Agbala Maŋnyɛ Yitsoŋwalɔ Ko Toi

Maŋtsɛ Ahab yɛ maŋtsɛ shĩa ko yɛ Yezreel. Gbi ko lɛ, eekwɛ esamfɛlɛ lɛ mli ni ena wain abɔɔ ko. Nuu ko ni atsɛɔ lɛ Nabot lɛ abɔɔ ni. Ahab shwe akɛ ená abɔɔ nɛɛ. No hewɔ lɛ, ekɛɛ Nabot akɛ ehɔ̃ɔ ehã lɛ. Shi Nabot ehɔ̃ɔɔ ehãaa lɛ, ejaakɛ Yehowa ewo mla akɛ mɔ ko mɔ ko akahɔ̃ɔ shikpɔŋ ko ni ashi ahã lɛ akɛ gboshinii. Ani Ahab ná miishɛɛ akɛ Nabot ebo Yehowa toi? Dabi. Moŋ lɛ, emli fu waa. Sane lɛ dɔ lɛ aahu akɛ, eyahɔ esɛɛtsu lɛ mli, ni eyeee nii.

Maŋnyɛ Yezebel, Ahab ŋa yitsoŋwalɔ lɛ, kɛɛ lɛ akɛ: ‘Bo ji Israel maŋtsɛ. No hewɔ lɛ, esa akɛ ahã bo nɔ fɛɛ nɔ ni otaoɔ. Mahã onine ashɛ nakai shikpɔŋ lɛ nɔ.’ Eŋmala woji eyahã onukpai ni yɔɔ maŋ lɛ mli lɛ, ni ekɛɛ amɛ akɛ, amɛwie akɛ Nabot elomɔ Nyɔŋmɔ, koni amɛtswia lɛ tɛi ni egbo. Onukpai lɛ fee nɔ ni Yezebel kɛɛ amɛ lɛ. Kɛkɛ ni Yezebel kɛɛ Ahab akɛ: ‘Nabot egbo. Yaa ni oyakɔ abɔɔ lɛ.’

Jeee Nabot pɛ ji mɔ ko ni efeko nɔ ko ni Yezebel gbe. Egbe mɛi babaoo ni sumɔɔ Yehowa. Yezebel já amagai ni efee nibii gbohii krokomɛi. Yehowa na nibii gbohii ni Yezebel feɔ lɛ fɛɛ, ni ekpɛ eyiŋ akɛ ebaagbala etoi.

Ahab bagbo, ni sɛɛ mli lɛ, ebinuu Yehoram baye maŋtsɛ. Yehowa tsu nuu ko ni atsɛɔ lɛ Yehu lɛ ni eyagbala Yezebel kɛ eweku lɛ toi.

Yehu ta eshwiili lɛ mli kɛtee Yezreel, he ni Yezebel yɔɔ lɛ. Yehoram hu wó shwiili koni ekɛ Yehu ayakpe. Be ni Yehoram kɛ Yehu kpe lɛ, ebi lɛ akɛ: ‘Ani toiŋjɔlɛ yɛ mi kɛ bo teŋ?’ Yehu hã hetoo akɛ: ‘Ni omami kã he efeɔ nibii gbohii lɛ, te baafee tɛŋŋ toiŋjɔlɛ baaba?’ Yehoram dɔ ehe akɛ eejo foi. Shi Yehu tsɛ̃ lɛ gãi, ni egbo.

Yehu tsa egbɛfãa lɛ nɔ kɛtee Yezebel shĩa lɛ. Be ni Yezebel nu akɛ eeba lɛ, ewo ehiŋmɛii asɛɛ, esaa eyitsɔi, ni eyata samfɛlɛ lɛ naa yɛ ŋwɛitsu lɛ nɔ emɛ lɛ. Be ni Yehu bashɛ shi lɛ, Yezebel jɛ lɛ. Shi Yehu bo ekɛɛ tsuji ni damɔ Yezebel masɛi lɛ akɛ: “Nyɛshɛa lɛ nyɛfɔ̃a shikpɔŋ!” Amɛtsi Yezebel yisɛɛ kɛtsɔ samfɛlɛ lɛ mli ni ebatswa shi ni egbo.

No sɛɛ lɛ, Yehu gbe Ahab bihii 70 lɛ, ni ehã akpa Baal jamɔ yɛ shikpɔŋ lɛ nɔ. Ona, Yehowa naa nɔ fɛɛ nɔ, ni yɛ be ni sa mli lɛ, egbalaa mɛi ni feɔ nibii gbohii lɛ atoi.