Yesu Shihilɛ Kɛ Esɔɔmɔ Nitsumɔ

Shɛɛ Sane Ni Jɛ Ŋwɛi

BIBLIA muu lɛ fɛɛ ji shɛɛ sane ni jɛ ŋwɛi, ni wɔ Ŋwɛi Tsɛ lɛ kɛha kɛha wɔtsɔsemɔ. Ŋwɛibɔfo ko ni “damɔɔ Nyɔŋmɔ hiɛ” kɛ shɛɛ saji krɛdɛɛi enyɔ ko ha aaafee afii 2,000 ni eho nɛ. Bɔfo lɛ gbɛi ji Gabriel. Nyɛhaa wɔpɛia shihilɛi ni ha ehe bahia akɛ aaasara shikpɔŋ lɛ shii enyɔ nɛɛ mli.

Afi lɛ ji 3 D.Ŋ.B., yɛ Yudea gɔji Iɛ anɔ, ekolɛ he ko ni kɛ Yerusalem jɛkɛɛɛ tsɔ lɛ ji he ni Yehowa osɔfo ko ni atsɛɔ lɛ Zakaria yɔɔ. Egbɔ, ni eŋa Elizabet hu egbɔ. Amɛbɛ bii. Eshɛ Zakaria nɔ ni eesɔmɔ yɛ Nyɔŋmɔ sɔlemɔ we lɛ yɛ Yerusalem. Kɛkɛ ni trukaa lɛ Gabriel pue yɛ tsofa kɛ ŋma afɔleshaa latɛ lɛ ninejurɔ gbɛ.

Zakaria she gbeyei waa. Shi Gabriel kɛɛ lɛ akɛ ekashe gbeyei ni ekɛɛ: ‘Nyɔŋmɔ enu osɔlemɔi lɛ. Elizabet baafɔ binuu, ni oootsɛ egbɛi akɛ Yohane. Lɛ ji mɔ ni baasaa gbɔmɛi aha Yehowa.’ Shi Zakaria nyɛŋ ahe enɛ aye. Ele akɛ ehiŋ, akɛni egbɔ ni eŋa Elizabet hu nyɛŋ afɔ bi hewɔ. No hewɔ lɛ Gabriel kɛɛ lɛ akɛ, ‘akɛni oheee mi oyeee hewɔ lɛ, oootɔ mũ ni onyɛŋ owie kɛyashi be mli ni nɛkɛ nibii nɛɛ fɛɛ baaba.

Ojogbaŋŋ, beni be shwieɔ mli lɛ, no mli lɛ gbɔmɛi ni yɔɔ sɛɛ lɛ miisusu nɔ hewɔ ni Zakaria etsɛ yɛ sɔlemɔwe lɛ nakai lɛ he. Beni yɛ naagbee lɛ eje kpo lɛ, enyɛɛɛ ewie shi moŋ, ekɛ eniji fee okadii, ni amɛyoo akɛ ena nɔ ko ni yɔɔ naakpɛɛ.

Beni Zakaria gbe esɔɔmɔ yɛ sɔlemɔwe lɛ naa lɛ eku sɛɛ etee eshia ni etsɛɛɛ ni nɔ ni awie lɛ ba mli diɛŋtsɛ​—Elizabet ŋɔ hɔ! Beni emɛɔ koni efɔ ebi lɛ, Elizabet hi shia ni etsi ehe kɛjɛ mɛi ahe nyɔji enumɔ.

Ni naa! Gabriel pue ekoŋŋ. Ni namɔ ewie etsɔɔ? Ewie etsɔɔ obalayoo fro ko ni boteko gbalashihilɛ mli ni atsɛɔ Iɛ Maria ni jɛ Nazaret lɛ. Mɛni ji shɛɛ sane ni ekɛha yɛ nɛkɛ be nɛɛ mli lɛ? Bo toi! Gabriel kɛɛ, ‘Obaaŋɔ hɔ ni obaafɔ binuu ni abaatsɛ egbɛi Yesu. Ebaafee agbo, ni emaŋtsɛyeli lɛ baŋ naagbee.’

Wɔbaanyɛ wɔna nɔmimaa akɛ Gabriel nu he akɛ aduro lɛ waa yɛ nɛkɛ shɛɛ saji ni ekɛha nɛɛ hewɔ. Yɛ be mli ni wɔkaneɔ Yohane kɛ Yesu he saji babaoo yɛ woji tɛtrɛɛ nɛɛ krokomɛi ni baaba yɛ sɛɛ mli lɛ amli lɛ, wɔbaana nɔ hewɔ ni nɛkɛ shɛɛ saji ni jɛ ŋwɛi nɛɛ he hiaa waa ha Iɛ mli faŋŋ. 2 Timoteo 3:​16; Luka 1:​5-33.

◆ Mɛɛ shɛɛ saji enyɔ ni he hiaa ajɛ ŋwɛi akɛha?

◆ Namɔ kɛ shɛɛ saji lɛ ha, ni akɛha namɛi?

◆ Mɛni hewɔ ewa akɛ aaahe nakai shɛɛ saji lɛ aye Iɛ?