Yitso 1

Shɛɛ Saji ni Jɛ Ŋwɛi

BIBLIA muu lɛ fɛɛ ji shɛɛ sane ni jɛ ŋwɛi, ni wɔŋwɛi Tsɛ lɛ kɛha kɛha wɔtsɔsemɔ. Shi, ŋwɛibɔfo ko ni “damɔɔ Nyɔŋmɔ hiɛ” kɛ shɛɛ saji krɛdɛɛi enyɔ komɛi ha aaafee afii 2,000 ni eho nɛ. Egbɛi ji Gabriel. Nyɛhaa wɔpɛia shihilɛi ni ha ehe bahia akɛ eeesara shikpɔŋ lɛ shii enyɔ nɛɛ mli.

Afi lɛ ji 3 D.Ŋ.B. Yudea gɔji lɛ anɔ, ekolɛ he ko ni kɛ Yerusalem jɛkɛɛɛ tsɔ lɛ ji he ni Yehowa osɔfo ko ni atsɛɔ lɛ Zakaria yɔɔ. Egbɔ, ni eŋa Elizabet hu egbɔ. Ni amɛbɛ bii hu. Eshɛ Zakaria nɔ ni eesɔmɔ yɛ Nyɔŋmɔ sɔlemɔ we lɛ yɛ Yerusalem. Kɛkɛ ni trukaa lɛ Gabriel pue yɛ tsofa-kɛ-ŋma afɔleshaa latɛ lɛ ninejurɔ gbɛ.

Zakaria she gbeyei waa. Shi Gabriel kɛɛ lɛ akɛ ekashe gbeyei ni ekɛɛ: “Kaashe gbeyei, Zakaria, ejaakɛ abo ofaikpamɔi lɛ toi, ni oŋa Elizabet aaafɔ binuu ahao, ni ooowo lɛ gbɛi akɛ Yohane.” Gabriel tee nɔ ejaje akɛ Yohane “aaatsɔ agbo yɛ Nuŋtsɔ lɛ [Yehowa] hiɛ” ni akɛ “eeesaa maŋ ni efee klalo eto Nuŋtsɔ lɛ [Yehowa].”

Shi Zakaria nyɛɛɛ ahe enɛ aye. Ebafee tamɔ nɔ ni nyɛŋ aba mli akɛ lɛ kɛ Elizabet baafɔ bi yɛ he ni amɛdara kɛshɛ nɛɛ. No hewɔ lɛ Gabriel kɛɛ lɛ akɛ: “Ni naa, oootɔ mu ni onyɛŋ owie kɛyashi gbi nɔ ni nii nɛɛ aaaba mli, ejaakɛ oheee miwiemɔi lɛ . . . oyeee.”

Ojogbaŋŋ, yɛ nɛkɛ be nɛɛ mli fɛɛ lɛ, no mli lɛ gbɔmɛi ni yɔɔ sɛɛ lɛ miisusu nɔ hewɔ ni Zakaria etsɛ yɛ sɔlemɔ we lɛ nakai lɛ he. Beni yɛ naagbee lɛ eje kpo lɛ, enyɛɛɛ ewie shi moŋ, ekɛ eniji fee okadii, ni amɛyoo akɛ ena nɔ ko ni yɔɔ naakpɛɛ.

Beni Zakaria gbe esɔɔmɔ yɛ sɔlemɔ we lɛ naa lɛ, eku esɛɛ etee shia. Ni no sɛɛ etsɛɛɛ lɛ, nɔ ni awie lɛ ba mli diɛŋtsɛ—Elizabet na musu! Beni emɛɔ koni efɔ ebi lɛ, Elizabet hi shia ni etsi ehe kɛjɛ mɛi ahe nyɔji enumɔ.

Yɛ sɛɛ mli lɛ Gabriel bapue ekoŋŋ. Ni namɔ ekɛwie? Ekɛ obalayoo fro ko ni boteko gbalashihilɛ mli ni atsɛɔ lɛ Maria ni jɛ Nazaret lɛ wie. Mɛni ji shɛɛ sane ni ekɛha yɛ nɛkɛ be nɛɛ mli lɛ? Bo toi! Gabriel kɛɛ Maria akɛ: “Ohiɛ eba nyam yɛ Nyɔŋmɔ hiɛ. Ni naa, obaana musu ni ooofɔ binuu, ni ooowo lɛ gbɛi akɛ Yesu.” Ni Gabriel kɛfata he akɛ: “Eeetsɔ agbo, ni aaatsɛ lɛ Ŋwɛinyo lɛ Bi, . . . ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.”

Wɔbaanyɛ wɔna nɔmimaa akɛ Gabriel nu he akɛ aduro lɛ waa yɛ nɛkɛ shɛɛ saji ni ekɛha nɛɛ hewɔ. Ni yɛ be mli ni wɔkaneɔ Yohane kɛ Yesu he saji babaoo lɛ, wɔbaana nɔ hewɔ ni nɛkɛ shɛɛ saji ni jɛ ŋwɛi nɛɛ he hiaa waa ha lɛ mli faŋŋ. 2 Timoteo 3:16; Luka 1:5-33.

▪ Mɛɛ shɛɛ saji enyɔ ni he hiaa ajɛ ŋwɛi akɛha?

▪ Namɔ kɛ shɛɛ saji lɛ ha, ni akɛha namɛi?

▪ Mɛni hewɔ ewa akɛ aaahe nakai shɛɛ saji lɛ aye lɛ?