ Yakob mli aba, ni maŋtsɛtso ko aaate shi kɛaajɛ Israel mli.” (4 Mose 24:17) Te Yesu aaafee tɛŋŋ ekɛ “leebi ŋulami” loo tooloo lɛ aha mɛi ni yeɔ kunim lɛ? Eka shi faŋŋ akɛ kɛtsɔ lɛ diɛŋtsɛ ehe ni ekɛaaha amɛ, ŋɔ ni eeeŋɔ amɛ ni amɛfee gbɔmɛi ni bɛŋkɛ lɛ kpaakpa ni kɛ lɛ yeɔ yitsoŋ sane lɛ nɔ. (Yohane 14:2, 3) Lɛlɛŋ akɛ eji yiŋtsɔmɔ ko koni aŋmɛ tsui shi lɛ he hewalɛwoo! Eji nɔ kroko hu ni kanyaa asafo babaoo lɛ akɛ amɛaale akɛ etsɛŋ ni “leebi ŋulami” [tooloo] ni kpɛɔ lɛ baatsu e-Maŋtsɛyeli hegbɛ lɛ he nii ni ekɛ Paradeiso aba shikpɔŋ nɛɛ nɔ ekoŋŋ!

Hiɛmɔ Emuuyeli Mli

20. Mɛɛ nibii ni tee nɔ yɛ Kristendom kaiɔ wɔ gbɔjɔmɔi ni yɔɔ Tiatira asafo lɛ mli lɛ ekomɛi?

²⁰ Nɛkɛ shɛɛ sane nɛɛ baawo Kristofoi ni yɔɔ Tiatira lɛ hewalɛ waa. Bo lɛ susumɔ enɛ he—Nyɔŋmɔ Bi ni yɔɔ ŋwɛi ni awo ehiɛ nyam lɛ diɛŋtsɛ ewie etsɔɔ Kristofoi ni yɔɔ Tiatira lɛ yɛ amɛhaomɔi lɛ ekomɛi ahe! Eji anɔkwale akɛ kɛ hooo lɛ, mɛi ni yɔɔ asafo lɛ mli lɛ ateŋ mɛi komɛi kpɛlɛ nɛkɛ suɔmɔ kwɛmɔ nɛɛ nɔ. Shɛɛ saji kpawo lɛ ateŋ nɔ ni kɛ fe fɛɛ nɛɛ hu yeɔ buaa wɔ koni wɔyoo anɔkwale Kristofoi asafo lɛ ŋmɛnɛ. Yɛ afi 1918 mli, beni Yesu ba Yehowa sɔlemɔwe lɛ kɛha kojomɔ lɛ, no mli lɛ gbɛjianɔtoi babaoo ni amɛyi fa ni amɛkɛɔ akɛ amɛji Kristofoi lɛ kɛ amɛhe ewo wɔŋjamɔ kɛ mumɔŋ ajwamaŋbɔɔ mli. (Yakobo 4:4) Mɛi komɛi kɛ amɛhiɛ fɔ yei ni yɔɔ keketee ni hi shi yɛ afii ohai 19 lɛ mli lɛ atsɔɔmɔi anɔ, tamɔ Ellen White ni jɛ Seventh-Day Adventists jamɔ lɛ mli kɛ Mary Baker Eddy ni jɛ Christian Scientists jamɔ lɛ mli lɛ kɛ nyɛsɛɛ nɛɛ nɔŋŋ lɛ yei pii ni shiɛɔ kɛjɛɔ shiɛmɔ adekai amli lɛ atsɔɔmɔi anɔ. (Nɔ ni tamɔɔɔ enɛ lɛ, kwɛmɔ 1 Timoteo 2:11, 12.) Katolik jamɔi sɔrɔtoi lɛ fɛɛ woɔ Maria hiɛ nyam fe Nyɔŋmɔ kɛ Kristo. Yesu wooo ehiɛ nyam nakai. (Yohane 2:4; 19:26) Ani abaanyɛ akpɛlɛ asafoi ni ŋmɛɔ nɛkɛ yei ahewalɛ ni esaaa nɛɛ gbɛ lɛ anɔ akɛ amɛji Kristofoi?

21. Mɛɛ nikasemɔ yɔɔ Yesu shɛɛ sane ni ekɛmaje Tiatira lɛ mli kɛha aŋkroaŋkroi?

²¹ Aŋkroaŋkroi ni ji Kristofoi baafee jogbaŋŋ akɛ amɛaasusu nɛkɛ sane nɛɛ he, kɛji akɛ amɛji Yohane kuu lɛ mlibii loo tooi krokomɛi lɛ mlibii. (Yohane 10:16) Gbɛ ni yɔɔ mlɛo nɔ tsɔmɔ baanyɛ alaka mɛi komɛi, taakɛ Tiatirabii Isabel kaselɔi lɛ ateŋ mɛi komɛi fee lɛ. Agbɛnɛ kaa ni baaha mɔ aŋmɛɛ saji ahe ni ekɛsaa lɛ hu yɛ. Ŋmɛnɛ, saji tamɔ la he nibii ni abaaye aloo ni aaakpɛlɛ la ni agbalaa awoɔ mɔ mli lɛ nɔ lɛ yɛ ni esa akɛ akɛkpe. Mɛi komɛi baanu he akɛ ekãa ni amɛyɔɔ yɛ sɔɔmɔ nitsumɔ lɛ mli loo yɛ wiemɔi ahamɔ mli lɛ haa amɛ hegbɛ ni amɛkafee keketee tsɔ yɛ shihilɛi krokomɛi amli, tamɔ awuiyeli kɛ jeŋba shara he sinii kɛ video nɔ nibii ni fiteɔ jeŋba ni amɛaakwɛ, aloo daa ni wa ni amɛaanu lɛ babaoo. Yesu kɔkɔbɔɔ ni ekɛha Kristofoi ni yɔɔ Tiatira lɛ kɛɔ wɔ akɛ esaaa akɛ wɔkɛ nibii ni tamɔ nɛkɛ shwɛɔ. Yehowa miisumɔ ni wɔhe atse, wɔjɛ wɔsusuma muu fɛɛ mli wɔtsu nii, ni wɔyiŋ akafee wɔ kɔshikɔshi taakɛ Kristofoi pii ni yɔɔ Tiatira lɛ ji lɛ.

22. Yesu maa bɔ ni ehe hiaa akɛ aaafee toiboo lɛ nɔ mi yɛ mɛɛ gbɛ nɔ?

²² Yɛ naagbee lɛ, Yesu jaje akɛ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ.” (Kpojiemɔ 2:29) Shii ejwɛ nɛ ni Yesu tiɔ nɛkɛ sane ni kanyaa mɔ nɛɛ mli, ni no nɔŋŋ ekɛbaagbe shɛɛ saji etɛ ni baaba lɛ fɛɛ naa. Ani oyɛ toi ni nuɔ nii nakai? Belɛ yaa nɔ ni obo toi jogbaŋŋ, yɛ be mli ni Nyɔŋmɔ tsɔɔ emumɔ lɛ nɔ ekɛ ŋaawoo tsɔɔ egbɛ lɛ nɔ ni ekɛhaa lɛ.

[Shishigbɛ niŋmaa]

[Mfonirii ni yɔɔ baafa 51]

Ŋmɛnɛ, nyɛmimɛi yei anɔkwafoi titri ji mɛi ni kɛ amɛhe woɔ odaseyeli nitsumɔ nɛɛ mli yɛ be mli ni amɛkɛ heshibaa fiɔ teokrase hegbɛi asɛɛ lɛ