Yitso 3

Afɔ Gbɛsaalɔ Lɛ

ELIZABET be eshɛ eta ni ekɛbaafɔ. Maria kɛ lɛ ehi shi yɛ nyɔji etɛ ni eho lɛ mli. Shi agbɛnɛ be eshɛ ni Maria kɛ amɛ baaye shɛɛ koni eku esɛɛ efa gbɛ kakadaŋŋ lɛ kɛya Nazaret ekoŋŋ. Lɛ hu ebaafɔ yɛ nyɔji ekpaa mli.

Beni Maria shi amɛ etsɛɛɛ pɛ kɛkɛ ni Elizabet fɔ. Mɛɛ miishɛɛ ana nɛkɛ beni Elizabet fɔ shweshweeshwe ni ekɛ ebi lɛ fɛɛ yɔɔ hewalɛ lɛ! Beni Elizabet kɛ abifao lɛ tsɔɔ ekutsoŋbii kɛ ewekumɛi lɛ, amɛ fɛɛ amɛkɛ lɛ na miishɛɛ waa.

Yɛ efɔmɔ lɛ sɛɛ gbii kpaanyɔ lɛ, taakɛ Nyɔŋmɔ Mla lɛ tsɔɔ lɛ, esa akɛ afo Israel gbekɛ nuu ketia. Ni be nɛɛ shɛ lɛ, nanemɛi kɛ wekumɛi ba amɛbasara amɛ. Amɛkɛɛ akɛ esa akɛ atsɛ gbekɛ lɛ gbɛi akɛ Zakaria, taakɛ atsɛɔ etsɛ lɛ. Shi Elizabet wie. Ekɛɛ amɛ akɛ: “Dabida, shi awo lɛ Yohane moŋ!” Kaimɔ akɛ no ji gbɛi ni bɔfo Gabriel kɛɛ esa akɛ akɛwo gbekɛ lɛ.

Shi enanemɛi lɛ ekpɛlɛɛɛ, ni amɛkɛɛ: “Mɔ ko bɛ oweku lɛ mli ni atsɛɔ lɛ nakai!” Kɛkɛ ni amɛkɛ amɛnine fee okadi ni amɛbi tsɛ lɛ bɔ ni esumɔɔ ni atsɛ gbekɛ nuu lɛ. Kɛkɛ ni ebi ni akɛ tao fioo ko aha lɛ, ni Zakaria ŋma akɛ: “Yohane ji egbɛi,” ni efee amɛ fɛɛ naakpɛɛ.

Amrɔ nɔŋŋ pɛ kɛkɛ ni Zakaria lilɛi fɛne ni ebɔi wiemɔ yɛ naakpɛɛ gbɛ nɔ. Kɛ obaakai lɛ, etɔ mu beni eheee bɔfo lɛ wiemɔ akɛ Elizabet baafɔ bi lɛ eyeee lɛ. Ojogbaŋŋ, no hewɔ lɛ beni Zakaria bɔi wiemɔ lɛ, ekutsoŋbii lɛ fɛɛ anaa kpɛ amɛhe ni amɛbibii amɛhe akɛ: “Mɛni po gbekɛ nɛɛ baatsɔ?”

Agbɛnɛ mumɔ krɔŋkrɔŋ yi Zakaria mli obɔ, ni ekɛ mlifilimɔ wie akɛ: “Ajɔɔ Nuŋtsɔ [Yehowa], Israel Nyɔŋmɔ lɛ, akɛ ebasara emaŋ lɛ, ni etsu kpɔmɔ nii eha amɛ, ni etee walaheremɔ akoloŋto ko shi eha wɔ yɛ ewenuu David we lɛ.” Yɛ anɔkwale mli lɛ, nɛkɛ “walaheremɔ akoloŋto” nɛɛ ji Nuŋtsɔ Yesu, mɔ ni kpaako abaafɔ lɛ lɛ. Zakaria miitsɔɔ mli akɛ, kɛtsɔ lɛ enɔ lɛ, Nyɔŋmɔ “aaaha ajie wɔ yɛ wɔhenyɛlɔi adɛŋ ni wɔsɔmɔ lɛ ni gbeyeishemɔ ko bɛ mli yɛ hetsemɔ kɛ jalɛ mli yɛ ehiɛ wɔgbii abɔ fɛɛ.”

Kɛkɛ ni Zakaria gba yɛ ebinuu Yohane he akɛ: “Ni bo gbekɛ nɛɛ, aaatsɛo Ŋwɛi Flooflonyo lɛ gbalɔ; ejaakɛ obaatsɔ Nuŋtsɔ [Yehowa] lɛ hiɛ ni oyasaa egbɛ lɛ oto, koni oŋɔ yiwalaheremɔ he nilee oha emaŋ lɛ yɛ amɛhe eshai faa mli, yɛ wɔ-Nyɔŋmɔ lɛ mɔbɔnalɛ ni haa emusuŋ tsɔɔ lɛ lɛ naa nɔ ni ha jetsɛremɔ ni jɛ ŋwɛi lɛ ebasara wɔ nɛɛ, koni jeŋ atse aha mɛi ni tara duŋ kɛ gbele hɔɔŋ mli lɛ, ni atsɔmɔ wɔnaji kɛya hejɔlɛ gbɛ lɛ nɔ.”

Yɛ nɛkɛ be nɛɛ mli lɛ, eka shi faŋŋ akɛ Maria ni jeee yoo ni ebote gbalashihilɛ mli lɛ eyashɛ emaŋ Nazaret. Mɛni baaba enɔ kɛ ayoo akɛ ehiɛ musu lɛ? Luka 1:56-80; 3 Mose 12:2, 3.

▪ Be enyiɛ Yohane kɛye Yesu onukpa?

▪ Mɛɛ nibii ba beni Yohane ná gbii kpaanyɔ lɛ?

▪ Mɛɛ gbɛ nɔ Nyɔŋmɔ egbala ejwɛŋmɔ kɛba ewebii anɔ yɛ?

▪ Mɛni nitsumɔ agba afɔ shi akɛ Yohane baatsu?